ചുദ്ദസമോ പരിച്ഛേദോ

൧൪. രാസിസമ്ഭവകഥാ

൪൯൦. നവേവ യേവാപനകാ, അട്ഠാരസ ച രാസയോ;

നവഭിംസതിസമ്ഭിന്നാ, ദസ ദ്വേ സവിഭത്തികാ.

൪൯൧. ഏകദ്വയതിചതുഛസത്തട്ഠാനാനവജ്ജകേ;

സത്തവീസതി സത്തേകോ, ദ്വയമേകോ പുനേകകോ.

൪൯൨. ദസേവ യേവാപനകാ, ഏകാദസ ച രാസയോ;

അട്ഠവീസതിസമ്ഭിന്നാ, ദസേവ സവിഭത്തികാ.

൪൯൩. ഏകദ്വയതിചതുക്കഛട്ഠാനനിയതാ പന;

അട്ഠാരസ ച സത്തേകോ, ഏകോ ചേകോവ പാപകേ.

൪൯൪. ദ്വേ യേവാപനകാ ഹോന്തി, രാസയോ ച ചതുബ്ബിധാ;

തേരസേത്ഥ അസമ്ഭിന്നാ, തയോവ സവിഭത്തികാ.

൪൯൫. ഏകദ്വയതികട്ഠാനാ, ദസ ദ്വേകോ അഹേതുകേ;

ഇച്ചാനവജ്ജാ സാവജ്ജാ-ഹേതുകേ യോഗനിച്ഛയോ.

൪൯൬. സത്താപി നത്ഥി സാവജ്ജേ, നിരവജ്ജേ പകാസകോ;

അഹേതുകേ ച മഗ്ഗാദിരാസയോ നത്ഥി ചുദ്ദസ.

൪൯൭. അനവജ്ജാ തു സാവജ്ജേ, സാവജ്ജകാനവജ്ജകേ;

ചിത്തുപ്പാദമ്ഹി നത്ഥേവ, നത്ഥോഭയമഹേതുകേ.

൪൯൮. സാവജ്ജാ പന സാവജ്ജേ, അനവജ്ജാനവജ്ജകേ;

ഗഹേതബ്ബാ തു സബ്ബത്ഥ, സാധാരണാ പകിണ്ണകാ.

൪൯൯. ഝാനപഞ്ചകചിത്തേസു, സത്തസട്ഠിസു നിദ്ദിസേ;

ഝാനങ്ഗയോഗഭേദേന, രാസിഭേദം തഹിം തഹിം.

൫൦൦. ചതുഛക്കാനവജ്ജേസു, ഞാണപീതികതം തഥാ;

ചതുവീസ പരിത്തേസു, ചതുധാ ഭേദമുദ്ദിസേ.

൫൦൧. സരാഗവീതരാഗാനം, അപ്പമഞ്ഞാപവത്തിയം;

കരുണാമുദിതാ ഹോന്തി, കാമപുഞ്ഞമഹാക്രിയേ.

൫൦൨. ഉപചാരപ്പനാപത്താ, സുഖിതാ സത്തഗോചരാ;

തസ്മാ ന പഞ്ചമാരുപ്പേ, മഹാപാകേ അനുത്തരേ.

൫൦൩. സോതാപതിതുപേക്ഖാസു, പരികമ്മാദിസമ്ഭവേ;

ഝാനാനം തുല്യപാകത്താ, തപ്പാകേസു ച ലബ്ഭരേ.

൫൦൪. വിരതീ ച സരാഗാനം, വീതിക്കമനസമ്ഭവാ;

സമ്പത്തേ ച സമാദാനേ, കാമപുഞ്ഞേസു ലബ്ഭരേ.

൫൦൫. തംതംദ്വാരികദുസ്സില്യ-ചേതനുച്ഛേദകിച്ചതോ;

മഗ്ഗേ ച തുല്യപാകത്താ, ഫലേ ച നിയതാ സിയും.

൫൦൬. പവത്താകാരവിസയഭിന്നാ പഞ്ചാപി സമ്ഭവാ;

ലോകിയേ ലബ്ഭമാനാപി, വിസും ചേവ സിയും ന വാ.

൫൦൭. പാപാ ലബ്ഭന്തി പാപേസു, സത്ത ഛക്കേകകാ കമാ;

സരൂപയേവോഭയകാ, നിയതട്ഠ ഛളേതരേ.

൫൦൮. സാധാരണാ ച സബ്ബത്ഥ, യഥാവുത്താ പകിണ്ണകാ;

തത്ഥ ചേകഗ്ഗതാ നത്ഥി, ഇന്ദ്രിയാദീസു കങ്ഖിതേ.

൫൦൯. ഛന്ദാധിമോക്ഖാ യേവാപി, വീസേകാദസവജ്ജിതേ;

ഉദ്ധച്ചമേകാദസസു, മജ്ഝത്തമനവജ്ജകേ.

൫൧൦. സബ്ബത്ഥ മനസികാരോ, തിദ്വേകദ്വിതികാപരേ;

അട്ഠട്ഠവീസചതൂസു, പഞ്ചദ്വീസു യഥാക്കമം.

൫൧൧. സമുദായവസേനേത്ഥ, ഉദ്ധച്ചവിരതിത്തയം;

സവിഭത്തികമഞ്ഞത്ഥ, അവിഭത്തികമേവ തം.

൫൧൨. ചിത്തുപ്പാദേസു തേനേതം, വിഭത്തിഅവിഭത്തികം;

ഇതി സാധു സല്ലക്ഖേയ്യ, സമ്ഭവാസമ്ഭവം ബുധോതി.

ഇതി ചേതസികവിഭാഗേ രാസിസമ്ഭവകഥാ നിട്ഠിതാ.

ചുദ്ദസമോ പരിച്ഛേദോ.