൧-൨. കുസിനാരസുത്താദിവണ്ണനാ

൧൨൪-൧൨൫. തതിയസ്സ പഠമേ തണ്ഹാഗേധേന ഗഥിതോതി തണ്ഹാബന്ധനേന ബദ്ധോ. തണ്ഹാമുച്ഛനായാതി തണ്ഹായ വസേന മുച്ഛാപത്തിയാ. മുച്ഛിതോതി മുച്ഛം മോഹം പമാദം ആപന്നോ. അജ്ഝോപന്നോതി അധിഓപന്നോ. തണ്ഹായ അധിഭവിത്വാ അജ്ഝോത്ഥടോ ഗിലിത്വാ പരിനിട്ഠപേത്വാ വിയ ഠിതോ. തേനാഹ ‘‘അജ്ഝോപന്നോതി തണ്ഹായ ഗിലിത്വാ പരിനിട്ഠപേത്വാ പവത്തോ’’തി. അനാദീനവദസ്സാവീതി ഗഥിതാദിഭാവേന പരിഭോഗേ ആദീനവമത്തമ്പി ന പസ്സതി. നിസ്സരണപഞ്ഞോതി അയമത്ഥോ ആഹാരപരിഭോഗേതി തത്ഥ പയോജനപരിച്ഛേദികാ ‘‘യാവദേവ ഇമസ്സ കായസ്സ ഠിതിയാ’’തിആദിനാ (മ. നി. ൧.൨൩; ൨.൨൪; ൩.൭൫; സം. നി. ൪.൧൨൦; അ. നി. ൬.൫൮; ൮.൯) പവത്താ ആഹാരപടിബദ്ധഛന്ദരാഗനിസ്സരണഭൂതാ പഞ്ഞാ അസ്സ അത്ഥീതി നിസ്സരണപഞ്ഞോ. സേസമേത്ഥ ഉത്താനമേവ. ദുതിയേ നത്ഥി വത്തബ്ബം.

കുസിനാരസുത്താദിവണ്ണനാ നിട്ഠിതാ.