ചതുത്ഥോ പരിച്ഛേദോ

൪. വീഥിപരികമ്മകഥാ

൧൨൬. പഠമാവജ്ജനം പഞ്ച-ദസന്നം പരതോ ഭവേ;

ദുതിയാവജ്ജനം ഹോതി, ഏകവീസതിതോ പരം.

൧൨൭. ഏകമ്ഹാ പഞ്ചവിഞ്ഞാണം, പഞ്ചമ്ഹാ സമ്പടിച്ഛനം;

സുഖസന്തീരണം ഹോതി, പഞ്ചവീസതിതോ പരം.

൧൨൮. സത്തതിംസതിതോ ഹോതി, ഉപേക്ഖാതീരണദ്വയം;

വോട്ഠബ്ബനസരൂപാനം, ദ്വിന്നം കാമജവാ പരം.

൧൨൯. മഗ്ഗാഭിഞ്ഞാ പരം ദ്വിന്നം, തിണ്ണന്നം ലോകിയപ്പനാ;

ഫലാ ചതുന്നം പഞ്ചന്നം, ഉപരിട്ഠഫലദ്വയം.

൧൩൦. ഭവന്തി ചത്താലീസമ്ഹാ, സുഖപാകാ ദ്വിഹേതുകാ;

തഥേകചത്താലീസമ്ഹാ, ഉപേക്ഖായ സമായുതാ.

൧൩൧. ഹോന്തി സത്തതിതോ കാമേ, സുഖപാകാ തിഹേതുകാ;

ദ്വാസത്തതിമ്ഹാ ജായന്തി, ഉപേക്ഖാസഹിതാ പന.

൧൩൨. ഏകൂനസട്ഠിതോ രൂപ-പാകാ പാകാ അരൂപിനോ;

കമാട്ഠചത്താലീസമ്ഹാ, തഥേകദ്വിതിഹീനതോ.

൧൩൩. പുബ്ബസങ്ഗഹമിച്ചേവം, വിഗണേത്വാ വിചക്ഖണോ;

പരസങ്ഗഹസങ്ഖ്യാദിം, വിഭാവേയ്യ വിസാരദോ.

൧൩൪. പഞ്ചദ്വാരാവജ്ജനതോ, ദസ ചിത്താനി ദീപയേ;

സേസാവജ്ജനതോ പഞ്ചചത്താലീസന്തി ഭാസിതം.

൧൩൫. പഞ്ചവിഞ്ഞാണതോ പാപവിപാകാ സമ്പടിച്ഛനാ;

പരമേകം ദ്വയം പുഞ്ഞവിപാകാ സമ്പടിച്ഛനാ.

൧൩൬. സന്തീരണാ ദ്വിഹേതുമ്ഹാ, പാകാ ദ്വാദസ ജായരേ;

തിഹേതുകാമപാകമ്ഹാ, ഏകവീസതി ലബ്ഭരേ.

൧൩൭. രൂപാവചരപാകമ്ഹാ, പരമേകൂനവീസതി;

നവട്ഠാരൂപപാകമ്ഹാ, സത്ത ഛാപി യഥാക്കമം.

൧൩൮. പടിഘമ്ഹാ തു സത്തേവ, സിതമ്ഹാ തേരസേരിതാ;

പാപപുഞ്ഞദ്വിഹേതുമ്ഹാ, ഏകവീസതി ഭാവയേ.

൧൩൯. ദ്വിഹേതുകാമക്രിയതോ, അട്ഠാരസ ഉപേക്ഖകാ;

സത്തരസ സുഖോപേതാ, വിഭാവേയ്യ വിചക്ഖണോ.

൧൪൦. കാമപുഞ്ഞതിഹേതുമ്ഹാ, തേത്തിംസേവ ഉപേക്ഖകാ;

തേപഞ്ഞാസ സുഖോപേതാ, ഭവന്തീതി പകാസിതം.

൧൪൧. തിഹേതുകാമക്രിയതോ, ചതുവീസതിപേക്ഖകാ;

സുഖിതമ്ഹാ തു ദീപേയ്യ, പഞ്ചവീസതി പണ്ഡിതോ.

൧൪൨. ദസരൂപജവമ്ഹേകാ-ദസദ്വാദസ തേരസ;

യഥാക്കമം പഞ്ചദസ, ആരുപ്പാ പരിദീപയേ.

൧൪൩. ഫലമ്ഹാ ചുദ്ദസേവാഹു, മഗ്ഗമ്ഹാ തു സകം ഫലം;

പരം സങ്ഗഹമിച്ചേവം, വിഗണേയ്യ വിസാരദോ.

൧൪൪. പുബ്ബാപരസമോധാന-മിതി ഞത്വാ തതോ പരം;

വത്ഥുവീഥിസമോധാനം, യഥാസമ്ഭവമുദ്ദിസേ.

൧൪൫. പഞ്ച വത്ഥൂനി നിസ്സായ, കമതോ പഞ്ചമാനസാ;

തേത്തിംസ പന നിസ്സായ, ഹദയം മാനസാ സിയും.

൧൪൬. കാമപാകമനോധാതു-ഹസിതുപ്പാദമാനസാ;

ദോസമൂലാനി മഗ്ഗോ ച, രൂപജ്ഝാനാവ സബ്ബഥാ.

൧൪൭. ദസാവസേസാപുഞ്ഞാനി, കാമപുഞ്ഞമഹാക്രിയാ;

വോട്ഠബ്ബാരൂപജവനം, സത്ത ലോകുത്തരാനി ച.

൧൪൮. ദ്വേചത്താലീസ ചിത്താനി, പഞ്ചവോകാരഭൂമിയം;

നിസ്സായ ഹദയം ഹോന്തി, അരൂപേ നിസ്സയം വിനാ.

൧൪൯. ആരുപ്പപാകാ ചത്താരോ, അനിസ്സായേതി സബ്ബഥാ;

വിത്ഥാരേനട്ഠധാ ഭിന്നം, സങ്ഖേപാ തിവിധം ഭവേ.

൧൫൦. തേചത്താലീസ നിസ്സായ, അനിസ്സായ ചതുബ്ബിധം;

നിസ്സിതാനിസ്സിതാ സേസാ, ദ്വേചത്താലീസ മാനസാ.

൧൫൧. പഞ്ച ചിത്തപ്പനാ ഹോന്തി, കമേനേകേകവീഥിയം;

മനോധാതുത്തികം നാമ, പഞ്ചദ്വാരികമീരിതം.

൧൫൨. സുഖതീരണവോട്ഠബ്ബ-പരിത്തജവനാ പന;

ഏകതിംസാപി ജായന്തേ, ഛസു വീഥീസു സമ്ഭവാ.

൧൫൩. മഹാപാകാ പനട്ഠാപി, ഉപേക്ഖാതീരണദ്വയം;

ഛസു ദ്വാരേസു ജായന്തി, ദസ മുത്താ ച വീഥിയാ.

൧൫൪. ചുതിസന്ധിഭവങ്ഗാനം, വസാ പാകാ മഹഗ്ഗതാ;

നവ വീഥിവിമുത്താതി, ദസധാ വീഥിസങ്ഗഹോ.

൧൫൫. ഏകദ്വാരികചിത്താനി, പഞ്ചഛദ്വാരികാ തഥാ;

ഛദ്വാരികവിമുത്താ ച, വിമുത്താതി ച സബ്ബഥാ.

൧൫൬. ഛത്തിംസ തയേകതിംസ, ദസ ചേവ നവേതി ച;

ഞത്വാ വീഥിസമോധാനം, ഗോചരഞ്ച സമുദ്ദിസേ.

൧൫൭. കമതോ പഞ്ചവിഞ്ഞാണാ, ലോകുത്തരമഹഗ്ഗതാ;

അഭിഞ്ഞാവജ്ജിതാ സബ്ബാ, പഞ്ചതാലീസ മാനസാ.

൧൫൮. യഥാസമ്ഭവതോ ഹോന്തി, രൂപാദേകേകഗോചരാ;

പഞ്ചഗോചരമീരേന്തി, മനോധാതുത്തികം പന.

൧൫൯. സന്തീരണമഹാപാകാ, പരിത്തജവനാനി ച;

വോട്ഠബ്ബനമഭിഞ്ഞാ ച, തേചത്താലീസ സമ്ഭവാ.

൧൬൦. ഛാരമ്മണേസു ഹോന്തീതി, അട്ഠധാ തിവിധാ പുന;

ഏകാരമ്മണചിത്താനി, പഞ്ചഛാരമ്മണാനി ച.

൧൬൧. സങ്ഖേപാ മാനസാ പഞ്ച-ചത്താലീസ തയോ തഥാ;

തേചത്താലീസ ചേവേതി, സത്തധാപി സിയും കഥം.

൧൬൨. കാമപാകമനോധാതു-ഹസിതുപ്പാദമാനസാ;

പഞ്ചവീസ യഥായോഗം, പരിത്താരമ്മണാ മതാ.

൧൬൩. കസിണുഗ്ഘാടിമാകാസം, പഠമാരുപ്പമാനസം;

തസ്സേവ നത്ഥിഭാവം തു, തതിയാരുപ്പകം തഥാ.

൧൬൪. ആലമ്ബിത്വാ പവത്തന്തി, ആരുപ്പാ കമതോ തതോ;

ദുതിയഞ്ച ചതുത്ഥഞ്ച, ഛ മഹഗ്ഗതഗോചരാ.

൧൬൫. അപ്പമാണസമഞ്ഞാ തേ, നിബ്ബാനേ പന ഗോചരേ;

അട്ഠ ലോകുത്തരാ ധമ്മാ, നിയമേന വവത്ഥിതാ.

൧൬൬. കസിണാസുഭകോട്ഠാസേ,

ആനാപാനേ ച യോഗിനോ;

പടിഭാഗനിമിത്തമ്ഹി,

അപ്പമഞ്ഞാനുയുഞ്ജതോ.

൧൬൭. സത്തപണ്ണത്തിയഞ്ചേവ, രൂപജ്ഝാനം പവത്തതി;

യഥാവുത്തനിമിത്തമ്ഹി, സേസമാരുപ്പകന്തി ച.

൧൬൮. അഭിഞ്ഞാവജ്ജിതാ ഏകവീസ മഹഗ്ഗതാ സബ്ബാ;

സബ്ബേ പണ്ണത്തിസങ്ഖാതേ, നവത്തബ്ബേ പവത്തരേ.

൧൬൯. ജായന്താകുസലാ ഞാണവിപ്പയുത്തജവാ തഥാ;

അപ്പമാണം വിനാ വീസ, പരിത്താദീസു തീസുപി.

൧൭൦. തിഹേതുകാമപുഞ്ഞാനി, പുഞ്ഞാഭിഞ്ഞാ ച പഞ്ചിമേ;

ചതൂസുപി പവത്തന്തി, അരഹത്തദ്വയം വിനാ.

൧൭൧. ക്രിയാഭിഞ്ഞാ ച വോട്ഠബ്ബം, ക്രിയാകാമേ തിഹേതുകാ;

ഛ സബ്ബത്ഥാപി ഹോന്തീതി, സത്തധാ മാനസാ ഠിതാ.

൧൭൨. ഏകതിച്ചതുകോട്ഠാസഗോചരാ തിവിധാ പന;

സമസട്ഠി തഥാ വീസ, കമേനേകാദസേതി ച.

൧൭൩. പഞ്ചദ്വാരേസു പഞ്ചാപി, പച്ചുപ്പന്നാവ ഗോചരാ;

തേകാലികാ നവത്തബ്ബാ, മനോദ്വാരേ യഥാരഹം.

൧൭൪. അജ്ഝത്താ ച ബഹിദ്ധാ ച, പഞ്ചദ്വാരേസു ഗോചരാ;

മനോദ്വാരേ നവത്തബ്ബോ, നത്ഥിഭാവോപി ലബ്ഭതി.

൧൭൫. പഞ്ചദ്വാരേസു പഞ്ചന്ന-മേകമേകോ ച ഗോചരോ;

ഛാപി ആരമ്മണാ ഹോന്തി, മനോദ്വാരമ്ഹി സബ്ബഥാ.

൧൭൬. പഞ്ചദ്വാരേസു ഗഹിതം, തദഞ്ഞമ്പി ച ഗോചരം;

മനോദ്വാരേ വവത്ഥാനം, ഗച്ഛതീതി ഹി ദേസിതം.

൧൭൭. അതീതാ വത്തമാനാ ച, സമ്ഭവാ കാമസന്ധിയാ;

ഛദ്വാരഗഹിതാ ഹോന്തി, തിവിധാ തേപി ഗോചരാ.

൧൭൮. കമ്മനിമിത്തമേവേകം, മനോദ്വാരേ ഉപട്ഠിതം;

നവത്തബ്ബമതീതഞ്ച, ധമ്മാരമ്മണസങ്ഗഹം.

൧൭൯. ആലമ്ബിത്വാ യഥായോഗം, പടിസന്ധിമഹഗ്ഗതാ;

അന്തേ ചുതി ഭവേ മജ്ഝേ, ഭവങ്ഗമ്പി പവത്തതീതി.

ഇതി ചിത്തവിഭാഗേ വീഥിപരികമ്മകഥാ നിട്ഠിതാ.

ചതുത്ഥോ പരിച്ഛേദോ.