(൧൦) ൫. അസുരവഗ്ഗോ
൧-൨. അസുരസുത്താദിവണ്ണനാ
൯൧-൯൨. പഞ്ചമസ്സ പഠമദുതിയാനി ഉത്താനത്ഥാനേവ.
അസുരസുത്താദിവണ്ണനാ നിട്ഠിതാ.
൩. ദുതിയസമാധിസുത്തവണ്ണനാ
൯൩. തതിയേ അപ്പടിവാനീതി ഭാവപ്പധാനോ നിദ്ദേസോതി ആഹ ‘‘അനിവത്തനതാ’’തി. ‘‘അപ്പടിവാനിതാ’’തി വത്തബ്ബേ ‘‘അപ്പടിവാനീ’’തി വുത്തം. തഥാ ഹി വീരിയപ്പവാഹേ വത്തമാനേ അന്തരാ ഏവ പടിഗമനം നിവത്തനം പടിവാനം, തം അസ്സ അത്ഥീതി പടിവാനീ, ന പടിവാനീ അപ്പടിവാനീ, തസ്സ ഭാവോ അപ്പടിവാനിതാ, അനിവത്തനാതി അത്ഥോ. അപ്പടിവാനീതി വാ ഇത്ഥിലിങ്ഗവസേനേവായം നിദ്ദേസോ. അന്തരായേവ പടിഗമനം നിവത്തനം പടിവാനീ, ന പടിവാനീ അപ്പടിവാനീ, അനിവത്തനാതി അത്ഥോ.
ദുതിയസമാധിസുത്തവണ്ണനാ നിട്ഠിതാ.
൪. തതിയസമാധിസുത്തവണ്ണനാ
൯൪. ചതുത്ഥേ സണ്ഠപേതബ്ബന്തി സമ്മദേവ ഠപേതബ്ബം. യഥാ പന ഠപിതം സണ്ഠപിതം ഹോതി, തം ദസ്സേതും ‘‘സന്നിസാദേതബ്ബ’’ന്തിആദി വുത്തം. തത്ഥ സന്നിസാദേതബ്ബന്തി സമാധിപ്പടിപക്ഖേ കിലേസേ സന്നിസീദാപേന്തേന ചിത്തം ഗോചരജ്ഝത്തേ സന്നിസീദാപേതബ്ബന്തി. ഏകോദി കാതബ്ബന്തി അബ്യഗ്ഗഭാവാപാദനേന ഏകഗ്ഗം കാതബ്ബം. സമാദഹിതബ്ബന്തി യഥാ ആരമ്മണേ സുട്ഠു അപ്പിതം ഹോതി, ഏവം സമ്മാ സമ്മദേവ ആദഹിതബ്ബം, സുട്ഠു ആരോപേതബ്ബം സമാഹിതം കാതബ്ബന്തി അത്ഥോ.
തതിയസമാധിസുത്തവണ്ണനാ നിട്ഠിതാ.
൫-൬. ഛവാലാതസുത്താദിവണ്ണനാ
൯൫-൯൬. പഞ്ചമേ ഛവാലാതന്തി ഛവാനം ദഡ്ഢട്ഠാനേ അലാതം. തേനേവാഹ ‘‘സുസാനേ അലാത’’ന്തി. മജ്ഝട്ഠാനേ ഗൂഥമക്ഖിതന്തി പമാണേന അട്ഠങ്ഗുലമത്തം ദ്വീസു ഠാനേസു ആദിത്തം മജ്ഝേ ഗൂഥമക്ഖിതം. കട്ഠത്ഥന്തി കട്ഠേന കാതബ്ബകിച്ചം. സേസമേത്ഥ ഉത്താനമേവ. ഛട്ഠം ഉത്താനമേവ.
ഛവാലാതസുത്താദിവണ്ണനാ നിട്ഠിതാ.
൭-൧൦. ഖിപ്പനിസന്തിസുത്താദിവണ്ണനാ
൯൭-൧൦൦. സത്തമേ ഖിപ്പനിസന്തീതി ഖിപ്പപഞ്ഞോ. തേനാഹ ‘‘ഖിപ്പനിസാമനോ’’തിആദി. അനുരൂപധമ്മന്തി ലോകുത്തരാധിഗമസ്സ അനുച്ഛവികസഭാവം. കല്യാണാ സുന്ദരാ പരിമണ്ഡലപദബ്യഞ്ജനാ വാചാ അസ്സാതി കല്യാണവാചോ. തേനാഹ ‘‘സുന്ദരവചനോ’’തി. കല്യാണം മധുരം വാക്കരണം ഉദാഹാരഘോസോ അസ്സാതി കല്യാണവാക്കരണോ. ഗുണപരിപുണ്ണഭാവേന പൂരേ പുണ്ണഭാവേ ഭവാതി പോരീ, തായ പോരിയാ. തേനാഹ ‘‘ഗുണപരിപുണ്ണായാ’’തി. പുരേ ഭവത്താ പോരിയാ നാഗരികിത്ഥിയാ സുഖുമാലത്തനേന സദിസാതി പോരീ, തായ പോരിയാ. ‘‘സുഖുമാലത്തനേനാ’’തി ഇമിനാ തസ്സാ വാചായ മുദുസണ്ഹഭാവോ വുത്തോ. അപലിബുദ്ധായാതി പിത്തസേമ്ഹാദീഹി ന പലിവേഠിതായ. അദോസായാതി സന്ദിദ്ധവിലമ്ബിതാദിദോസരഹിതായ അഗളിതപദബ്യഞ്ജനായാതി അപതിതപദബ്യഞ്ജനായ അവിരഹിതപദബ്യഞ്ജനായ. ഉഭയമേതം അനേലഗലായാതി ഇമസ്സേവ അത്ഥവചനം. അനേലഗലായാതി ഹി അനേലായ ചേവ അഗലായ ചാതി അത്ഥോ. അത്ഥം വിഞ്ഞാപേതും സമത്ഥായാതി ആദിമജ്ഝപരിയോസാനം പാകടം കത്വാ ഭാസിതത്ഥസ്സ വിഞ്ഞാപനസത്ഥായ. അട്ഠമനവമദസമാനി ഉത്താനത്ഥാനേവ.
ഖിപ്പനിസന്തിസുത്താദിവണ്ണനാ നിട്ഠിതാ.
അസുരവഗ്ഗവണ്ണനാ നിട്ഠിതാ.
ദുതിയപണ്ണാസകം നിട്ഠിതം.