ഛബ്ബിസതിമോ പരിച്ഛേദോ

൨൬. വുട്ഠാനവിസുദ്ധികഥാ

൧൦൧൯. തസ്സേവം പടിപന്നസ്സ, സിഖാപത്താ വിപസ്സനാ;

വുട്ഠാനഗാമിനീ നാമ, യദാ ഹോതി തദാ പന.

൧൦൨൦. പരികമ്മോപചാരാനുലോമഗോത്രഭുതോ പരം;

മഗ്ഗോ തതോ ഫലം ഹോതി, ഭവങ്ഗാ പച്ചവേക്ഖണാ.

൧൦൨൧. പരികമ്മോപചാരാനുലോമസങ്ഖാതഗോചരാ;

മഗ്ഗസ്സാവജ്ജനം ഹുത്വാ, നിബ്ബാനേ ഹോതി ഗോത്രഭു.

൧൦൨൨. ചതുത്ഥം പഞ്ചമം വാഥ, ഛട്ഠം വാപി യഥാരഹം;

അപ്പേതി മഗ്ഗജവനം, നിബ്ബാനേ സകിമേവ തം.

൧൦൨൩. തതോ ഫലാനി തീണി ദ്വേ, ഏകം വാഥ യഥാക്കമം;

മഗ്ഗാവസേസനിരോധമഗ്ഗവുട്ഠാനവീഥിയം.

൧൦൨൪. തതോ ഭവങ്ഗപാതോവ,

തം ഛേത്വാ പച്ചവേക്ഖണാ;

തിസ്സോ പഞ്ചവിധാ ഹോന്തി,

യഥായോഗം തഥാ ഹി ച.

൧൦൨൫. മഗ്ഗം ഫലഞ്ച നിബ്ബാനം, അവസ്സം പച്ചവേക്ഖതി;

ഹീനേ കിലേസേ സേസേ ച, പച്ചവേക്ഖതി വാ ന വാ.

൧൦൨൬. തതോ ച പുന സങ്ഖാരേ, വിപസ്സന്തോ യഥാ പുരേ;

അപ്പേതി അനുപുബ്ബേന, സേസമഗ്ഗഫലാനി ച.

൧൦൨൭. തത്ഥ വുച്ചന്തി നിബ്ബാന-ഫലമഗ്ഗവിപസ്സനാ;

സുഞ്ഞതാ ചാനിമിത്താ ച, തഥാപണിഹിതാനി ച.

൧൦൨൮. സുഞ്ഞതാവിപസ്സനാദിനാമേന ഹി വിപസ്സതി;

വിമോക്ഖമുഖഭൂതാതി, തിവിധാ ഭാജിതാ തഥാ.

൧൦൨൯. സുഞ്ഞതാദികനാമേന, വിമോക്ഖാ തിവിധാ മതാ;

നിബ്ബാനഫലമഗ്ഗാ ച, സമാപത്തിസമാധയോ.

൧൦൩൦. തത്ഥേവ പഠമഭൂമിം, പത്തോ അരിയപുഗ്ഗലോ;

സത്തക്ഖത്തുപരമോ സോ, സോതാപന്നോതി വുച്ചതി.

൧൦൩൧. പത്തോ ദുതിയഭൂമിഞ്ച, സകദാഗാമിനാമകോ;

സകിമേവ ഇമം ലോകം, ആഗന്ത്വാ ഹോതി മാനുസം.

൧൦൩൨. പത്തോ തതിയഭൂമിഞ്ച, അനാഗാമീതി വുച്ചതി;

ബ്രഹ്മലോകാ അനാഗന്ത്വാ, ഇധകാമോപപത്തിയാ.

൧൦൩൩. പത്തോ ചതുത്ഥഭൂമിഞ്ച, അരഹാ അഗ്ഗപുഗ്ഗലോ;

ദിട്ഠേവ ധമ്മേ ദുക്ഖഗ്ഗിം, നിബ്ബാപേതീതി വുച്ചതി.

൧൦൩൪. ഇതി മഗ്ഗഫലട്ഠാനം, വസാ അരിയപുഗ്ഗലാ;

ദ്വിധാപി ചതുധാ യുഗ്ഗാ, അട്ഠ ഹോന്തി വിഭാഗതോ.

൧൦൩൫. ഉഭതോഭാഗവിമുത്ത-

വിഭാഗാദിവസാ പന;

വിഭത്താ ഹോന്തി സത്തേതേ,

യഥായോഗം തഥാ ഹി ച.

൧൦൩൬. സദ്ധാധുരസ്സാനിച്ചതോ, വുട്ഠാനം ദുക്ഖതോപി ച;

പഞ്ഞാധുരസ്സാനത്തതോ, ഇതി ദീപേന്തി പണ്ഡിതാ.

൧൦൩൭. സദ്ധാനുസാരി ആദിമ്ഹി, മജ്ഝേ സദ്ധാവിമുത്തകോ;

അന്തേ പഞ്ഞാവിമുത്തോവ, തസ്മാ സദ്ധാധുരോ സിയാ.

൧൦൩൮. ധമ്മാനുസാരി ആദിമ്ഹി, ദിട്ഠിപ്പത്തോ തതോപരി;

അന്തേ പഞ്ഞാവിമുത്തോവ, ഹോതി പഞ്ഞാധുരോപി ച.

൧൦൩൯. സമഥയാനികാ ചേവ, രൂപാനുത്തരപാദകാ;

വിപസ്സനായാനികാ ച, സബ്ബേ സുക്ഖവിപസ്സകാ.

൧൦൪൦. ധുരവുട്ഠാനഭേദേന, ഹോന്തി പഞ്ചേവ സബ്ബഥാ;

ആരുപ്പപാദകാ ചാപി, ആദിമ്ഹി ദുവിധാ തഥാ.

൧൦൪൧. ഛസു ഠാനേസു മജ്ഝകേ, കായസക്ഖീതി ഭാജിതാ;

ഉഭതോഭാഗവിമുത്തോ, അരഹത്തേ പതിട്ഠിതോ.

൧൦൪൨. ഇത്ഥം വുത്തയാനധുര-വുട്ഠാനാനം വിഭാഗതോ;

മഗ്ഗപ്ഫലഭൂമിയോ ച, സത്തട്ഠാരിയപുഗ്ഗലാ.

൧൦൪൩. തത്ഥ ചാനുത്തരഞാണം, സച്ചാനം പടിവേധകം;

സമുച്ഛേദപ്പഹാനേന, ക്ലേസാനുസയസോധനം.

൧൦൪൪. ചതുമഗ്ഗവിഭാഗേന, വുട്ഠാനന്തി പകിത്തിതം;

ഞാണദസ്സനവിസുദ്ധി, നാമ ഹോതി തഥാപി ച.

൧൦൪൫. മഗ്ഗോ ച പരിജാനാതി, ദുക്ഖം തേഭൂമകം തഥാ;

യഥായോഗം പജഹതി, തണ്ഹാസമുദയമ്പി ച.

൧൦൪൬. നിരോധം സച്ഛികരോതി, മഗ്ഗസച്ചമനുത്തരം;

ഭാവനാവീഥിമോതിണ്ണോ, ഭാവേതീതി പവുച്ചതി.

൧൦൪൭. ദിട്ഠിഗ്ഗതവിചികിച്ഛാ-സീലബ്ബതമസേസതോ;

അപായഗമനീയഞ്ച, രാഗദോസാദികത്തയം.

൧൦൪൮. തദേകട്ഠേ കിലേസേ ച, സഹജാതപ്പഹാനതോ;

പജഹാതി സോതാപത്തി-മഗ്ഗോ പഠമഭൂമികോ.

൧൦൪൯. തദേകട്ഠേ പജഹതി, രാഗദോസാദികേപി ച;

ഥൂലേ തു സകദാഗാമി-മഗ്ഗോ ദുതിയഭൂമികോ.

൧൦൫൦. പജഹാതി അനാഗാമി-മഗ്ഗോ നിരവസേസതോ;

കാമരാഗബ്യാപാദേ ച, തദേകട്ഠേ ച സമ്ഭവാ.

൧൦൫൧. രൂപാരൂപരാഗമാനു-ദ്ധച്ചാവിജ്ജാതി പഞ്ചകം;

അഗ്ഗമഗ്ഗോ പജഹതി, ക്ലേസേ സേസേ ച സബ്ബഥാ.

൧൦൫൨. ഇതി സച്ചപടിവേധം, ക്ലേസക്ഖയഫലാവഹം;

മഗ്ഗഞാണം പകാസേന്തി, വിസുദ്ധിം സത്തമം ബുധാ.

൧൦൫൩. ഛബ്ബിസുദ്ധികമേനേവം, സബ്ബഥായ വിസുദ്ധിയാ;

സത്തമായാനുപത്തബ്ബം, നിബ്ബാനന്തി പവുച്ചതി.

൧൦൫൪. ക്ലേസക്ഖയകരം താണം, സംസാരാതിക്കമം പരം;

പാരിമം തീരമഭയം, സബ്ബസങ്ഖാരനിസ്സടം.

൧൦൫൫. തേനമ്മദനിമ്മദനം, പിപാസവിനയാദിനാ;

ക്ലേസസംസാരസങ്ഖാര-പടിപക്ഖനിദസ്സിതം.

൧൦൫൬. അജരാമരമച്ചന്ത-മനുപ്പാദമസങ്ഖതം;

അനുത്തരമസങ്ഖാരം, അനന്തമതുലഞ്ച തം.

൧൦൫൭. പരമത്ഥമനോപമ്മം, സന്തി അപ്പടിമം സുഖം;

നിരോധസച്ച നിബ്ബാനം, ഏകന്തം അമതം പദം.

൧൦൫൮. സോപാദിസേസനിബ്ബാന-ധാതു ചേവ തഥാപരാ;

അനുപാദിസേസാ ചേതി, ദുവിധാ പരിയായതോ.

൧൦൫൯. സുഞ്ഞതം ചാനിമിത്തഞ്ച, തഥാപണിഹിതന്തി ച;

അത്താദിഗാഹാഭാവേന, തിവിധാപി ച ഭാജിതം.

൧൦൬൦. ക്ലേസസംസാരസങ്ഖാര-പച്ചനീകവിഭാഗതോ;

ഭവക്ഖയാദിഭേദേഹി, ബഹുധാപി പവുച്ചതി.

൧൦൬൧. തദേവമച്ചുതം ധമ്മം, ലോകുത്തരമകാലികം;

വാനാഭാവാ വാനാതീതോ, ‘‘നിബ്ബാന’’ന്തി പകിത്തിതം.

ഇതി നിബ്ബാനവിഭാഗേ വുട്ഠാനവിസുദ്ധികഥാ നിട്ഠിതാ.

ഛബ്ബീസതിമോ പരിച്ഛേദോ.

നിട്ഠിതോ ച സബ്ബഥാപി നിബ്ബാനവിഭാഗോ.