൧൨. ദ്വാദസമോ പരിച്ഛേദോ

ദസാവത്ഥാവിഭാഗോ

൧൬൪൨. ഇച്ചട്ഠാരസധാ ഭിന്നാ, പടിപക്ഖപ്പഹാനതോ;

ലക്ഖണാകാരഭേദേന, തിവിധാപി ച ഭാവനാ.

൧൬൪൩. കലാപതോ സമ്മസനം, ഉദയബ്ബയദസ്സനം;

ഭങ്ഗേ ഞാണം ഭയേ ഞാണം, ഞാണമാദീനവേപി ച.

൧൬൪൪. തഥേവ നിബ്ബിദാഞാണം, ഞാണം മുച്ചിതുകമ്യതാ;

പടിസങ്ഖാ ച സങ്ഖാരു-പേക്ഖാഞാണാനുലോമകം.

൧൬൪൫. ഇച്ചാവത്ഥാപഭേദേന, ദസധാപി വിഭാവിതാ;

സഭാഗത്ഥവിസേസേന, തിധാ സങ്ഗഹിതാ പുന.

൧൬൪൬. യഥാഭൂതം നാമ ഞാണത്തയം സമ്മസനാദികം;

ഭയാദിഞാണം തിവിധം, നിബ്ബിദാതി പവുച്ചതി.

൧൬൪൭. തഥാ മുച്ചിതുകാമാദി, വിരാഗോവ ചതുബ്ബിധം;

ലക്ഖണത്തയനിജ്ഝാനവസേന പുന വുട്ഠിതാ.

൧൬൪൮. സുഞ്ഞതഞ്ചാനിമിത്തഞ്ച, തഥാപ്പണിഹിതന്തി ച;

സാധേതി മഗ്ഗസങ്ഖാതം, വിമോക്ഖത്തയമുത്തമം.

൧൬൪൯. ഇതി ഭാവേതുകാമസ്സ, വിഭാവേതി യഥാക്കമം;

ദസാവത്ഥാവിഭാഗേന, സമാദായ യഥാ കഥം.

൧൬൫൦. വിസുദ്ധോ പഠമം താവ, സാധു സീലവിസുദ്ധിയാ;

ഉപചാരപ്പനായഞ്ച, ഠത്വാ ചിത്തവിസുദ്ധിയം.

൧൬൫൧. സപ്പച്ചയം പരിഗ്ഗയ്ഹ, നാമരൂപം സഭാവതോ;

ദിട്ഠികങ്ഖാവിതരണം, പത്വാ സുദ്ധിം തതോ പരം.

൧൬൫൨. അതീതാനാഗതേ ഖന്ധേ, പച്ചുപ്പന്നേ ച സാസവേ;

കലാപതോ സമ്മസിത്വാ, സമ്മസേയ്യ തിലക്ഖണം.

൧൬൫൩. ആദാനനിക്ഖേപനതോ,

വയോവുദ്ധത്ഥഗാമിതോ;

ആഹാരതോപി ഉതുതോ,

കമ്മതോ ചാപി ചിത്തതോ.

൧൬൫൪. ധമ്മതാരൂപതോ ചാപി, രൂപസത്തകതോ നയേ;

കലാപതോ യമകതോ, ഖണികാ പടിപാടിതോ.

൧൬൫൫. ദിട്ഠിമുഗ്ഘാടയന്തോ ച, മാനമുഗ്ഘാടയം തഥാ;

നികന്തിപരിയാദാനോ, നാമസത്തകതോ നയേ.

൧൬൫൬. നിച്ചാ ചേ ന നിരുജ്ഝേയ്യും, ന ബാധേയ്യും സുഖാ യദി;

വസേ വത്തേയ്യുമത്താ ചേ, തദഭാവാ ന താദിസാ.

൧൬൫൭. സമ്ഭവന്തി ഹി സങ്ഖാരാ, സതി പച്ചയസമ്ഭവേ;

തതോ പച്ചയനിപ്ഫന്നാ, അവസ്സം ഭേദഗാമിനോ.

൧൬൫൮. തദനിച്ചാ ഖയട്ഠേന, ദുക്ഖാ നാമ ഭയട്ഠതോ;

അനത്താസാരകട്ഠേന, സങ്ഖാരാതി വിഭാവയം.

൧൬൫൯. കാലേന സമ്മസേ രൂപം, നാമം കാലേന സമ്മസേ;

അജ്ഝത്തഞ്ച ബഹിദ്ധാ ച, സമാസബ്യാസതോ തതോ.

൧൬൬൦. യഥോപട്ഠിതഭേദേന, സമ്മസന്തോ സമൂഹതോ;

കലാപതോ സമ്മസനമിതി ഭാവേതി പണ്ഡിതോ.

൧൬൬൧. തസ്സേവം സമ്മസന്തസ്സ, കമ്മഞ്ഞം ഹോതി മാനസം;

സൂപട്ഠന്തി ച സങ്ഖാരാ, വോദായതി ച ഭാവനാ.

൧൬൬൨. തതോ പരം വിപസ്സന്തോ, പരിഗ്ഗണ്ഹാതി പണ്ഡിതോ;

പച്ചുപ്പന്നസഭാവാനം, ഖന്ധാനമുദയബ്ബയം.

൧൬൬൩. തണ്ഹാസമ്മോഹകമ്മേഹി,

ഖന്ധപഞ്ചകസഭാവോ;

രൂപമാഹാരതോ ഹോതി,

ഫസ്സതോ വേദനാദയോ.

൧൬൬൪. വിഞ്ഞാണം നാമരൂപമ്ഹാ, സമ്ഭോതീതി ച പസ്സതോ;

തസ്സ പച്ചയതോ ഹോതി, ഖന്ധേസുദയദസ്സനം.

൧൬൬൫. തണ്ഹാദീനം നിരോധാ ച,

നിരോധോ ഹോതി പസ്സതോ;

തഥാ വീസതിധാ ഹോതി,

തത്ഥേവ വയദസ്സനം.

൧൬൬൬. നിബ്ബത്തിവിപരിണാമലക്ഖണം പന പസ്സതോ;

ഖണതോ ദസധാ നേസമുദയബ്ബയദസ്സനം.

൧൬൬൭. ഇത്ഥം പഞ്ഞാസധാ ഭേദോ,

ഖന്ധാനമുദയബ്ബയോ;

ആയതനാദിഭേദോപി,

യോജേതബ്ബോ യഥാരഹം.

൧൬൬൮. തദേവമനുപസ്സന്തോ, ഖന്ധായതനധാതുയോ;

അനിച്ചാ ദുക്ഖാനത്താതി, ഭാവേതി ബഹുധാ ബുധോ.

൧൬൬൯. ഭാവനാപസുതസ്സേവം, പസ്സതോ ബോധിപക്ഖിയാ;

പാതുഭൂതാ പവത്തന്തി, വിസേസേന വിസാരദാ.

൧൬൭൦. സലക്ഖണപരിച്ഛിന്നേ, തിലക്ഖണവവത്ഥിതേ;

ഛന്ദോ സാസവസങ്ഖാരേ, സാരദം പരിയേസതി.

൧൬൭൧. തത്ഥ പുബ്ബങ്ഗമം ഹുത്വാ, സംപക്ഖന്ദതി മാനസം;

സങ്കപ്പോഭിനിരോപേതി, ആഹരന്തോ പുനപ്പുനം.

൧൬൭൨. യഥാവത്ഥുസഭാവേന, തതോ സദ്ധാധിമുച്ചതി;

സതി സൂപട്ഠിതാ ഹോതി, പരിഗ്ഗയ്ഹ സഭാവതോ.

൧൬൭൩. പഞ്ഞാ സമ്പടിവിജ്ഝന്തീ, സമാഹച്ച വിപസ്സതി;

പഗ്ഗഹേത്വാന വായാമോ, പടിപാദേതി ഭാവനം.

൧൬൭൪. തതോ പീതിമനോ ഹോതി, നിപ്ഫാദിതമനോരഥോ;

പാമോജ്ജബഹുലോ ഹുത്വാ, പസ്സദ്ധദരഥോ പന.

൧൬൭൫. വിക്ഖേപുദ്ധച്ചനിത്തിണ്ണോ, സമാധിയതി നിച്ചലോ;

ഉപേക്ഖാ ഭാവനാവീഥിം, അധിട്ഠാതി തതോ പരം.

൧൬൭൬. ആരുള്ഹയോഗ്ഗാചരിയോ, ആജാനീയരഥോ വിയ;

വാതാഭാവേ പദീപോവ, പസന്നേകമുഖട്ഠിതാ.

൧൬൭൭. സുഖുമാ നിപുണാകാരാ, ഖുരധാരാഗതാ വിയ;

ഗണ്ഹന്തീ ഭാവനാഗബ്ഭം, പവഡ്ഢതി വിപസ്സനാ.

൧൬൭൮. സമ്പത്തപടിവേധസ്സ,

തസ്സേവം തം വിപസ്സതോ;

ജായതേകോ ഉപക്ലേസോ,

ദസോപക്ലേസവത്ഥുകാ.

൧൬൭൯. ഓഭാസോ പീതി പസ്സദ്ധി, അധിമോക്ഖോ ച പഗ്ഗഹോ;

സുഖം ഞാണമുപട്ഠാനമുപേക്ഖാ ച നികന്തി ച.

൧൬൮൦. ജാതേസ്വേതേസു യം കിഞ്ചി, ഉളാരം ജാതവിമ്ഹയോ;

ദിസ്വാ വിപസ്സനാമഗ്ഗാ, വോക്കമിത്വാ തതോ പരം.

൧൬൮൧. തമഹംകാരവിക്ഖിത്തോ, അസ്സാദേന്തോ മമായതി;

ഹോതാധിമാനികോ വാഥ, മഞ്ഞന്തോ തമനുത്തരം.

൧൬൮൨. സിയാ ചേവമുപക്ലിട്ഠാ, പതിതാ വാഥ ഭാവനാ;

തത്ഥേവം പടിസങ്ഖായ, പടിവിജ്ഝതി പണ്ഡിതോ.

൧൬൮൩. ന തണ്ഹാദിട്ഠിമാനേഹി, പരിയോഗാഹഹേതുതോ;

ലക്ഖണാലമ്ബണത്താ ച, ലോകിയായം വിപസ്സനാ.

൧൬൮൪. ദിട്ഠിമാനനികന്തീ ച, കുമ്മഗ്ഗാ പരിപന്ഥകാ;

മഗ്ഗോ വിസുദ്ധിയാ നാമ, വിസുദ്ധാ ച വിപസ്സനാ.

൧൬൮൫. സാരഥീവ രഥം ഭന്തമിതി സങ്ഖായ സാധുകം;

പവിട്ഠമഗ്ഗം വിക്ഖിത്തം, സമ്പാദേതി യഥാ പുരേ.

൧൬൮൬. ഇത്ഥം മഗ്ഗേ അമഗ്ഗേ ച, യാഥാവപടിവേധകം;

മഗ്ഗാമഗ്ഗവിസുദ്ധീതി, ഞാണദസ്സനമീരിതം.

൧൬൮൭. ചേതോപവത്തനാകാരമിതി സല്ലക്ഖയം ബുധോ;

സാധുകം പടിവിജ്ഝന്തോ, സുഖുമം നിപുണം തതോ.

൧൬൮൮. പരിപന്ഥേ വിമോചേത്വാ, ബോധേത്വാ ബോധിപക്ഖിയേ;

ഭാവനം പടിപാദേന്തോ, പുനദേവോദയബ്ബയം.

൧൬൮൯. സമധിട്ഠായ മേധാവീ, വിപസ്സതി തിലക്ഖണം;

ഉദയബ്ബയഞാണന്തി, തമീരേന്തി തതോ പരം.

൧൬൯൦. സങ്ഖാരാനം വിഭൂതത്താ, സാകാരാനം വിസേസതോ;

തിലക്ഖണാനം ദിട്ഠത്താ, സങ്ഖാരേസു സഭാവതോ.

൧൬൯൧. പരിപന്ഥാ വിമുത്തസ്സ, മഗ്ഗാമഗ്ഗവിസുദ്ധിയാ;

യഥാവീഥിപ്പവത്തസ്സ, പടിപത്തിവിസുദ്ധിയാ.

൧൬൯൨. ഇന്ദ്രിയാനം സുതിക്ഖത്താ, പരിപക്കാ വിപസ്സനാ;

ഉദയമ്ഹാ വിമുച്ചിത്വാ, ഭങ്ഗേ ഠാതി യഥാ കഥം.

൧൬൯൩. ഉപ്പാദോ പച്ചയായത്തോ, ധമ്മാനമിതി നിച്ഛിതേ;

നിരോധാനുഗതാ ജാതി, സിദ്ധാവസ്സം നിയാമതോ.

൧൬൯൪. തതോദയാവ പട്ഠായ, അത്ഥായ സൂരിയോ വിയ;

വിനാസായ പവത്തന്താ, വയന്തേവാതി പേക്ഖതി.

൧൬൯൫. ഉദയാഭോഗമോഹായ, വയന്തിച്ചേവ സബ്ബഥാ;

ഭേദസ്സഭാവമാരബ്ഭ, ധമ്മേസു സതി തിട്ഠതി.

൧൬൯൬. അതീതാ ച നിരുദ്ധാവ, നിരുജ്ഝിസ്സന്തിനാഗതാ;

നിരുജ്ഝന്തേവ വത്തന്താ, ഇച്ചേവമനുപസ്സതോ.

൧൬൯൭. നിജ്ഝരോവ ഗിരഗ്ഗമ്ഹി, വാരിവോണതപോക്ഖരേ;

പദീപോ വിയ ഝായന്തോ, ആരഗ്ഗേരിവ സാസപോ.

൧൬൯൮. ആതപേ വിയ ഉസ്സാവോ, പരിസ്സാവേ ജലം വിയ;

മദ്ദിതം ഫേണപിണ്ഡംവ, ലോണപിണ്ഡമിവോദകേ.

൧൬൯൯. ഉദകേ ദണ്ഡരാജീവ, വിജ്ജുതാവ വലാഹകേ;

ജലം തത്തകപാലേവ, സലിലേ വിയ ബുബ്ബുളം.

൧൭൦൦. വാതബ്ഭാഹതതൂലംവ, തീരം പത്താവ വീചിയോ;

ഫലം ബന്ധനമുത്തംവ, തിണാനീവ ഹുതാവഹേ.

൧൭൦൧. ജായന്താപി ച ജിയ്യന്താ, മിയ്യന്താ ച നിരന്തരം;

നിരോധായാഭിധാവന്താ, ഭങ്ഗാഭിമുഖപാതിനോ.

൧൭൦൨. വിഗച്ഛന്താവ ദിസ്സന്തി, ഖീയന്തന്തരധായിനോ;

വിദ്ധംസയന്താ സങ്ഖാരാ, പതന്താ ച വിനാസിനോ.

൧൭൦൩. ഭങ്ഗഞാണം തമക്ഖാതം, യേന ഞാണേന പസ്സതോ;

അനിച്ചന്താനുധാവന്തി, തിവിധാപി വിപസ്സനാ.

൧൭൦൪. ഉദയബ്ബയഭങ്ഗേസു, പാകടാ ഹി അനിച്ചതാ;

ഭയാദീനവനിബ്ബേദേ, ദുക്ഖതാനത്തതാ തതോ.

൧൭൦൫. ഇത്ഥം ഭങ്ഗമധിട്ഠായ, പസ്സന്തസ്സ തിലക്ഖണം;

സങ്ഖാരാ സഭയാ ഹുത്വാ, സമുപട്ഠന്തി യോഗിനോ.

൧൭൦൬. വാളമിഗാനുബദ്ധാവ, നിമ്മുജ്ജന്താ വിയണ്ണവേ;

അമനുസ്സഗഹിതാവ, പരിക്ഖിത്താവ വേരിഹി.

൧൭൦൭. കണ്ഹസപ്പസമാലീള്ഹാ, ചണ്ഡഹത്ഥിസമുട്ഠിതാ;

പപാതാവാടപക്ഖന്താ, പതന്താവ ഹുതാവഹേ.

൧൭൦൮. വജ്ഝപ്പത്താ മഹാചോരാ, ഛിജ്ജന്താ വിയ സീസതോ;

സൂലമാരോപിയന്താവ, പബ്ബതേനോത്ഥടാ വിയ.

൧൭൦൯. ജാതിസങ്കടപക്ഖന്താ, ജരാബ്യാധിനിപീളിതാ;

മരണാസനിസമ്മദ്ദാ, മഹാബ്യസനഭാഗിനോ.

൧൭൧൦. മച്ചുനബ്ഭാഹതാ നിച്ചം, ദുക്ഖഭാരസമോത്ഥടാ;

സോകോപായാസനിസ്സന്ദാ, പരിദേവപരായണാ.