൧൧. ഏകാദസമോ പരിച്ഛേദോ

വിപസ്സനാവിഭാഗോ

൧൫൦൬. ദ്വിധാ സമുട്ഠാനധുരാ, തിവിധാ ഭൂമിയോ മതാ;

തിവിധാഭിനിവേസാ ച, സരീരം തു ചതുബ്ബിധം.

൧൫൦൭. തിവിധാ ഭാവനാ തത്ഥ, സങ്ഖാരേസു യഥാരഹം;

ദുവിധാകാരമാരബ്ഭ, നിജ്ഝായതി തിലക്ഖണം.

൧൫൦൮. അട്ഠാരസാകാരഭിന്നാ, ദസാവത്ഥാ വിഭാവിതാ;

തിധാ വിഭാഗാ സാധേതി, വിമോക്ഖത്തയമുത്തമം.

൧൫൦൯. ചതുസച്ചപടിവേധാ, സത്തട്ഠാരിയപുഗ്ഗലാ;

ക്ലേസഹാനീ യഥായോഗം, ചതസ്സോ പടിസമ്ഭിദാ.

൧൫൧൦. തിവിധാ ച സമാപത്തി, നിരോധാ ച തഥാപരാ;

നിസ്സന്ദഫലമിച്ചാഹു, തസ്സാ സാസനകോവിദാ.

൧൫൧൧. വിപസ്സനാഭാവനായ-മിതി ഭാസന്തി പണ്ഡിതാ;

തമിദാനി പവക്ഖാമി, യഥാനുക്കമതോ കഥം.

൧൫൧൨. ഭൂമിധമ്മേ പരിഗ്ഗയ്ഹ, വിചിനന്തസ്സ യോഗിനോ;

സതിയാ സമഥാ വാഥ, സമുട്ഠാതി വിപസ്സനാ.

൧൫൧൩. സഭാവപടിവേധേ ച, സദ്ധമ്മപടിപത്തിയം;

പഞ്ഞാസദ്ധാദ്വയം തസ്സാ, ധുരമാഹു ധുരന്ധരാ.

൧൫൧൪. തേഭൂമകസഭാവാനം, സപ്പച്ചയപരിഗ്ഗഹോ;

ഞാതപരിഞ്ഞാ നാമായം, ഭൂമീതി പഠമാ മതാ.

൧൫൧൫. കലാപതോ സമ്മസനം, ഉദയബ്ബയദസ്സനം;

പരിഞ്ഞാതീരണാ നാമ, ദുതിയാ ഭൂമി ഭാസിതാ.

൧൫൧൬. പഹാനപരിഞ്ഞാ ഭൂമി, തതിയാഹു തതോപരം;

ഭങ്ഗാദിഞാണമിച്ചേവം, തിവിധാ ഭൂമിയോ മതാ.

൧൫൧൭. ഖണസന്തതിഅദ്ധാന-വസേനേത്ഥ സമീരിതാ;

അനിച്ചാ ദുക്ഖാനത്താതി, തിവിധാഭിനിവേസനാ.

൧൫൧൮. ദിട്ഠികങ്ഖാവിതരണാ, മഗ്ഗാമഗ്ഗപടിപ്പദാ;

വിസുദ്ധിയോ ചതസ്സോപി, സരീരന്തി നിദസ്സിതാ.

൧൫൧൯. സലക്ഖണവവത്ഥാനം, പച്ചയാകാരനിച്ഛയോ;

കുമ്മഗ്ഗപരിഹാരോ ച, തിലക്ഖണവിപസ്സനാ.

൧൫൨൦. ഇതി ലക്ഖണഭിന്നത്താ, ലബ്ഭന്തേകക്ഖണേപി ച;

ദേസിതാ ഹേതുഭൂതേന, കമേനേവം വിസുദ്ധിയോ.

൧൫൨൧. സീലബ്ബിസുദ്ധിആദീനം, തഥാ സാവ പരമ്പരാ;

ചിത്തബ്ബിസുദ്ധിആദീനമത്ഥായാതി പകാസിതാ.

൧൫൨൨. ദിസ്സമാനസഭാവാനം, പസ്സന്തോ പച്ചയട്ഠിതി;

പരിപന്ഥവിമുത്തോ ഹി, പടിപാദേതി ഭാവനം.

൧൫൨൩. തഥാപി ച വിസേസേന, പടിപന്നസ്സ യോഗിനോ;

തത്ഥ തത്ഥ വിഭൂതത്താ, ഠാനതോ ഭേദിതാ കഥം.

൧൫൨൪. രൂപപുബ്ബങ്ഗമം വാഥ, നാമപുബ്ബങ്ഗമം തഥാ;

അജ്ഝത്തം വാ ബഹിദ്ധാ വാ, യഥാപാകടധമ്മതോ.

൧൫൨൫. നാമരൂപാദിഭേദേന, ഭൂമിധമ്മപരിഗ്ഗഹോ;

വുത്താ ദിട്ഠിവിസുദ്ധീതി, അത്തദിട്ഠിപ്പഹാനതോ.

൧൫൨൬. ആഹച്ച പച്ചയുപ്പന്നാ, തഥാ തബ്ഭാവഭാവിനോ;

പവത്തന്തീതി സങ്ഖാരേ, പസ്സതോ പന യോനിസോ.

൧൫൨൭. പച്ചയഗ്ഗാഹിനീ പഞ്ഞാ, നാമരൂപപ്പവത്തിയാ;

കങ്ഖാ തരന്തി തായാതി, കങ്ഖാവിതരണാ മതാ.

൧൫൨൮. അനിച്ചാ ദുക്ഖാനത്താതി, പച്ചയായത്തവുത്തിതോ;

സങ്ഖിപിത്വാ കലാപേന, സമ്മസീയന്തി സങ്ഖതാ.

൧൫൨൯. ഉപ്പാദവയഭാവോപി, ലക്ഖണത്തയസാധകോ;

പച്ചയാകാരമാരബ്ഭ, ലക്ഖീയതി വിസേസതോ.

൧൫൩൦. തസ്മാ സമ്മസനഞാണം, ഉദയബ്ബയദസ്സനം;

കങ്ഖാവിതരണായം തു, സങ്ഗയ്ഹതി വിസുദ്ധിയം.

൧൫൩൧. തത്ഥ സംക്ലേസവിക്ഖേപം, കുമ്മഗ്ഗം പരിവജ്ജതോ;

മഗ്ഗാമഗ്ഗവിസുദ്ധീതി, ഞാണദസ്സനമീരിതം.

൧൫൩൨. തതോ കഥേന്തി അക്ലിട്ഠമുദയബ്ബയദസ്സനം;

ആദിം കത്വാ പടിപദാഞാണദസ്സനസുദ്ധിയം.

൧൫൩൩. പച്ചയപച്ചയുപ്പന്നേ, യഥാവത്ഥുവവത്ഥിതേ;

പഹാതുമീഹമാനാനം, നിയ്യാനപടിപത്തിതോ.

൧൫൩൪. ഉപക്ലേസവിസുദ്ധോ ഹി, പുനദേവോദയബ്ബയം;

അധിട്ഠഹിത്വാ ഭങ്ഗാദി-ഞാണേഹി പടിപജ്ജതി.

൧൫൩൫. തഥാ ചാഭിനവുപ്പന്നേ, ഭിജ്ജമാനേ വിപസ്സതോ;

സംവേഗകഡ്ഢിതം ഞാണം, ഭങ്ഗാദിമനുതിട്ഠതി.

൧൫൩൬. തതോ പുബ്ബേ പവത്താ ഹി, സംക്ലേസാപായസമ്ഭവാ;

പടിപത്തിവിസുദ്ധീതി, ന സങ്ഗയ്ഹതി ഭാവനാ.

൧൫൩൭. സമ്പാദേന്തോ പനിച്ചേതാ, ചതസ്സോപി വിസുദ്ധിയോ;

അനിച്ചാ ദുക്ഖാനത്താതി, ഭാവേയ്യ തിവിധാ കഥം.

൧൫൩൮. പച്ചയപച്ചയുപ്പന്നാ, ജാതാനന്തരഭേദിനോ;

അനിച്ചാ ച പഭങ്ഗൂ ച, പലുജ്ജന്തി ചവന്തി ച.

൧൫൩൯. അദ്ധുവാ ച അസാരാ ച, വിഭവാ ച വിനാസിനോ;

സങ്ഖതാ വിപരിണാമ-ധമ്മാ ഇത്തരകാലികാ.

൧൫൪൦. ഖയധമ്മാ വയധമ്മാ, ലഹുകാലപ്പവത്തിനോ;

താവകാലികധമ്മാ ച, പരിത്തട്ഠിതികാ തഥാ.

൧൫൪൧. ഖണത്തയപരിച്ഛിന്നാ, പുബ്ബാപരവിചിത്തകാ;

പുരക്ഖതാ നിരോധസ്സ, സസ്സതാ ന കുദാചനം.

൧൫൪൨. ജായന്തി പരിഹാനായ, ന തു ജായന്തി വുദ്ധിയാ;

ജിയ്യമാനാവ തിട്ഠന്തി, ജിണ്ണാ ഭങ്ഗപരായണാ.

൧൫൪൩. അഹുത്വായേവുപ്പജ്ജന്തി, ന കുതോചിപി ആഗതാ;

ഹുത്വാ അന്തരധായന്തി, ന തു കത്ഥചി സഞ്ചിതാ.

൧൫൪൪. തം തം പച്ചയസാമഗ്ഗി-മത്തലാഭായ നിസ്സിതാ;

നിരോധധമ്മാ ജായന്തി, ജാതാ ബ്യന്തി ഭവന്തി തേ.

൧൫൪൫. യഥാ നദീ പബ്ബതേയ്യാ, യഥാ ദീപസിഖാ തഥാ;

സീഘസീഘം പവത്തന്താ, ഉപ്പജ്ജന്തി വയന്തി ച.

൧൫൪൬. ജാതാ ജാതാ നിരുജ്ഝന്തി, അഞ്ഞേ അഞ്ഞേ തു ജായരേ;

അവീചി അനുസമ്ബന്ധാ, ന ജാനന്തി വിസേസതോ.

൧൫൪൭. ഇതി നാനപ്പകാരേന, വിപസ്സന്തോ വിചക്ഖണോ;

അനിച്ചഭാവനം ധീരോ, പരിപാചേതി സാധുകം.

൧൫൪൮. ദുക്ഖാ ച ദുക്ഖവത്ഥൂ ച, അഭിണ്ഹപരിപീളിതാ;

രോഗാ ഗണ്ഡാ ച സല്ലാ ച, അഘതോ ച ഉപദ്ദവാ.

൧൫൪൯. ഭയോപസഗ്ഗാഘമൂലാ,

സാസവാദീനവീതിതാ;

അലേണാസരണാതാണാ,

വധകാ മാരകാമിസാ.

൧൫൫൦. ജാതിധമ്മാ ജരാബ്യാധി-

സോകോപായാസഭാഗിനോ;

പരിദേവസഭാവാ ച,

സംക്ലേസാ ദുക്ഖഭാഗിനോ.

൧൫൫൧. ജേഗുച്ഛാ പടികൂലാ ച, ബീഭച്ഛാ ച വിരൂപിനോ;

അജഞ്ഞാ ചപലാ ഹീനാ, ദുഗ്ഗന്ധാ ബാലസേവിതാ.

൧൫൫൨. സോകന്തരികതാനിച്ചം, തണ്ഹായ കഡ്ഢിതാ ഭുസം;

കപണാ ദുഗ്ഗതാ ദീനാ, വിപന്നാ ച വിഘാതിനോ.

൧൫൫൩. അത്തലാഭം ഗവേസന്തി, തംതംപച്ചയനിസ്സിതാ;

ദുക്ഖാധിട്ഠാനമച്ചന്തം, ജാതാ പുന വിഹഞ്ഞരേ.

൧൫൫൪. അഗ്ഗികൂപേ നിമുഗ്ഗാവ, ക്ലേസസന്താപഭാഗിനോ;

ഓവിദ്ധാ വിയ സത്തീഹി, സങ്ഖാരാ നിച്ചദുക്ഖിതാ.

൧൫൫൫. ജായമാനാ ച ജിയ്യന്താ, മിയ്യന്താ ച ഖണേ ഖണേ;

പസുകാ വിയ നിച്ചമ്മാ, ഹഞ്ഞന്തി സേരികാതുരാ.

൧൫൫൬. തിലാനി തിലയന്തേവ, ഉച്ഛുയന്തേവ ഉച്ഛുയോ;

ഉദയബ്ബയാവസ്സം തേ, പീളയന്തി അഭിണ്ഹസോ.

൧൫൫൭. മനോരമനവാകാരാ, വിപല്ലാസപരിക്ഖതാ;

ഇരിയാപഥസഞ്ഛന്നാ, നോപതിട്ഠന്തി ദുക്ഖതോ.

൧൫൫൮. സങ്ഖാരേസു പനേതേസു, വേദനാസ്സാദരോധിനോ;

സാവ സന്ദുലസമ്ബദ്ധാ, സമ്മോഹപരിവാരിതാ.

൧൫൫൯. ‘‘അദും ദുക്ഖമിദം ദുക്ഖ’’-മിതി സംസാരചാരിനോ;

ദുക്ഖഹേതുമജാനന്താ, സമ്ഭമന്തി അവിദ്ദസു.

൧൫൬൦. സുഖാകാരമപസ്സന്താ, ദുക്ഖഭാരനിപീളിതാ;

പത്ഥേന്തി ദുക്ഖമേവഞ്ഞം, ബാലാ ബ്യസനഭാഗിനോ.

൧൫൬൧. ചവന്താ ഉപപജ്ജന്താ, രുക്ഖസാഖംവ മക്കടോ;

ദുക്ഖമേകം വിമുച്ചന്തി, തതോ ഗണ്ഹന്തി ചാപരം.

൧൫൬൨. തേ ദീഘരത്തം സോചന്തി, തണ്ഹാസല്ലസമപ്പിതാ;

ദിട്ഠിപാസസമുപേതാ, മാനത്ഥമ്ഭാനുസായിനോ.

൧൫൬൩. തമാകാരം പനിച്ചേവം, വിപസ്സന്തോ വിസാരദോ;

ദുക്ഖാനുപസ്സനം നാമ, പരിപാചേതി ഭാവനം.

൧൫൬൪. ധമ്മട്ഠിതിനിയാമാ ഹി, ഖന്ധായതനധാതുയോ;

അനത്താസസ്സതന്താ ച, ഈഹാഭോഗവിവജ്ജിതാ.

൧൫൬൫. പയോജനമധിട്ഠായ, ന തു ബ്യാപാരയന്തി ച;

പച്ചയപച്ചയുപ്പന്നാ, ജനേതും വാഥ ജായിതും.

൧൫൬൬. തഥാപി ഹേതുസാമഗ്ഗി-സമ്ഭവേ സമ്ഭവന്തി തേ;

തബ്ഭാവഭാവിഭാവേന, അഞ്ഞമഞ്ഞപവത്തിതാ.

൧൫൬൭. അജായിതും ന സക്കോന്തി, സതി പച്ചയസമ്ഭവേ;

പച്ചയാനമലാഭേ തു, ന ജായന്തി കുദാചനം.

൧൫൬൮. ന കിഞ്ചേത്ഥ അപേക്ഖിത്വാ, സമഗ്ഗാ ഹോന്തി പച്ചയാ;

ന ജനേതും ന സക്കോന്തി, സമഗ്ഗാ ച കുദാചനം.

൧൫൬൯. യഥാപച്ചയലാഭേന, പവത്തന്തി യഥാ തഥാ;

രക്ഖിതാ വാ വിധാതാ വാ, നത്ഥി അസ്സാമികാ തഥാ.

൧൫൭൦. ‘‘അഹം മമ’’ന്തി ഗണ്ഹന്താ, പരിണാമേന്തി അഞ്ഞഥാ;

വിസ്സസന്താ ഹരന്തേതേ, പരാഭൂതാ പലമ്ഭിനോ.

൧൫൭൧. രിത്താ തുച്ഛാ ച സുഞ്ഞാ ച, വിവിത്താ സാരവജ്ജിതാ;

സലക്ഖണപരിച്ഛിന്നാ, ധമ്മാ നത്ഥേത്ഥ പുഗ്ഗലോ.

൧൫൭൨. ജായമാനാ ച ജിയ്യന്താ, മിയ്യമാനാ ച സങ്ഖതാ;

വിവസാ പരിവത്തന്തി, വസോ തേസം ന കത്ഥചി.

൧൫൭൩. ന തേസു കസ്സചിസ്സേരം, ന തേസഞ്ചത്ഥി കത്ഥചി;

ന ചത്തനീതി സങ്ഖാരാ, ആധിപച്ചവിവജ്ജിതാ.

൧൫൭൪. കദലീപത്തവട്ടീവ, അഞ്ഞമഞ്ഞപതിട്ഠിതാ;

സഹജാതഗ്ഘനീഭൂതാ, നോപട്ഠന്തി അനത്തതോ.

൧൫൭൫. അരൂപനിസ്സിതം രൂപം, അരൂപം രൂപനിസ്സിതം;

ജച്ചന്ധപീഠസപ്പീവ, അഞ്ഞമഞ്ഞവവത്ഥിതം.

൧൫൭൬. യന്തസുത്തേന യന്തംവ, കായയന്തം പവത്തതി;

നാമാവകഡ്ഢിതം തത്ഥ, നത്ഥി അത്താ സയംവസീ.

൧൫൭൭. ചേതോവിപ്ഫാരനിപ്ഫന്നാ, വായോധാതുസമുട്ഠിതാ;

ഇരിയാപഥവിഞ്ഞത്തിവികാരാ പാലകാ മതാ.