൮. ദക്ഖിണസുത്തവണ്ണനാ

൭൮. അട്ഠമേ ദാനസങ്ഖാതായ ദക്ഖിണായാതി ദേയ്യധമ്മസങ്ഖാതായ ദക്ഖിണായ. വിസുദ്ധി നാമ മഹാജുതികതാ. സാ പന മഹപ്ഫലതായ വേദിതബ്ബാതി ആഹ ‘‘മഹപ്ഫലഭാവേനാ’’തി. വിസുജ്ഝതീതി ന കിലിസ്സതി, അമലിനാ മഹാജുതികാ മഹാവിപ്ഫാരാ ഹോതീതി അത്ഥോ. സുചിധമ്മോതി രാഗാദിഅസുചിവിധമനേന സുചിസഭാവോ. ലാമകധമ്മോതി ഹീനസഭാവോ പാപകിരിയായ. അകുസലധമ്മാ ഹി ഏകന്തനിഹീനാ. ജൂജകോ സീലവാ കല്യാണധമ്മോ ന ഹോതി, തസ്സ മഹാബോധിസത്തസ്സ അത്തനോ പുത്തദാനം ദാനപാരമിയാ മത്ഥകം ഗണ്ഹന്തം മഹാപഥവികമ്പനസമത്ഥം ജാതം. സ്വായം ദായകഗുണോതി ആഹ ‘‘വേസ്സന്തരമഹാരാജാ കഥേതബ്ബോ’’തിആദി. ഉദ്ധരതീതി ബഹുലം പാപകമ്മവസേന ലദ്ധബ്ബവിനിപാതതോ ഉദ്ധരതി, തസ്മാ നത്ഥി മയ്ഹം കിഞ്ചി ചിത്തസ്സ അഞ്ഞത്ഥത്തന്തി അധിപ്പായോ.

പേതദക്ഖിണന്തി പേതേ ഉദ്ദിസ്സ ദാതബ്ബദക്ഖിണം. പാപിതകാലേയേവാതി ‘‘ഇദം ദാനം അസുകസ്സ പേതസ്സ ഹോതൂ’’തി തംഉദ്ദിസനവസേന പത്തിയാ പാപിതകാലേയേവ. അസ്സാതി പേതസ്സ. പാപുണീതി ഫലസമ്പത്തിലഭാപനവസേന പാപുണി. അയഞ്ഹി പേതേ ഉദ്ദിസ്സ ദാനേ ധമ്മതാ. തദാ കോസലരഞ്ഞോ പരിച്ചാഗവസേന അതിവിയ ദാനജ്ഝാസയതം ബുദ്ധപ്പമുഖസ്സ ച സങ്ഘസ്സ ഉക്കംസഗതഗുണവിസിട്ഠതം സന്ധായാഹ ‘‘അസദിസദാനം കഥേതബ്ബ’’ന്തി.

ദക്ഖിണസുത്തവണ്ണനാ നിട്ഠിതാ.