(൨൪) ൪. കമ്മവഗ്ഗോ

൧. സംഖിത്തസുത്തവണ്ണനാ

൨൩൨. ചതുത്ഥസ്സ പഠമേ കാളകന്തി മലീനം, ചിത്തസ്സ അപ്പഭസ്സരഭാവകരന്തി അത്ഥോ. തം പനേത്ഥ കമ്മപഥപ്പത്തമേവ അധിപ്പേതന്തി ആഹ ‘‘ദസഅകുസലകമ്മപഥ’’ന്തി. കണ്ഹാഭിജാതിഹേതുതോ വാ കണ്ഹം. തേനാഹ ‘‘കണ്ഹവിപാക’’ന്തി. അപായൂപപത്തി മനുസ്സേസു ച ദോഭഗ്ഗിയം കണ്ഹവിപാകോ, യം തസ്സ തമഭാവോ വുത്തോ. നിബ്ബത്തനതോതി നിബ്ബത്താപനതോ. പണ്ഡരകന്തി ഓദാതം, ചിത്തസ്സ പഭസ്സരഭാവകരന്തി അത്ഥോ. സുക്കാഭിജാതിഹേതുതോ വാ സുക്കം. തേനാഹ ‘‘സുക്കവിപാക’’ന്തി. സഗ്ഗൂപപത്തി മനുസ്സസോഭഗ്ഗിയഞ്ച സുക്കവിപാകോ, യം തസ്സ ജോതിഭാവോ വുത്തോ. ഉക്കട്ഠനിദ്ദേസേന പന ‘‘സഗ്ഗേ നിബ്ബത്തനതോ’’തി വുത്തം, നിബ്ബത്താപനതോതി അത്ഥോ. മിസ്സകകമ്മന്തി കാലേന കണ്ഹം കാലേന സുക്കന്തി ഏവം മിസ്സകവസേന കതകമ്മം. സുഖദുക്ഖവിപാകന്തി വത്വാ തത്ഥ സുഖദുക്ഖാനം പവത്തിആകാരം ദസ്സേതും ‘‘മിസ്സകകമ്മം ഹീ’’തിആദി വുത്തം. കമ്മസ്സ കണ്ഹസുക്കസമഞ്ഞാ കണ്ഹസുക്കാഭിജാതിഹേതുതായാതി അപചയഗാമിതായ തദുഭയവിദ്ധംസകസ്സ കമ്മക്ഖയകരകമ്മസ്സ ഇധ സുക്കപരിയായോപി ഇച്ഛിതോതി ആഹ ‘‘ഉഭയ…പേ… അയമേത്ഥ അത്ഥോ’’തി. തത്ഥ ഉഭയവിപാകസ്സാതി യഥാധിഗതസ്സ ഉഭയവിപാകസ്സ. സമ്പത്തിഭവപരിയാപന്നോ ഹി വിപാകോ ഇധ സുക്കം സുക്കവിപാകോതി അധിപ്പേതോ, ന അച്ചന്തപരിസുദ്ധോ അരിയഫലവിപാകോ.

സംഖിത്തസുത്തവണ്ണനാ നിട്ഠിതാ.

൨. വിത്ഥാരസുത്തവണ്ണനാ

൨൩൩. ദുതിയേ സബ്യാബജ്ഝന്തി വാ സദുക്ഖം, അത്തനാ ഉപ്പാദേതബ്ബേന ദുക്ഖേന സദുക്ഖന്തി അത്ഥോ, ദുക്ഖസംവത്തനികന്തി വുത്തം ഹോതി. കായസങ്ഖാരാദീസു കായദ്വാരേ ഗഹണാദിവസേന ചോപനപ്പത്താ ദ്വാദസ അകുസലചേതനാ അബ്യാബജ്ഝകായസങ്ഖാരോ നാമ. വചീദ്വാരേ ഹനുസംചോപനവസേന വചീഭേദപ്പവത്തികാ തായേവ ദ്വാദസ വചീസങ്ഖാരോ നാമ. ഉഭയചോപനം അപ്പത്വാ രഹോ ചിന്തേന്തസ്സ മനോദ്വാരേ പവത്താ മനോസങ്ഖാരോ നാമ. ഇതി തീസുപി ദ്വാരേസു കായദുച്ചരിതാദിഭേദാ അകുസലാ ചേതനാവ സങ്ഖാരാതി വേദിതബ്ബാ. അഭിസങ്ഖരോതീതി ആയൂഹതി, തം പന ആയൂഹനം പച്ചയസമവായസിദ്ധിതോ സങ്കഡ്ഢിത്വാ പിണ്ഡനം വിയ ഹോതി. സദുക്ഖം ലോകന്തി അപായലോകമാഹ. വിപാകഫസ്സാതി ഫസ്സസീസേന തത്ഥ വിപാകപ്പവത്തമാഹ. വേമാനികപേതാതി ഇദം ബാഹുല്ലതോ വുത്തം, ഇതരേസമ്പി വിനിപാതികാനം കാലേന സുഖം, കാലേന ദുക്ഖം ഹോതി. തസ്സ പഹാനായാതി തസ്സ യഥാവുത്തസ്സ കമ്മസ്സ അനുപ്പത്തിധമ്മതാപാദനായ. യാ ചേതനാതി യാ അപചയഗാമിനിചേതനാ. തേനേവാഹ ‘‘വിവട്ടഗാമിനീ മഗ്ഗചേതനാ വേദിതബ്ബാ’’തി.

വിത്ഥാരസുത്തവണ്ണനാ നിട്ഠിതാ.

൩-൯. സോണകായനസുത്താദിവണ്ണനാ

൨൩൪-൨൪൦. തതിയേ പുരിമാനി, ഭന്തേ, ദിവസാനി പുരിമതരാനീതി ഏത്ഥ ഹിയ്യോ ദിവസം പുരിമം നാമ, തതോ പരം പുരിമതരന്തി ആഹ ‘‘അതീതാനന്തരദിവസതോ പട്ഠായാ’’തിആദി. ഇതി ഇമേസു ദ്വീസു പവത്തിതോ യഥാക്കമം പുരിമപുരിമതരഭാവോ ദസ്സിതോ. ഏവം സന്തേപി യദേത്ഥ ‘‘പുരിമതര’’ന്തി വുത്തം, തതോ പഭുതി യം യം ഓരം, തം തം പുരിമം. യം യം പരം, തം തം പുരിമതരം ഓരപാരഭാവസ്സ വിയ പുരിമതരഭാവസ്സ ച അപേക്ഖാസിദ്ധത്താ. സേസം വുത്തനയമേവ. ചതുത്ഥാദീനി ഉത്താനത്ഥാനേവ.

സോണകായനസുത്താദിവണ്ണനാ നിട്ഠിതാ.

൧൦-൧൧. സമണസുത്താദിവണ്ണനാ

൨൪൧-൨. ദസമേ സേസപദേസുപീതി ‘‘ഇധ ദുതിയോ സമണോ’’തിആദീസു സേസപദേസുപി. യഥാ ഹി ‘‘വിവിച്ചേവ കാമേഹീ’’തി (ദീ. നി. ൧.൨൨൬; മ. നി. ൧.൨൭൧, ൨൮൭, ൨൯൭; സം. നി. ൨.൧൫൨; അ. നി. ൪.൧൨൩) ഏത്ഥ കതോ നിയമോ ‘‘വിവിച്ച അകുസലേഹീ’’തി ഏത്ഥാപി കതോയേവ ഹോതി സാവധാരണഅത്ഥസ്സ ഇച്ഛിതബ്ബത്താ, ഏവമിധാപീതി. തേനാഹ ‘‘ദുതിയാദയോപി ഹീ’’തിആദി. സാമഞ്ഞഫലാധിഗമവസേന നിപ്പരിയായതോ സമണഭാവോതി തേസം വസേനേത്ഥ ചത്താരോ സമണാ ദേസിതാ. ഇമസ്മിഞ്ഹി ഠാനേ ചത്താരോ ഫലട്ഠകസമണാവ അധിപ്പേതാ സമിതപാപസമണഗ്ഗഹണതോ. കസ്മാ പനേത്ഥ മഹാപരിനിബ്ബാനേ വിയ മഗ്ഗട്ഠാ തദത്ഥായ പടിപന്നാപി ന ഗഹിതാതി? വേനേയ്യജ്ഝാസയതോ. തത്ഥ ഹി മഗ്ഗാധിഗമത്ഥായ വിപസ്സനാപി ഇതോ ബഹിദ്ധാ നത്ഥി, കുതോ മഗ്ഗഫലാനീതി ദസ്സേന്തേന ഭഗവതാ ‘‘ഞായസ്സ ധമ്മസ്സ പദേസവത്തീ, ഇതോ ബഹിദ്ധാ സമണോപി നത്ഥീ’’തി (ദീ. നി. ൨.൨൧൪) വുത്തം. ഇധ പന നിട്ഠാനപ്പത്തമേവ തംതംസമണഭാവം ഗണ്ഹന്തേന ഫലട്ഠകസമണാവ ഗഹിതാ, മഗ്ഗട്ഠതോ ഫലട്ഠോ സവിസേസം ദക്ഖിണേയ്യോതി. സ്വായമത്ഥോ ദ്വീസു സുത്തേസു ദേസനാഭേദേനേവ വിഞ്ഞായതീതി. രിത്താതി വിവിത്താ. തുച്ഛാതി നിസ്സാരാ പടിപന്നകസാരാഭാവതോ.

പവദന്തി ഏതേഹീതി പവാദാ. ദിട്ഠിഗതികാനം നാനാദിട്ഠിദീപകസമയാതി ആഹ ‘‘ചത്താരോ സസ്സതവാദാ’’തിആദി. തത്ഥ ചത്താരോ സസ്സതവാദാതി ലാഭിവസേന തയോ, തക്കിവസേന ഏകോതി ഏവം ചത്താരോ സസ്സതവാദാ. പുബ്ബേനിവാസഞാണലാഭീ തിത്ഥിയോ മന്ദപഞ്ഞോ അനേകജാതിസതസഹസ്സമത്തം അനുസ്സരതി, മജ്ഝപഞ്ഞോ ദസ സംവട്ടവിവട്ടകപ്പാനി, തിക്ഖപഞ്ഞോ ചത്താലീസ സംവട്ടവിവട്ടകപ്പാനി, ന തതോ പരം. സോ ഏവം അനുസ്സരന്തോ ‘‘സസ്സതോ അത്താ ച ലോകോ ചാ’’തി അഭിവദതി, തക്കീ പന തക്കപരിയാഹതം വീമംസാനുചരിതം സയംപടിഭാനം ‘‘സസ്സതോ അത്താ ച ലോകോ ചാ’’തി അഭിവദതി. തേന വുത്തം ‘‘ലാഭിവസേന തയോ, തക്കിവസേന ഏകോതി ഏവം ചത്താരോ സസ്സതവാദാ’’തി.

സത്തേസു സങ്ഖാരേസു ച ഏകച്ചം സസ്സതന്തി പവത്തോ വാദോ ഏകച്ചസസ്സതവാദോ. സോ പന ബ്രഹ്മകായികഖിഡ്ഡാപദോസികമനോപദോസികത്തഭാവതോ ചവിത്വാ ഇധാഗതാനം തക്കിനോ ച ഉപ്പജ്ജനവസേന ചതുബ്ബിധോതി ആഹ ‘‘ചത്താരോ ഏകച്ചസസ്സതവാദാ’’തി.

ചത്താരോ അന്താനന്തികാതി ഏത്ഥ അമതി ഗച്ഛതി ഏത്ഥ വോസാനന്തി അന്തോ, മരിയാദാ. തപ്പടിസേധേന അനന്തോ. അന്തോ ച അനന്തോ ച അന്താനന്തോ സാമഞ്ഞനിദ്ദേസേന, ഏകസേസേന വാ ‘‘നാമരൂപപച്ചയാ സളായതന’’ന്തിആദീസു (മ. നി. ൩.൧൨൬; ഉദാ. ൧) വിയ. അന്താനന്തസഹചരിതോ വാദോ അന്താനന്തോ യഥാ ‘‘കുന്താ ചരന്തീ’’തി. അന്താനന്തസന്നിസ്സയോ വാ യഥാ ‘‘മഞ്ചാ ഘോസന്തീ’’തി. സോ ഏതേസം അത്ഥീതി അന്താനന്തികാ. ‘‘അന്തവാ അത്താ ച ലോകോ ച, അനന്തവാ അത്താ ച ലോകോ ച, അന്തവാ ച അനന്തവാ ച അത്താ ച ലോകോ ച, നേവന്തവാ നാനന്തവാ’’തി ഏവം പവത്തവാദാ ചത്താരോ. അവഡ്ഢിതകസിണസ്സ തം കസിണം അത്താതി ച ലോകോതി ച ഗണ്ഹന്തസ്സ വസേന പഠമോ വുത്തോ, ദുതിയോ വഡ്ഢിതകസിണസ്സ വസേന വുത്തോ, തതിയോ തിരിയം വഡ്ഢേത്വാ ഉദ്ധമധോ അവഡ്ഢിതകസിണസ്സ, ചതുത്ഥോ തക്കിവസേന വുത്തോ. ഏത്ഥ ച യുത്തം താവ പുരിമാനം തിണ്ണം വാദാനം അന്തഞ്ച അനന്തഞ്ച അന്താനന്തഞ്ച ആരബ്ഭ പവത്തവാദത്താ അന്താനന്തികത്തം, പച്ഛിമസ്സ പന തദുഭയനിസേധനവസേന പവത്തവാദത്താ കഥമന്താനന്തികത്തന്തി? തദുഭയപ്പടിസേധനവസേന പവത്തവാദത്താ ഏവ. അന്താനന്തികപ്പടിസേധവാദോപി ഹി അന്താനന്തവിസയോ ഏവ തം ആരബ്ഭ പവത്തത്താ.

ന മരതീതി അമരാ. കാ സാ? ‘‘ഏവന്തിപി മേ നോ’’തിആദിനാ (ദീ. നി. ൧.൬൨) നയേന പരിയന്തരഹിതാ ദിട്ഠിഗതികസ്സ ദിട്ഠി ചേവ വാചാ ച. വിവിധോ ഖേപോതി വിക്ഖേപോ, അമരായ ദിട്ഠിയാ, വാചായ വാ വിക്ഖേപോതി അമരാവിക്ഖേപോ, സോ ഏതസ്സ അത്ഥീതി അമരാവിക്ഖേപികോ. അഥ വാ അമരാ നാമ മച്ഛജാതി, സാ ഉമ്മുജ്ജനാദിവസേന ഉദകേ സന്ധാവമാനാ ഗാഹം ന ഗച്ഛതി, ഏവമേവം അയമ്പി വാദോ ഇതോ ചിതോ ച സന്ധാവതി, ഗാഹം ന ഉപഗച്ഛതീതി അമരാവിക്ഖേപോതി വുച്ചതി, സോ ഏതേസം അത്ഥീതി അമരാവിക്ഖേപികാ. സ്വായം വാദോ മുസാവാദാനുയോഗഛന്ദരാഗഭയമോഹഭാവഹേതുകതായ ചതുധാ പവത്തോതി ആഹ ‘‘ചത്താരോ അമരാവിക്ഖേപികാ’’തി.

അധിച്ച യഥിച്ഛകം യം കിഞ്ചി കാരണം കസ്സചി ബുദ്ധിപുബ്ബം വാ വിനാ സമുപ്പന്നോതി അത്തലോകസഞ്ഞിതാനം ഖന്ധാനം അധിച്ച പവത്തിആകാരാരമ്മണം ദസ്സനം തദാകാരസന്നിസ്സയേന പവത്തിതോ തദാകാരസഹചരിതതായ ച ‘‘അധിച്ചസമുപ്പന്ന’’ന്തി വുച്ചതി യഥാ ‘‘മഞ്ചാ ഘോസന്തി’’, ‘‘കുന്താ ചരന്തീ’’തി ച. തം ഏതേസം അത്ഥീതി അധിച്ചസമുപ്പന്നികാ. ലാഭിവസേന തക്കിവസേന ച ‘‘ദ്വേ അധിച്ചസമുപ്പന്നികാ’’തി വുത്തം.

സഞ്ഞീതി പവത്തോ വാദോ സഞ്ഞിവാദോ, സോ ഏതേസം അത്ഥീതി സഞ്ഞിവാദാ. രൂപിചതുക്കം ഏകന്തസുഖചതുക്കന്തി ഇമേസം ചതുന്നം ചതുക്കാനം വസേന സോളസ സഞ്ഞിവാദാ. ഇമേസുയേവ പുരിമാനം ദ്വിന്നം ചതുക്കാനം വസേന അട്ഠ സഞ്ഞിവാദാ, അട്ഠ നേവസഞ്ഞിനാസഞ്ഞിവാദാ വേദിതബ്ബാ. കേവലഞ്ഹി തത്ഥ ‘‘സഞ്ഞീ അത്താ’’തി ഗണ്ഹന്താനം താ ദിട്ഠിയോ, ഇധ അസഞ്ഞീതി ച നേവസഞ്ഞീനാസഞ്ഞീതി ച.

സത്ത ഉച്ഛേദവാദാതി മനുസ്സത്തഭാവേ കാമാവചരദേവത്തഭാവേ രൂപാവചരത്തഭാവേ ചതുബ്ബിധാരൂപത്തഭാവേ ച ഠത്വാ സത്തസ്സ ഉച്ഛേദപഞ്ഞാപനവസേന സത്ത ഉച്ഛേദവാദാ.

പഞ്ച ദിട്ഠധമ്മനിബ്ബാനവാദാതി പഞ്ചകാമഗുണഉപഭോഗവസേന ചതുബ്ബിധരൂപജ്ഝാനസുഖപരിഭോഗവസേന ച ദിട്ഠധമ്മേ നിബ്ബൂതിപഞ്ഞാപനവാദാ. ദിട്ഠധമ്മോതി പച്ചക്ഖധമ്മോ വുച്ചതി, തത്ഥ തത്ഥ പടിലദ്ധത്തഭാവസ്സേതം അധിവചനം. ദിട്ഠധമ്മേ നിബ്ബാനം ദിട്ഠധമ്മനിബ്ബാനം, ഇമസ്മിംയേവ അത്തഭാവേ ദുക്ഖവൂപസമന്തി അത്ഥോ. തം വദന്തീതി ദിട്ഠധമ്മനിബ്ബാനവാദാ.

ഞായതി കമതി പടിവിജ്ഝതീതി ഞായോ, സോ ഏവ നിബ്ബാനസമ്പാപകഹേതുതായ ധമ്മോതി ആഹ ‘‘ഞായസ്സ ധമ്മസ്സാ’’തി. ഇതോ ബഹിദ്ധാ സമണോപി നത്ഥീതിആദീസു കസ്മാ പനേതേ അഞ്ഞത്ഥ നത്ഥീതി? അക്ഖേത്തതായ. യഥാ ഹി ന ആരഗ്ഗേ സാസപോ തിട്ഠതി, ന ഉദകപിട്ഠേ അഗ്ഗി ജലതി, ന പിട്ഠിപാസാണേ ബീജാനി വിരുഹന്തി, ഏവമേവം ബാഹിരേസു തിത്ഥായതനേസു ന ഇമേ സമണാ ഉപ്പജ്ജന്തി, ഇമസ്മിംയേവ സാസനേ ഉപ്പജ്ജന്തി. കസ്മാ? സുക്ഖേത്തതായ. സാ പന നേസം അക്ഖേത്തതാ സുക്ഖേത്തതാ ച അരിയമഗ്ഗസ്സ അഭാവതോ ഭാവതോ ച വേദിതബ്ബാ. തേനാഹ ഭഗവാ –

‘‘യസ്മിം ഖോ, സുഭദ്ദ, ധമ്മവിനയേ അരിയോ അട്ഠങ്ഗികോ മഗ്ഗോ ന ഉപലബ്ഭതി, സമണോപി തത്ഥ ന ഉപലബ്ഭതി, ദുതിയോപി തത്ഥ സമണോ ന ഉപലബ്ഭതി, തതിയോപി തത്ഥ സമണോ ന ഉപലബ്ഭതി, ചതുത്ഥോപി തത്ഥ സമണോ ന ഉപലബ്ഭതി. യസ്മിഞ്ച ഖോ, സുഭദ്ദ, ധമ്മവിനയേ അരിയോ അട്ഠങ്ഗികോ മഗ്ഗോ ഉപലബ്ഭതി, സമണോപി തത്ഥ ഉപലബ്ഭതി, ദുതിയോപി തത്ഥ… തതിയോപി തത്ഥ… ചതുത്ഥോപി തത്ഥ സമണോ ഉപലബ്ഭതി. ഇമസ്മിം ഖോ, സുഭദ്ദ, ധമ്മവിനയേ അരിയോ അട്ഠങ്ഗികോ മഗ്ഗോ ഉപലബ്ഭതി. ഇധേവ, സുഭദ്ദ, സമണോ, ഇധ ദുതിയോ സമണോ, ഇധ തതിയോ സമണോ, ഇധ ചതുത്ഥോ സമണോ, സുഞ്ഞാ പരപ്പവാദാ സമണേഭി അഞ്ഞേഹീ’’തി (ദീ. നി. ൨.൨൧൪).

അരിയമഗ്ഗസ്സ ച അഭാവോ ഭാവോ ച സുപരിസുദ്ധസ്സ സീലസ്സ സുപരിസുദ്ധായ സമഥവിപസ്സനാഭാവനായ അഭാവതോ ഭാവതോ ച വേദിതബ്ബോ. തദുഭയഞ്ച ദുരക്ഖാതസ്വാക്ഖാതഭാവഹേതുകം. സോ ച അസമ്മാസമ്ബുദ്ധപ്പവേദിതത്താ. യസ്മാ തിത്ഥായതനം അക്ഖേത്തം, സാസനം ഖേത്തം, തസ്മാ യഥാ സുരത്തഹത്ഥപാദോ ഭാസുരകേസരഭാരോ സീഹോ മിഗരാജാ ന സുസാനേ വാ സങ്കാരകൂടേ വാ പടിവസതി, തിയോജനസഹസ്സവിത്ഥതം പന ഹിമവന്തം അജ്ഝോഗാഹേത്വാ മണിഗുഹായമേവ വസതി, യഥാ ച ഛദ്ദന്തോ നാഗരാജാ ന ഗോചരിയഹത്ഥികുലാദീസു നവസു കുലേസു ഉപ്പജ്ജതി, യഥാ ച വലാഹകോ അസ്സരാജാ ന ഗദ്രഭകുലേ വാ ഘോടകകുലേ വാ ഉപ്പജ്ജതി, സിന്ധുതീരേ പന സിന്ധവകുലേയേവ ഉപ്പജ്ജതി, യഥാ ച സബ്ബകാമദദം മനോഹരം മണിരതനം ന സങ്കാരകൂടേ വാ പംസുപബ്ബതാദീസു വാ ഉപ്പജ്ജതി, വിപുലപബ്ബതബ്ഭന്തരേയേവ ഉപ്പജ്ജതി, യഥാ ച തിമിരപിങ്ഗലോ മച്ഛരാജാ ന ഖുദ്ദകപോക്ഖരണീസു ഉപ്പജ്ജതി, ചതുരാസീതിയോജനസഹസ്സഗമ്ഭീരേ മഹാസമുദ്ദേയേവ ഉപ്പജ്ജതി, യഥാ ച ദിയഡ്ഢയോജനസതികോ സുപണ്ണരാജാ ന ഗാമദ്വാരേ ഏരണ്ഡവനാദീസു പടിവസതി, മഹാസമുദ്ദം പന അജ്ഝോഗാഹേത്വാ സിമ്ബലിദഹവനേയേവ പടിവസതി, യഥാ ച ധതരട്ഠോ സുവണ്ണഹംസോ ന ഗാമദ്വാരേ ആവാടകാദീസു പടിവസതി, നവുതിഹംസസഹസ്സപരിവാരോ പന ഹുത്വാ ചിത്തകൂടേയേവ പടിവസതി, യഥാ ച ചതുദ്ദീപിസ്സരോ ചക്കവത്തിരാജാ ന നീചകുലേ ഉപ്പജ്ജതി, അസമ്ഭിന്നജാതിയഖത്തിയകുലേയേവ പന ഉപ്പജ്ജതി, ഏവമേവം ഇമേസു സമണേസു ഏകസമണോപി ന അഞ്ഞത്ഥ തിത്ഥായതനേ ഉപ്പജ്ജതി, അരിയമഗ്ഗപരിക്ഖതേ പന ബുദ്ധസാസനേയേവ ഉപ്പജ്ജതി. തേനാഹ ഭഗവാ – ‘‘ഇധേവ, ഭിക്ഖവേ, സമണോ…പേ… സുഞ്ഞാ പരപ്പവാദാ സമണേഭി അഞ്ഞേഹീ’’തി (മ. നി. ൧.൧൩൯-൧൪൦; അ. നി. ൪.൨൪൧). ഏകാദസമേ നത്ഥി വത്തബ്ബം.

സമണസുത്താദിവണ്ണനാ നിട്ഠിതാ.

കമ്മവഗ്ഗവണ്ണനാ നിട്ഠിതാ.