൧൪. ചുദ്ദസമോ പരിച്ഛേദോ

രൂപാവചരസമാധിഭാവനാനിദ്ദേസോ

൭൮൯. ഭാവനാനയമഹം ഹിതാനയം,

മാനയഞ്ച സുഗതം സുഖാനയം;

ബ്യാകരോമി പരമം ഇതോ പരം,

തം സുണാഥ മധുരത്ഥവണ്ണനം.

൭൯൦. ഉത്തരം തു മനുസ്സാനം, ധമ്മതോ ഞാണദസ്സനം;

പത്തുകാമേന കാതബ്ബം, ആദിതോ സീലസോധനം.

൭൯൧. സങ്കസ്സരസമാചാരേ, ദുസ്സീലേ സീലവജ്ജിതേ;

നത്ഥി ഝാനം കുതോ മഗ്ഗോ, തസ്മാ സീലം വിസോധയേ.

൭൯൨. സീലം ചാരിത്തവാരിത്തവസേന ദുവിധം മതം;

തം പനാച്ഛിദ്ദമക്ഖണ്ഡമകമ്മാസമനിന്ദിതം.

൭൯൩. കത്തബ്ബം അത്ഥകാമേന, വിവേകസുഖമിച്ഛതാ;

സീലഞ്ച നാമ ഭിക്ഖൂനം, അലങ്കാരോ അനുത്തരോ.

൭൯൪. രതനം സരണം ഖേമം, താണം ലേണം പരായണം;

ചിന്താമണി പണീതോ ച, സീലം യാനമനുത്തരം.

൭൯൫. സീതലം സലിലം സീലം, കിലേസമലധോവനം;

ഗുണാനം മൂലഭൂതഞ്ച, ദോസാനം ബലഘാതി ച.

൭൯൬. തിദിവാരോഹണഞ്ചേതം, സോപാനം പരമുത്തമം;

മഗ്ഗോ ഖേമോ ച നിബ്ബാനനഗരസ്സ പവേസനേ.

൭൯൭. തസ്മാ സുപരിസുദ്ധം തം, സീലം ദുവിധലക്ഖണം;

കത്തബ്ബം അത്ഥകാമേന, പിയസീലേന ഭിക്ഖുനാ.

൭൯൮. കാതബ്ബോ പന സീലസ്മിം, പരിസുദ്ധേ ഠിതേനിധ;

പലിബോധസ്സുപച്ഛേദോ, പലിബോധാ ദസാഹു ച.

൭൯൯. ‘‘ആവാസോ ച കുലം ലാഭോ,

ഗണോ കമ്മഞ്ച പഞ്ചമം;

അദ്ധാനം ഞാതി ആബാധോ,

ഗന്ഥോ ഇദ്ധീതി തേ ദസാ’’തി.

൮൦൦. പലിബോധസ്സുപച്ഛേദം, കത്വാ ദസവിധസ്സപി;

ഉപസങ്കമിതബ്ബോ സോ, കമ്മട്ഠാനസ്സ ദായകോ.

൮൦൧. പിയോ ഗരു ഭാവനീയോ, വത്താ ച വചനക്ഖമോ;

ഗമ്ഭീരഞ്ച കഥം കത്താ, നോ ചട്ഠാനേ നിയോജകോ.

൮൦൨. ഏവമാദിഗുണോപേതമുപഗന്ത്വാ ഹിതേസിനം;

കല്യാണമിത്തം കാലേന, കമ്മട്ഠാനസ്സ ദായകം.

൮൦൩. കമ്മട്ഠാനം ഗഹേതബ്ബം, വത്തം കത്വാ പനസ്സ തു;

തേനാപി ചരിതം ഞത്വാ, ദാതബ്ബം തസ്സ ഭിക്ഖുനോ.

൮൦൪. ചരിതം പനിദം രാഗദോസമോഹവസേന ച;

സദ്ധാബുദ്ധിവിതക്കാനം, വസേന ഛബ്ബിധം മതം.

൮൦൫. വോമിസ്സകനയാ തേസം, ചതുസട്ഠി ഭവന്തി തേ;

തേഹി അത്ഥോ ന ചത്ഥീതി, ന മയാ ഇധ ദസ്സിതാ.

൮൦൬. അസുഭാ ച ദസേവേത്ഥ, തഥാ കായഗതാസതി;

ഏകാദസ ഇമേ രാഗ-ചരിതസ്സാനുകൂലതാ.

൮൦൭. ചതസ്സോ അപ്പമഞ്ഞായോ, സവണ്ണകസിണാ ഇമേ;

അട്ഠേവ ച സദാ ദോസ-ചരിതസ്സാനുകൂലതാ.

൮൦൮. തം മോഹചരിതസ്സേത്ഥ, വിതക്കചരിതസ്സ ച;

അനുകൂലന്തി നിദ്ദിട്ഠം, ആനാപാനം പനേകകം.

൮൦൯. പുരിമാനുസ്സതിഛക്കം, സദ്ധാചരിതദേഹിനോ;

മരണൂപസമായുത്താ, സതിമാഹാരനിസ്സിതാ.

൮൧൦. സഞ്ഞാ ധാതുവവത്ഥാനം, ബുദ്ധിപ്പകതിജന്തുനോ;

ഇമേ പന ച ചത്താരോ, അനുകൂലാതി ദീപിതാ.

൮൧൧. ചത്താരോപി ച ആരുപ്പാ, സേസാനി കസിണാനി ച;

അനുകൂലാ ഇമേ സബ്ബ-ചരിതാനന്തി വണ്ണിതാ.

൮൧൨. ഇദം സബ്ബം പനേകന്ത-വിപച്ചനീകഭാവതോ;

അതിസപ്പായതോ വുത്ത-മിതി ഞേയ്യം വിഭാവിനാ.

൮൧൩. കമ്മട്ഠാനാനി സബ്ബാനി, ചത്താലീസാതി നിദ്ദിസേ;

കസിണാനി ദസ ചേവ, അസുഭാനുസ്സതീ ദസ.

൮൧൪. ചതസ്സോ അപ്പമഞ്ഞായോ, ചത്താരോ ച അരൂപിനോ;

ചതുധാതുവവത്ഥാനം, സഞ്ഞാ ചാഹാരതാ ഇതി.

൮൧൫. കമ്മട്ഠാനേസു ഏതേസു, ഉപചാരവഹാ കതി;

ആനാപാനസതിം കായ-ഗതം ഹിത്വാ പനട്ഠപി.

൮൧൬. സേസാനുസ്സതിയോ സഞ്ഞാ, വവത്ഥാനന്തി തേരസ;

ഉപചാരവഹാ വുത്താ, സേസാ തേ അപ്പനാവഹാ.

൮൧൭. അപ്പനായാവഹേസ്വേത്ഥ, കസിണാനി ദസാപി ച;

ആനാപാനസതീ ചേവ, ചതുക്കജ്ഝാനികാ ഇമേ.

൮൧൮. അസുഭാനി ദസ ചേത്ഥ, തഥാ കായഗതാസതി;

ഏകാദസ ഇമേ ധമ്മാ, പഠമജ്ഝാനികാ സിയും.

൮൧൯. ആദിബ്രഹ്മവിഹാരാതി, തികജ്ഝാനവഹാ തയോ;

ചതുത്ഥാപി ച ആരുപ്പാ, ചതുത്ഥജ്ഝാനികാ മതാ.

൮൨൦. വസേനാരമ്മണങ്ഗാനം, ദുവിധോ സമതിക്കമോ;

ഗോചരാതിക്കമാരൂപേ, രൂപേ ഝാനങ്ഗതിക്കമോ.

൮൨൧. ദസേവ കസിണാനേത്ഥ, വഡ്ഢേതബ്ബാനി ഹോന്തി ഹി;

ന ച വഡ്ഢനിയാ സേസാ, ഭവന്തി അസുഭാദയോ.

൮൨൨. ദസേവ കസിണാനേത്ഥ, അസുഭാനി ദസാപി ച;

ആനാപാനസതീ ചേവ, തഥാ കായഗതാസതി.

൮൨൩. പടിഭാഗനിമിത്താനി, ഹോന്തി ആരമ്മണാനി ഹി;

സേസാനേവ പടിഭാഗ-നിമിത്താരമ്മണാ സിയും.

൮൨൪. അസുഭാനി ദസാഹാര-സഞ്ഞാ കായഗതാസതി;

ദേവേസു നപ്പവത്തന്തി, ദ്വാദസേതാനി സബ്ബദാ.

൮൨൫. താനി ദ്വാദസ ചേതാനി, ആനാപാനസതീപി ച;

തേരസേവ പനേതാനി, ബ്രഹ്മലോകേ ന വിജ്ജരേ.

൮൨൬. ഠപേത്വാ ചതുരാരൂപേ, നത്ഥി കിഞ്ചി അരൂപിസു;

മനുസ്സലോകേ സബ്ബാനി, പവത്തന്തി ന സംസയോ.

൮൨൭. ചതുത്ഥം കസിണം ഹിത്വാ, കസിണാ അസുഭാനി ച;

ദിട്ഠേനേവ ഗഹേതബ്ബാ, ഇമേ ഏകൂനവീസതി.

൮൨൮. സതിയമ്പി ച കായമ്ഹി, ദിട്ഠേന തചപഞ്ചകം;

സേസമേത്ഥ സുതേനേവ, ഗഹേതബ്ബന്തി ദീപിതം.

൮൨൯. ആനാപാനസതീ ഏത്ഥ, ഫുട്ഠേന പരിദീപിതാ;

വായോകസിണമേവേത്ഥ, ദിട്ഠഫുട്ഠേന ഗയ്ഹതി.

൮൩൦. സുതേനേവ ഗഹേതബ്ബാ, സേസാ അട്ഠാരസാപി ച;

ഉപേക്ഖാ അപ്പമഞ്ഞാ ച, അരൂപാ ചേവ പഞ്ചിമേ.

൮൩൧. ആദിതോവ ഗഹേതബ്ബാ, ന ഹോന്തീതി പകാസിതാ;

പഞ്ചതിംസാവസേസാനി, ഗഹേതബ്ബാനി ആദിതോ.

൮൩൨. കമ്മട്ഠാനേസു ഹേതേസു, ആകാസകസിണം വിനാ;

കസിണാ നവ ഹോന്തേ ച, അരൂപാനം തു പച്ചയാ.

൮൩൩. ദസാപി കസിണാ ഹോന്തി, അഭിഞ്ഞാനം തു പച്ചയാ;

തയോ ബ്രഹ്മവിഹാരാപി, ചതുക്കസ്സ ഭവന്തി തു.

൮൩൪. ഹേട്ഠിമം ഹേട്ഠിമാരുപ്പം, ഉപരൂപരിമസ്സ ഹി;

തഥാ ചതുത്ഥമാരുപ്പം, നിരോധസ്സാതി ദീപിതം.

൮൩൫. സബ്ബാനി ച പനേതാനി, ചത്താലീസവിധാനി തു;

വിപസ്സനാഭവസമ്പത്തി-സുഖാനം പച്ചയാ സിയും.

൮൩൬. കമ്മട്ഠാനം ഗഹേത്വാന, ആചരിയസ്സ സന്തികേ;

വസന്തസ്സ കഥേതബ്ബം, ആഗതസ്സാഗതക്ഖണേ.

൮൩൭. ഉഗ്ഗഹേത്വാ പനഞ്ഞത്ര, ഗന്തുകാമസ്സ ഭിക്ഖുനോ;

നാതിസങ്ഖേപവിത്ഥാരം, കഥേതബ്ബം തു തേനപി.

൮൩൮. കമ്മട്ഠാനം ഗഹേത്വാന, സമ്മട്ഠാനം മനോഭുനോ;

അട്ഠാരസഹി ദോസേഹി, നിച്ചം പന വിവജ്ജിതേ.

൮൩൯. അനുരൂപേ വിഹാരസ്മിം, വിഹാതബ്ബം തു ഗാമതോ;

നാതിദൂരേ നച്ചാസന്നേ, സിവേ പഞ്ചങ്ഗസംയുതേ.

൮൪൦. ഖുദ്ദകോ പലിബോധോപി, ഛിന്ദിതബ്ബോ പനത്ഥി ചേ;

ദീഘാ കേസാ നഖാ ലോമാ, ഛിന്ദിതബ്ബാ വിഭാവിനാ.

൮൪൧. ചീവരം രജിതബ്ബം തം, കിലിട്ഠം തു സചേ സിയാ;

സചേ പത്തേ മലം ഹോതി, പചിതബ്ബോവ സുട്ഠു സോ.

൮൪൨. അച്ഛിന്നപലിബോധേന, പച്ഛാ തേന ച ഭിക്ഖുനാ;

പവിവിത്തേ പനോകാസേ, വസന്തേന യഥാസുഖം.

൮൪൩. വജ്ജേത്വാ മത്തികം നീലം, പീതം സേതഞ്ച ലോഹിതം;

സണ്ഹായാരുണവണ്ണായ, മത്തികായ മനോരമം.

൮൪൪. കത്തബ്ബം കസിണജ്ഝാനം, പത്തുകാമേന ധീമതാ;

സേനാസനേ വിവിത്തസ്മിം, ബഹിദ്ധാ വാപി താദിസേ.

൮൪൫. പടിച്ഛന്നേ പനട്ഠാനേ, പബ്ഭാരേ വാ ഗുഹന്തരേ;

സംഹാരിമം വാ കാതബ്ബം, തം തത്രട്ഠകമേവ വാ.

൮൪൬. സംഹാരിമം കരോന്തേന, ദണ്ഡകേസു ചതൂസ്വപി;

ചമ്മം വാ കടസാരം വാ, ദുസ്സപത്തമ്പി വാ തഥാ.

൮൪൭. ബന്ധിത്വാ തഥാ കാതബ്ബം, മത്തികായ പമാണതോ;

ഭൂമിയം പത്ഥരിത്വാ ച, ഓലോകേതബ്ബമേവ തം.

൮൪൮. തത്രട്ഠം ഭൂമിയം വട്ടം, ആകോടിത്വാന ഖാണുകേ;

വല്ലീഹി തം വിനന്ധിത്വാ, കാതബ്ബം കണ്ണികം സമം.

൮൪൯. വിത്ഥാരതോ പമാണേന, വിദത്ഥിചതുരങ്ഗുലം;

വട്ടം വത്തതി തം കാതും, വിവട്ടം പന മിച്ഛതാ.

൮൫൦. ഭേരീതലസമം സാധു, കത്വാ കസിണമണ്ഡലം;

സമ്മജ്ജിത്വാന തം ഠാനം, ന്ഹത്വാ ആഗമ്മ പണ്ഡിതോ.

൮൫൧. ഹത്ഥപാസപമാണസ്മിം, തമ്ഹാ കസിണമണ്ഡലാ;

പദേസേ തു സുപഞ്ഞത്തേ, ആസനസ്മിം സുഅത്ഥതേ.

൮൫൨. ഉച്ചേ തത്ഥ നിസീദിത്വാ, വിദത്ഥിചതുരങ്ഗുലേ;

ഉജുകായം പണിധായ, കത്വാ പരിമുഖം സതിം.

൮൫൩. കാമേസ്വാദീനവം ദിസ്വാ, നേക്ഖമ്മം ദട്ഠു ഖേമതോ;

പരമം പീതിപാമോജ്ജം, ജനേത്വാ രതനത്തയേ.

൮൫൪. ‘‘ഭാഗീ അസ്സമഹം അദ്ധാ, ഇമായ പടിപത്തിയാ;

പവിവേകസുഖസ്സാ’’തി, കത്വാ ഉസ്സാഹമുത്തമം.

൮൫൫. ആകാരേന സമേനേവ, ഉമ്മീലിത്വാന ലോചനം;

നിമിത്തം ഗണ്ഹതാ സാധു, ഭാവേതബ്ബം പുനപ്പുനം.

൮൫൬. ന വണ്ണോ പേക്ഖിതബ്ബോ സോ, ദട്ഠബ്ബം ന ച ലക്ഖണം;

വണ്ണം പന അമുഞ്ചിത്വാ, ഉസ്സദസ്സ വസേന ഹി.

൮൫൭. ചിത്തം പണ്ണത്തിധമ്മസ്മിം, ഠപേത്വേകഗ്ഗമാനസോ;

‘‘പഥവീ പഥവി’’ച്ചേവം, വത്വാ ഭാവേയ്യ പണ്ഡിതോ.

൮൫൮. പഥവീ മേദനീ ഭൂമി, വസുധാ ച വസുന്ധരാ;

ഏവം പഥവിനാമേസു, ഏകം വത്തുമ്പി വട്ടതി.

൮൫൯. ഉമ്മീലിത്വാ നിമീലിത്വാ, ആവജ്ജേയ്യ പുനപ്പുനം;

യാവുഗ്ഗഹനിമിത്തം തു, നുപ്പജ്ജതി ച താവ സോ.

൮൬൦. ഏവം ഭാവയതോ തസ്സ, പുന ഏകഗ്ഗചേതസോ;

യദാ പന നിമീലേത്വാ, ആവജ്ജന്തസ്സ യോഗിനോ.