൩. തതിയോ പരിച്ഛേദോ

ചേതസികവിഭാഗനിദ്ദേസോ

൮൯. സബ്ബേ ചേതസികാ വുത്താ, ബുദ്ധേനാദിച്ചബന്ധുനാ;

നാമസാമഞ്ഞതോയേവ, ദ്വേപഞ്ഞാസ ഭവന്തി തേ.

സേയ്യഥിദം – ഫസ്സോ വേദനാ സഞ്ഞാ ചേതനാ വിതക്കോ വിചാരോ പീതി ചിത്തേകഗ്ഗതാ വീരിയം ജീവിതം ഛന്ദോ അധിമോക്ഖോ മനസികാരോ തത്രമജ്ഝത്തതാ സദ്ധാ സതി ഹിരീ ഓത്തപ്പം അലോഭോ അദോസോ അമോഹോ കായപ്പസ്സദ്ധിആദീനി ഛ യുഗാനി, തിസ്സോ വിരതിയോ, കരുണാ മുദിതാ ലോഭോ ദോസോ മോഹോ ഉദ്ധച്ചം മാനോ ദിട്ഠി ഇസ്സാ മച്ഛരിയം കുക്കുച്ചം ഥിനം മിദ്ധം വിചികിച്ഛാ അഹിരികം അനോത്തപ്പഞ്ചാതി.

൯൦. ചതുപഞ്ഞാസധാ കാമേ, രൂപേ പഞ്ചദസേരിതാ;

തേ ഹോന്തി ദ്വാദസാരൂപേ, ചത്താലീസമനാസവാ.

൯൧. ഏകവീസസതം സബ്ബേ, ചിത്തുപ്പാദാ സമാസതോ;

ഏതേസു തേസമുപ്പത്തിം, ഉദ്ധരിത്വാ പനേകകം.

൯൨. ഫസ്സാദീനം തു ധമ്മാനം, പവക്ഖാമി ഇതോ പരം;

പാടവത്ഥായ ഭിക്ഖൂനം, ചിത്തചേതസികേസ്വഹം.

൯൩. ഏകഗ്ഗതാ മനക്കാരോ, ജീവിതം ഫസ്സപഞ്ചകം;

അട്ഠേതേ അവിനിബ്ഭോഗാ, ഏകുപ്പാദാ സഹക്ഖയാ.

൯൪. ഫസ്സോ ച വേദനാ സഞ്ഞാ, ചേതനാ ജീവിതിന്ദ്രിയം;

ഏകഗ്ഗതാ മനക്കാരോ, സബ്ബസാധാരണാ ഇമേ.

൯൫. വിതക്കോ പഞ്ചപഞ്ഞാസ-ചിത്തേസു സമുദീരിതോ;

ചാരോ ഛസട്ഠിചിത്തേസു, ജായതേ നത്ഥി സംസയോ.

൯൬. ഏകപഞ്ഞാസചിത്തേസു, പീതി തേസട്ഠിയാ സുഖം;

ഉപേക്ഖാ പഞ്ചപഞ്ഞാസ-ചിത്തേ ദുക്ഖം തു തീസു ഹി.

൯൭. ഹോതി ദ്വാസട്ഠിചിത്തേസു, സോമനസ്സിന്ദ്രിയം പന;

ദുക്ഖിന്ദ്രിയം പനേകസ്മിം, തഥേകമ്ഹി സുഖിന്ദ്രിയം.

൯൮. പഞ്ചുത്തരസതേ ചിത്തേ, വീരിയം ആഹ നായകോ;

ചതുത്തരസതേ ചിത്തേ, സമാധിന്ദ്രിയമബ്രവി.

൯൯. സബ്ബാഹേതുകചിത്താനി, ഠപേത്വാ ചേകഹേതുകേ;

ഏകുത്തരസതേ ചിത്തേ, ഛന്ദസ്സുപ്പത്തിമുദ്ദിസേ.

൧൦൦. ഠപേത്വാ ദസ വിഞ്ഞാണേ, വിചികിച്ഛായുതമ്പി ച;

ദസുത്തരസതേ ചിത്തേ, അധിമോക്ഖോ ഉദീരിതോ.

൧൦൧. സദ്ധാ സതി ഹിരോത്തപ്പം, അലോഭാദോസമജ്ഝതാ;

ഛളേവ യുഗളാ ചാതി, ധമ്മാ ഏകൂനവീസതി.

൧൦൨. ഏകനവുതിയാ ചിത്തേ, ജായന്തി നിയതാ ഇമേ;

അഹേതുകേസു ചിത്തേസു, അപുഞ്ഞേസു ന ജായരേ.

൧൦൩. ഏകൂനാസീതിയാ ചിത്തേ, പഞ്ഞാ ജായതി സബ്ബദാ;

അട്ഠവീസതിയാ ചിത്തേ, കരുണാമുദിതാ സിയും.

൧൦൪. കാമാവചരപുഞ്ഞേസു, സബ്ബലോകുത്തരേസു ച;

ചത്താലീസവിധേ ചിത്തേ, സാട്ഠകേ വിരതിത്തയം.

൧൦൫. സദ്ധാ സതി ഹിരോത്തപ്പം, അലോഭാദിത്തയമ്പി ച;

യുഗളാനി ഛ മജ്ഝത്തം, കരുണാമുദിതാപി ച.

൧൦൬. തഥാ വിരതിയോ തിസ്സോ, സബ്ബേ തേ പഞ്ചവീസതി;

കുസലാബ്യാകതാ ചാപി, കുസലേന പകാസിതാ.

൧൦൭. അഹിരീകമനോത്തപ്പം, മോഹോ ഉദ്ധച്ചമേവ ച;

ദ്വാദസാപുഞ്ഞചിത്തേസു, നിയതായേവ ജായരേ.

൧൦൮. ലോഭോ ദോസോ ച മോഹോ ച, മാനോ ദിട്ഠി ച സംസയോ;

മിദ്ധമുദ്ധച്ചകുക്കുച്ചം, ഥിനം മച്ഛരിയമ്പി ച.

൧൦൯. അഹിരീകമനോത്തപ്പം, ഇസ്സാ ച ദോമനസ്സകം;

ഏതേ അകുസലാ വുത്താ, ഏകന്തേന മഹേസിനാ.

൧൧൦. ലോഭോ അട്ഠസു നിദ്ദിട്ഠോ, വുത്താ ചതൂസു ദിട്ഠിതു;

മാനോ ദിട്ഠിവിയുത്തേസു, ദോസോദ്വീസ്വേവ ജായതേ.

൧൧൧. ഇസ്സാമച്ഛേരകുക്കുച്ചാ, ദ്വീസു ജായന്തി നോ സഹ;

വിചികിച്ഛാ പനേകസ്മിം, ഥിനമിദ്ധം തു പഞ്ചസു.

൧൧൨. ഫസ്സോ ച വേദനാ സഞ്ഞാ, ചേതനാ ജീവിതം മനോ;

വിതക്കോ ച വിചാരോ ച, പീതി വീരിയസമാധി ച.

൧൧൩. ഛന്ദോ ചേവാധിമോക്ഖോ ച, മനസികാരോ ച ചുദ്ദസ;

കുസലാകുസലാ ചേവ, ഹോന്തി അബ്യാകതാപി ച.

൧൧൪. ഏകൂനതിംസചിത്തേസു, ഝാനം പഞ്ചങ്ഗികം മതം;

ചതുഝാനങ്ഗയുത്താനി, സത്തതിംസാതി നിദ്ദിസേ.

൧൧൫. ഏകാദസവിധം ചിത്തം, തിവങ്ഗികമുദീരിതം;

ചതുതിംസവിധം ചിത്തം, ദുവങ്ഗികമുദീരിതം.

൧൧൬. സഭാവേനാവിതക്കേസു, ഝാനങ്ഗാനി ന ഉദ്ധരേ;

സബ്ബാഹേതുകചിത്തേസു, മഗ്ഗങ്ഗാനി ന ഉദ്ധരേ.

൧൧൭. തീണി സോളസചിത്തേസു, ഇന്ദ്രിയാനി വദേ ബുധോ;

ഏകസ്മിം പന ചത്താരി, പഞ്ച തേരസസുദ്ധരേ.

൧൧൮. സത്ത ദ്വാദസചിത്തേസു, ഇന്ദ്രിയാനി ജിനോബ്രവി;

ഏകേനൂനേസു അട്ഠേവ, ചത്താലീസമനേസു ച.

൧൧൯. ചത്താലീസായ ചിത്തേസു, നവകം നായകോബ്രവി;

ഏവം ഇന്ദ്രിയയോഗോപി, വേദിതബ്ബോ വിഭാവിനാ.

൧൨൦. അമഗ്ഗങ്ഗാനി നാമേത്ഥ, അട്ഠാരസ അഹേതുകാ;

ഝാനങ്ഗാനി ന വിജ്ജന്തി, വിഞ്ഞാണേസു ദ്വിപഞ്ചസു.

൧൨൧. ഏകം ചിത്തം ദുമഗ്ഗങ്ഗം, തിമഗ്ഗങ്ഗാനി സത്തസു;

ചത്താലീസായ ചിത്തേസു, മഗ്ഗോ സോ ചതുരങ്ഗികോ.

൧൨൨. പഞ്ചദ്ദസസു ചിത്തേസു, മഗ്ഗോ പഞ്ചങ്ഗികോ മതോ;

വുത്തോ ദ്വത്തിംസചിത്തേസു, മഗ്ഗോ സത്തങ്ഗികോപി ച.

൧൨൩. മഗ്ഗോ അട്ഠസു ചിത്തേസു, മതോ അട്ഠങ്ഗികോതി ഹി;

ഏവം തു സബ്ബചിത്തേസു, മഗ്ഗങ്ഗാനി സമുദ്ധരേ.

൧൨൪. ബലാനി ദ്വേ ദ്വിചിത്തേസു, ഏകസ്മിം തീണി ദീപയേ;

ഏകാദസസു ചത്താരി, ഛ ദ്വാദസസു നിദ്ദിസേ.

൧൨൫. ഏകൂനാസീതിയാ സത്ത, സോളസേവാബലാനി തു;

ചിത്തമേവം തു വിഞ്ഞേയ്യം, സബലം അബലമ്പി ച.

൧൨൬. ഝാനങ്ഗമഗ്ഗങ്ഗബലിന്ദ്രിയാനി,

ചിത്തേസു ജായന്തി ഹി യേസു യാനി;

മയാ സമാസേന സമുദ്ധരിത്വാ,

വുത്താനി സബ്ബാനിപി താനി തേസു.

ഇതി അഭിധമ്മാവതാരേ ചേതസികവിഭാഗനിദ്ദേസോ നാമ

തതിയോ പരിച്ഛേദോ.