൧൦. പഭേദകഥാ

൩൫൨. ഏകുപ്പാദാ നിരോധാ ച, ഏകാലമ്ബണവത്ഥുകാ;

സഹഗതാ സഹജാതാ, സംസട്ഠാ സഹവുത്തിനോ.

൩൫൩. തേപഞ്ഞാസ പനിച്ചേതേ, സമ്പയുത്താ യഥാരഹം;

ചിത്തചേതസികാ ധമ്മാ, അട്ഠാരസവിധാപി ച.

൩൫൪. ഏകധാ ഛബ്ബിധാ ചേവ, ചതുധാ സത്തധാ ഠിതാ;

ചിത്തുപ്പാദപഭേദേന, ഭിന്ദിതബ്ബാ വിഭാവിനാ.

൩൫൫. അട്ഠ ധമ്മാവിനിബ്ഭോഗാ, ഭിന്നാസീതി നവുത്തരാ;

സത്തസതം ദസ ദ്വേ ച, സബ്ബേ ഹോന്തി സമിസ്സിതാ.

൩൫൬. സന്തീരണമനോധാതു, സിതവോട്ഠബ്ബനാ തഥാ;

അപുഞ്ഞാ കാമപുഞ്ഞാ ച, മഹാപാകാ മഹാക്രിയാ.

൩൫൭. പഠമജ്ഝാനധമ്മാ ച, ലോകുത്തരമഹഗ്ഗതാ;

പഞ്ചപഞ്ഞാസ സബ്ബേപി, വിതക്കാ ഹോന്തി ഭേദിതാ.

൩൫൮. വിചാരാപി ച തേയേവ, ദുതിയജ്ഝാനനാമകാ;

ഏകാദസാപരേ ചേതി, ഛസട്ഠി പരിദീപിതാ.

൩൫൯. അപുഞ്ഞാ കാമപുഞ്ഞാ ച, മഹാപാകാ മഹാക്രിയാ;

ചതുക്കാ ചേവ ചത്താരോ, സിതഞ്ച സുഖതീരണം.

൩൬൦. പഠമാദിതികജ്ഝാനാ, ലോകുത്തരമഹഗ്ഗതാ;

ഇച്ചേവമേകപഞ്ഞാസ, പീതിയോ ഹോന്തി സബ്ബഥാ.

൩൬൧. സിതവോട്ഠബ്ബനാ ദ്വേ ച, സാവജ്ജാ ചാനവജ്ജകാ;

ഭിന്നമേവം തു വീരിയം, തേസത്തതിവിധം ഭവേ.

൩൬൨. സാവജ്ജാ ചാനവജ്ജാ ച, മോമൂഹദ്വയവജ്ജിതാ;

ഛന്ദാ ഭവന്തി സബ്ബേപി, സട്ഠിഭേദാ നവുത്തരാ.

൩൬൩. സന്തീരണമനോധാതു, സിതവോട്ഠബ്ബനാ തഥാ;

സാവജ്ജാ ചാനവജ്ജാ ച, വിചികിച്ഛാവിവജ്ജിതാ.

൩൬൪. അധിമോക്ഖാ പനിച്ചേവം, അട്ഠസത്തതി ഭേദിതാ;

തിസതം നവുതി ദ്വേ ച, ഭിന്നാ ഹോന്തി പകിണ്ണകാ.

൩൬൫. ഏകൂനസട്ഠി വാ ഹോന്തി, സദ്ധാദേകൂനവീസതി;

സഹസ്സഞ്ച സതഞ്ചേകം, ഏകവീസഞ്ച സബ്ബഥാ.

൩൬൬. ഞാണേന സമ്പയുത്താ ച, കാമേ ദ്വാദസധാപരേ;

പഞ്ചതിംസാതി പഞ്ഞാപി, സത്തതാലീസധാ കഥാ.

൩൬൭. രൂപജ്ഝാനചതുക്കാ ച, കാമപുഞ്ഞാ മഹാക്രിയാ;

അട്ഠവീസപ്പമഞ്ഞേവം, ഛപ്പഞ്ഞാസ ഭവന്തി ച.

൩൬൮. അനുത്തരാ കാമപുഞ്ഞാ, തിസ്സോ വിരതിയോ പന;

ഹോന്തി സോളസധാ ഭിന്നാ, അട്ഠതാലീസ പിണ്ഡിതാ.

൩൬൯. പഞ്ചവീസാനവജ്ജേവം, സമ്പയുത്താ ചതുബ്ബിധാ;

സഹസ്സദ്വിസതഞ്ചേവ, ദ്വി ച സത്തതി ഭേദതോ.

൩൭൦. ചത്താരോ പാപസാമഞ്ഞാ, ഭിന്നാ ദ്വാദസധാ പന;

അട്ഠതാലീസധാ ഹോന്തി, തേ സബ്ബേ പരിപിണ്ഡിതാ.

൩൭൧. ലോഭോ പനട്ഠധാ ഭിന്നോ, ഥിനമിദ്ധഞ്ച പഞ്ചധാ;

ചതുധാ ദിട്ഠിമാനോ ച, ചതുധാ ദിട്ഠിയോ വിസും.

൩൭൨. ദ്വിധാ ദോസാദിചത്താരോ, വിചികിച്ഛേകധാതി ച;

സാവജ്ജാ സത്തധാ വുത്താ, ഭിന്നാസീതി തികുത്തരാ.

൩൭൩. ഇച്ചട്ഠാരസധാ വുത്താ, തേപഞ്ഞാസാപി ഭേദതോ;

ദ്വിസഹസ്സഞ്ച തു സതം, ഭവന്തേകൂനസട്ഠി ച.

൩൭൪. വിതക്കവിചാരപീതിസുഖോപേക്ഖാസു പഞ്ചസു;

ഭിന്ദിത്വാ ഝാനഭേദേന, ഗഹേതബ്ബാ അനുത്തരാ.

൩൭൫. അഞ്ഞത്ര പന സബ്ബത്ഥ, നത്ഥി ഭേദപ്പയോജനം;

അട്ഠേവ കസ്മാ ഗയ്ഹന്തി, അഭേദേനാതി ലക്ഖയേ.

൩൭൬. പഠമാദിചതുജ്ഝാനാ, ലോകുത്തരമഹഗ്ഗതാ;

ഇച്ചേകമേകദസധാ, ചതുതാലീസ പിണ്ഡിതാ.

൩൭൭. തേവീസ പഞ്ചമാ ചേതി, സത്തസട്ഠി സമിസ്സിതാ;

അപ്പനാ തത്ഥ സബ്ബാപി, അട്ഠപഞ്ഞാസ ദീപിതാ.

൩൭൮. പഞ്ചതിംസേവ സങ്ഖേപാ, ലോകുത്തരമഹഗ്ഗതാ;

അപ്പനാ തത്ഥ സബ്ബാപി, ഛബ്ബീസതി പകാസിതാ.

൩൭൯. ഇദ്ധിവിധം ദിബ്ബസോതം, ചേതോപരിയനാമകാ;

പുബ്ബേനിവാസാനുസ്സതി, ദിബ്ബചക്ഖൂതി പഞ്ചധാ.

൩൮൦. അഭിഞ്ഞാഞാണമീരേന്തി, രൂപാവചരപഞ്ചമാ;

കുസലഞ്ച ക്രിയാ ചേതി, ഭേദിതം ദുവിധമ്പി ച.

൩൮൧. തം ദ്വയമ്പി സമ്മിസ്സേത്വാ, പഞ്ചാഭിഞ്ഞാ ച ലോകിയാ;

ആസവക്ഖയഞാണഞ്ച, ഛളഭിഞ്ഞാ പവുച്ചരേ.

൩൮൨. ലോകിയാ ച ദസാഭിഞ്ഞാ, ഭിന്ദിത്വാ കുസലക്രിയാ;

സത്തസത്തതി ഝാനാനി, അട്ഠസട്ഠി പനപ്പനാ.

൩൮൩. സത്തസത്തതി ചിത്താനി, ചതുപഞ്ഞാസ സബ്ബഥാ;

പചിതാനി ച ചിത്താനി, ഏകതിംസസതം സിയുന്തി.

ഇതി ചേതസികവിഭാഗേ പഭേദകഥാ നിട്ഠിതാ.

ദസമോ പരിച്ഛേദോ.