൨. ദുതിയോ പരിച്ഛേദോ

ലക്ഖണരസുപട്ഠാനവിഭാഗോ

൬൭. സഭാവോ ലക്ഖണം നാമ, കിച്ചസമ്പജ്ജനാ രസോ;

ഗയ്ഹാകാരോ ഉപട്ഠാനം, പദട്ഠാനം തു പച്ചയോ.

൬൮. അത്തുപലദ്ധിസങ്ഖാതാ, സമ്പത്താ ച പനത്ഥതോ;

ലക്ഖണരസുപട്ഠാനാ, വോഹാരാഭോഗഭേദിതാ.

൬൯. തേപഞ്ഞാസസഭാവേസു, തസ്മാ ഭേദം യഥാരഹം;

ലക്ഖണാദിപ്പകാരേഹി, പവക്ഖാമി ഇതോ പരം.

൭൦. ചിന്തേതീതി ഭവേ ചിത്തം, ചിന്തനമത്തമേവ വാ;

സമ്പയുത്താഥ വാ തേന, ചിന്തേന്തീതി ച ഗോചരം.

൭൧. ഫുസതീതി ഭവേ ഫസ്സോ, ഫുസനം വാഥ കേവലം;

സമ്പയുത്താഥ വാ തേന, ഫുസന്തീതി ച ഗോചരം.

൭൨. ഏവം കത്തരി ഭാവേ ച, കരണേ ച യഥാരഹം;

തേപഞ്ഞാസസഭാവേസു, സദ്ദനിബ്ബചനം നയേ.

൭൩. ആലമ്ബണമനം ചിത്തം, തംവിജാനനലക്ഖണം;

സഹജാധിട്ഠാനരസം, ചിന്താകപ്പോതി ഗയ്ഹതി.

൭൪. ആലമ്ബണസമോധാനോ,

ഫസ്സോ ഫുസനലക്ഖണോ;

സങ്ഘട്ടനരസോ തത്ഥ,

സന്നിപാതോതി ഗയ്ഹതി.

൭൫. വേദനാലമ്ബണരസാ, സാ വേദയിതലക്ഖണാ;

ഗോചരാനുഭവരസാ, അനുഭുത്തീതി ഗയ്ഹതി.

൭൬. ആകാരഗഹണം സഞ്ഞാ, സാ സഞ്ജാനനലക്ഖണാ;

നിമിത്തുപ്പാദനരസാ, ഉപലക്ഖാതി ഗയ്ഹതി.

൭൭. ചേതനാ ചിത്തവിപ്ഫാരാ, സായം ബ്യാപാരലക്ഖണാ;

കമ്മന്തായൂഹനരസാ, സംവിധാനന്തി ഗയ്ഹതി.

൭൮. ഏകഗ്ഗതാ അവിക്ഖേപോ, സാവിസാഹാരലക്ഖണാ;

സമ്പിണ്ഡനരസാ ചിത്തം, സമോധാനന്തി ഗയ്ഹതി.

൭൯. യാപനം സഹജാതാന-മനുപാലനലക്ഖണം;

ജീവിതം ജീവനരസം, ആയുബന്ധോതി ഗയ്ഹതി.

൮൦. സാരണാ മനസീകാരോ, സമന്നാഹാരലക്ഖണോ;

സംയോജനരസോ ചിത്ത-പടിപത്തീതി ഗയ്ഹതി.

൮൧. സങ്കപ്പനലക്ഖണോ തക്കോ, സഹജാഭിനിരോപനോ;

ആലമ്ബാഹനനരസോ, സന്നിരുജ്ഝോതി ഗയ്ഹതി.

൮൨. വിചാരോ അനുസന്ധാനോ, അനുമജ്ജനലക്ഖണോ;

ചിത്താനുയോജനരസോ, അനുപേക്ഖാതി ഗയ്ഹതി.

൮൩. അധിമോക്ഖോ അസംസപ്പോ, സുസന്നിട്ഠാനലക്ഖണോ;

നിച്ചലാപാദനരസോ, ദള്ഹവുത്തീതി ഗയ്ഹതി.

൮൪. വീരിയം പന വായാമോ, മഹുസ്സാഹനലക്ഖണോ;

കിച്ചാസംസീദനരസോ, ഉപത്ഥമ്ഭോതി ഗയ്ഹതി.

൮൫. ആലമ്ബത്ഥികതാ ഛന്ദോ, കത്തുകാമതലക്ഖണോ;

ആലമ്ബണേസനരസോ, ഹത്ഥാദാനന്തി ഗയ്ഹതി.

൮൬. സഹജാതാനുഫരണാ, സമ്പിയായനലക്ഖണാ;

സമ്പീനനരസാ പീതി, പാമോജ്ജമിതി ഗയ്ഹതി.

൮൭. ചേതോസദ്ദഹനം സദ്ധാ, ഭൂതോകപ്പനലക്ഖണാ;

ഹിതപക്ഖന്ദനരസാ, അധിമുത്തീതി ഗയ്ഹതി.

൮൮. അസമ്മോസാ സഭാവേസു, സതി ധാരണലക്ഖണാ;

ധമ്മാപിലാപനരസാ, അപ്പമാദോതി ഗയ്ഹതി.

൮൯. ഹിരീ ജേഗുച്ഛാ പാപേസു, സാ ഹരായനലക്ഖണാ;

ഹീളസംകോചനരസാ, പാപലജ്ജാതി ഗയ്ഹതി.

൯൦. പാപസാരജ്ജമോത്തപ്പം, ഉബ്ബേഗുത്താസലക്ഖണം;

ഭയസങ്കോചനരസം, അവിസ്സാസോതി ഗയ്ഹതി.

൯൧. അലോഭോ അനഭിസങ്ഗോ, അപരിഗ്ഗഹലക്ഖണോ;

മുത്തപ്പവത്തനരസോ, അസംസഗ്ഗോതി ഗയ്ഹതി.

൯൨. അദോസോ ചിത്തസാഖല്യം, അബ്യാപജ്ജനലക്ഖണോ;

സണ്ഹപ്പവത്തനരസോ, സോമ്മഭാവോതി ഗയ്ഹതി.

൯൩. അമോഹോ ഖലിതാഭാവോ, പടിവിജ്ഝനലക്ഖണോ;

വിസയോഭാസനരസോ, പടിബോധോതി ഗയ്ഹതി.

൯൪. തത്രമജ്ഝത്തതോപേക്ഖാ, സമീകരണലക്ഖണാ;

അപക്ഖപാതനരസാ, സമവാഹോതി ഗയ്ഹതി.

൯൫. പസ്സദ്ധി കായചിത്താനം, ദരഥാഭാവലക്ഖണാ;

അപരിപ്ഫന്ദനരസാ, സീതിഭാവോതി ഗയ്ഹതി.

൯൬. ലഹുതാ കായചിത്താനം, അദന്ധാകാരലക്ഖണാ;

അവിത്ഥാരരസാ സല്ലഹുകവുത്തീതി ഗയ്ഹതി.

൯൭. മുദുതാ കായചിത്താനം, കക്ഖളാഭാവലക്ഖണാ;

കിച്ചാവിരോധനരസാ, അനുകുല്യന്തി ഗയ്ഹതി.

൯൮. കമ്മഞ്ഞതാ ഉഭിന്നമ്പി, അലംകിച്ചസ്സ ലക്ഖണാ;

പവത്തിസമ്പത്തിരസാ, യോഗഭാവോതി ഗയ്ഹതി.

൯൯. തഥാ പാഗുഞ്ഞതാ ദ്വിന്നം, വിസദാകാരലക്ഖണാ;

സുഖപ്പവത്തനരസാ, സേരിഭാവോതി ഗയ്ഹതി.

൧൦൦. ഉജുതാ കായചിത്താനം, കുടിലാഭാവലക്ഖണാ;

ജിമ്ഹനിമ്മദനരസാ, ഉജുവുത്തീതി ഗയ്ഹതി.

൧൦൧. സമ്മാവാചാ വചീസുദ്ധി, വാചാസംയമലക്ഖണാ;

മിച്ഛാവാചോരമരസാ, വചീവേലാതി ഗയ്ഹതി.

൧൦൨. സമ്മാകമ്മം ക്രിയാസുദ്ധം, സമ്മാകരണലക്ഖണം;

മിച്ഛാകമ്മോരമരസം, ക്രിയാവേലാതി ഗയ്ഹതി.

൧൦൩. സമ്മാജീവോ വിസുദ്ധേട്ഠി, അല്ലിട്ഠാജീവലക്ഖണോ;

മിച്ഛാജീവോരമരസോ, സമ്മാവുത്തീതി ഗയ്ഹതി.

൧൦൪. കരുണാ ദീനസത്തേസു, ദുക്ഖാപനയലക്ഖണാ;

സോത്ഥിതാപത്ഥനരസാ, അനുകമ്പാതി ഗയ്ഹതി.

൧൦൫. സുഖട്ഠിതേസു മുദിതാ, അനുമോദനലക്ഖണാ;

ചേതോവികാസനരസാ, അവിരോധോതി ഗയ്ഹതി.

൧൦൬. ചേതോസാരജ്ജനാ ലോഭോ, അപരിച്ചാഗലക്ഖണോ;

ആലമ്ബഗിജ്ഝനരസോ, അഭിലഗ്ഗോതി ഗയ്ഹതി.

൧൦൭. ചേതോബ്യാപജ്ജനം ദോസോ, സമ്പദുസ്സനലക്ഖണോ;

ആലമ്ബണഘാതരസോ, ചണ്ഡിക്കമിതി ഗയ്ഹതി.

൧൦൮. ചേതോസമ്മുയ്ഹനം മോഹോ,

സോ സമ്മുയ്ഹനലക്ഖണോ;

സഭാവച്ഛാദനരസോ,

അന്ധഭാവോതി ഗയ്ഹതി.

൧൦൯. പാപാജിഗുച്ഛാഹിരികം, നില്ലജ്ജാകാരലക്ഖണം;

പാപോപലാപനരസം, മലഗ്ഗാഹോതി ഗയ്ഹതി.

൧൧൦. അസാരജ്ജനമനോത്തപ്പമനുത്താസനലക്ഖണം;

പാപപക്ഖന്ദനരസം, പാഗബ്ഭമിതി ഗയ്ഹതി.

൧൧൧. ദിട്ഠി ദള്ഹവിപല്ലാസോ, സാ പരാമാസലക്ഖണാ;

തുച്ഛാഭിനിവേസനരസാ, മിച്ഛാഗാഹോതി ഗയ്ഹതി.

൧൧൨. ‘‘അഹസ്മീ’’തി മഞ്ഞമാനോ, സോ സമുന്നതിലക്ഖണോ;

കേതുസമ്പഗ്ഗഹരസോ, അഹംകാരോതി ഗയ്ഹതി.

൧൧൩. പരസമ്പത്തീസു ഇസ്സാ, അക്ഖമാകാരലക്ഖണാ;

ചേതോവികുചനരസാ, വിമുഖത്തന്തി ഗയ്ഹതി.

൧൧൪. പരിഗ്ഗഹേസു മച്ഛേരം, സന്നിഗൂഹനലക്ഖണം;

സാമഞ്ഞാസഹനരസം, വേവിച്ഛമിതി ഗയ്ഹതി.

൧൧൫. ചേതോപഹനനം ഥീനം, തം സംസീദനലക്ഖണം;

ഉസ്സാഹഭഞ്ജനരസം, സംഖിത്തത്തന്തി ഗയ്ഹതി.

൧൧൬. വിഘാതോ സഹജാതാനം, മിദ്ധം മോഹനലക്ഖണം;

സത്തിസംഭഞ്ജനരസം, ആതുരത്തന്തി ഗയ്ഹതി.

൧൧൭. ഉദ്ധച്ചം ചിത്തവിക്ഖേപോ, അവൂപസമലക്ഖണം;

ചേതോനവട്ഠാനരസം, ഭന്തത്തമിതി ഗയ്ഹതി.

൧൧൮. വിപ്പടിസാരോ കുക്കുച്ചമനുസോചനലക്ഖണം;

അത്താനുസോചനരസം, പച്ഛാതാപോതി ഗയ്ഹതി.

൧൧൯. കങ്ഖായനാ വിചികിച്ഛാ, അസന്നിട്ഠാനലക്ഖണാ;

അനേകഗാഹനരസാ, അപ്പതിട്ഠാതി ഗയ്ഹതി.

൧൨൦. ഇച്ചേവം ലക്ഖണാദീഹി, വിഭാവേയ്യ വിചക്ഖണോ;

തേപഞ്ഞാസസഭാവേസു, സഭാവാകാരലക്ഖണം.

൧൨൧. ലക്ഖണത്ഥകുസലാ സലക്ഖണേ,

ലക്ഖണത്ഥപരമേപി കേവലം;

ലക്ഖണുഗ്ഗഹസുഖായ വണ്ണയും,

ലക്ഖണാദിമുഖതോ സലക്ഖണം.

൧൨൨. അത്ഥം തമേവമനുഗമ്മ മയേത്ഥ വുത്ത-

മത്ഥാനമത്ഥനയനത്ഥമനേകധാപി;

പത്ഥേയ്യ മേത്ഥ വചനത്ഥനയേഹി ഞാണ-

മത്ഥേസു ബുദ്ധവചനത്ഥനയത്ഥികേഹി.

ഇതി നാമരൂപപരിച്ഛേദേ ലക്ഖണരസുപട്ഠാനവിഭാഗോ നാമ

ദുതിയോ പരിച്ഛേദോ.