൩. കുഹകസുത്തവണ്ണനാ

൮൩. തതിയേ തീഹി കുഹനവത്ഥൂഹീതി സാമന്തജപ്പനഇരിയാപഥസന്നിസ്സിതപച്ചയപ്പടിസേവനഭേദതോ തിപ്പഭേദേഹി കുഹനവത്ഥൂഹി. തിവിധേന കുഹനവത്ഥുനാ ലോകം കുഹയതി വിമ്ഹാപയതി ‘‘അഹോ അച്ഛരിയപുരിസോ’’തി അത്തനി പരേസം വിമ്ഹയം ഉപ്പാദേതീതി കുഹകോ. ലാഭസക്കാരത്ഥികോ ഹുത്വാ ലപതി അത്താനം ദായകം വാ ഉക്ഖിപിത്വാ യഥാ സോ കിഞ്ചി ദദാതി, ഏവം ഉക്കാചേത്വാ കഥേതീതി ലപകോ. നിമിത്തം സീലം തസ്സാതി നേമിത്തികോ, നിമിത്തേന വാ ചരതി, നിമിത്തം വാ കരോതീതി നേമിത്തികോ. നിമിത്തന്തി ച പരേസം പച്ചയദാനസഞ്ഞുപ്പാദകം കായവചീകമ്മം വുച്ചതി. നിപ്പേസോ സീലമസ്സാതി നിപ്പേസികോ. നിപ്പിസതീതി വാ നിപ്പേസോ, നിപ്പേസോയേവ നിപ്പേസികോ. നിപ്പേസോതി ച സഠപുരിസോ വിയ ലാഭസക്കാരത്ഥം അക്കോസനുപ്പണ്ഡനപരപിട്ഠിമംസികതാദി.

കുഹകസുത്തവണ്ണനാ നിട്ഠിതാ.