൭. ബോധിപക്ഖിയവഗ്ഗോ

൧. സംയോജനസുത്തം

൫൩൧. സാവത്ഥിനിദാനം. ‘‘പഞ്ചിമാനി, ഭിക്ഖവേ, ഇന്ദ്രിയാനി ഭാവിതാനി ബഹുലീകതാനി സംയോജനപ്പഹാനായ [സംയോജനാനം പഹാനായ (സ്യാ. ക.)] സംവത്തന്തി. കതമാനി പഞ്ച? സദ്ധിന്ദ്രിയം…പേ… പഞ്ഞിന്ദ്രിയം – ഇമാനി ഖോ, ഭിക്ഖവേ, പഞ്ചിന്ദ്രിയാനി ഭാവിതാനി ബഹുലീകതാനി സംയോജനപ്പഹാനായ സംവത്തന്തീ’’തി. പഠമം.

൨. അനുസയസുത്തം

൫൩൨. ‘‘പഞ്ചിമാനി, ഭിക്ഖവേ, ഇന്ദ്രിയാനി ഭാവിതാനി ബഹുലീകതാനി അനുസയസമുഗ്ഘാതായ സംവത്തന്തി. കതമാനി പഞ്ച? സദ്ധിന്ദ്രിയം…പേ… പഞ്ഞിന്ദ്രിയം – ഇമാനി ഖോ, ഭിക്ഖവേ, പഞ്ചിന്ദ്രിയാനി ഭാവിതാനി ബഹുലീകതാനി അനുസയസമുഗ്ഘാതായ സംവത്തന്തീ’’തി. ദുതിയം.

൩. പരിഞ്ഞാസുത്തം

൫൩൩. ‘‘പഞ്ചിമാനി, ഭിക്ഖവേ, ഇന്ദ്രിയാനി ഭാവിതാനി ബഹുലീകതാനി അദ്ധാനപരിഞ്ഞായ സംവത്തന്തി. കതമാനി പഞ്ച? സദ്ധിന്ദ്രിയം…പേ… പഞ്ഞിന്ദ്രിയം – ഇമാനി ഖോ, ഭിക്ഖവേ, പഞ്ചിന്ദ്രിയാനി ഭാവിതാനി ബഹുലീകതാനി അദ്ധാനപരിഞ്ഞായ സംവത്തന്തീ’’തി. തതിയം.

൪. ആസവക്ഖയസുത്തം

൫൩൪. ‘‘പഞ്ചിമാനി, ഭിക്ഖവേ, ഇന്ദ്രിയാനി ഭാവിതാനി ബഹുലീകതാനി ആസവാനം ഖയായ സംവത്തന്തി. കതമാനി പഞ്ച? സദ്ധിന്ദ്രിയം…പേ… പഞ്ഞിന്ദ്രിയം – ഇമാനി ഖോ, ഭിക്ഖവേ, പഞ്ചിന്ദ്രിയാനി ഭാവിതാനി ബഹുലീകതാനി ആസവാനം ഖയായ സംവത്തന്തീ’’തി.

‘‘പഞ്ചിമാനി, ഭിക്ഖവേ, ഇന്ദ്രിയാനി ഭാവിതാനി ബഹുലീകതാനി സംയോജനപ്പഹാനായ സംവത്തന്തി, അനുസയസമുഗ്ഘാതായ സംവത്തന്തി, അദ്ധാനപരിഞ്ഞായ സംവത്തന്തി, ആസവാനം ഖയായ സംവത്തന്തി. കതമാനി പഞ്ച? സദ്ധിന്ദ്രിയം…പേ… പഞ്ഞിന്ദ്രിയം – ഇമാനി ഖോ, ഭിക്ഖവേ, പഞ്ചിന്ദ്രിയാനി ഭാവിതാനി ബഹുലീകതാനി സംയോജനപ്പഹാനായ സംവത്തന്തി, അനുസയസമുഗ്ഘാതായ സംവത്തന്തി, അദ്ധാനപരിഞ്ഞായ സംവത്തന്തി, ആസവാനം ഖയായ സംവത്തന്തീ’’തി. ചതുത്ഥം.

൫. പഠമഫലസുത്തം

൫൩൫. ‘‘പഞ്ചിമാനി, ഭിക്ഖവേ, ഇന്ദ്രിയാനി. കതമാനി പഞ്ച? സദ്ധിന്ദ്രിയം…പേ… പഞ്ഞിന്ദ്രിയം – ഇമാനി ഖോ, ഭിക്ഖവേ, പഞ്ചിന്ദ്രിയാനി. ഇമേസം ഖോ, ഭിക്ഖവേ, പഞ്ചന്നം ഇന്ദ്രിയാനം ഭാവിതത്താ ബഹുലീകതത്താ ദ്വിന്നം ഫലാനം അഞ്ഞതരം ഫലം പാടികങ്ഖം – ദിട്ഠേവ ധമ്മേ അഞ്ഞാ, സതി വാ ഉപാദിസേസേ അനാഗാമിതാ’’തി. പഞ്ചമം.

൬. ദുതിയഫലസുത്തം

൫൩൬. ‘‘പഞ്ചിമാനി, ഭിക്ഖവേ, ഇന്ദ്രിയാനി. കതമാനി പഞ്ച? സദ്ധിന്ദ്രിയം…പേ… പഞ്ഞിന്ദ്രിയം – ഇമാനി ഖോ, ഭിക്ഖവേ, പഞ്ചിന്ദ്രിയാനി. ഇമേസം ഖോ, ഭിക്ഖവേ, പഞ്ചന്നം ഇന്ദ്രിയാനം ഭാവിതത്താ ബഹുലീകതത്താ സത്ത ഫലാ സത്താനിസംസാ പാടികങ്ഖാ. കതമേ സത്ത ഫലാ സത്താനിസംസാ? ദിട്ഠേവ ധമ്മേ പടികച്ച അഞ്ഞം ആരാധേതി, നോ ചേ ദിട്ഠേവ ധമ്മേ പടികച്ച അഞ്ഞം ആരാധേതി, അഥ മരണകാലേ അഞ്ഞം ആരാധേതി. നോ ചേ ദിട്ഠേവ ധമ്മേ അഞ്ഞം ആരാധേതി, നോ ചേ മരണകാലേ അഞ്ഞം ആരാധേതി, അഥ പഞ്ചന്നം ഓരമ്ഭാഗിയാനം സംയോജനാനം പരിക്ഖയാ അന്തരാപരിനിബ്ബായീ ഹോതി, ഉപഹച്ചപരിനിബ്ബായീ ഹോതി, അസങ്ഖാരപരിനിബ്ബായീ ഹോതി, സസങ്ഖാരപരിനിബ്ബായീ ഹോതി, ഉദ്ധംസോതോ ഹോതി അകനിട്ഠഗാമീ. ഇമേസം ഖോ, ഭിക്ഖവേ, പഞ്ചന്നം ഇന്ദ്രിയാനം ഭാവിതത്താ ബഹുലീകതത്താ ഇമേ സത്ത ഫലാ സത്താനിസംസാ പാടികങ്ഖാ’’തി. ഛട്ഠം.

൭. പഠമരുക്ഖസുത്തം

൫൩൭. ‘‘സേയ്യഥാപി ഭിക്ഖവേ, യേ കേചി ജമ്ബുദീപകാ രുക്ഖാ, ജമ്ബൂ തേസം അഗ്ഗമക്ഖായതി; ഏവമേവ ഖോ ഭിക്ഖവേ, യേ കേചി ബോധിപക്ഖിയാ ധമ്മാ, പഞ്ഞിന്ദ്രിയം തേസം അഗ്ഗമക്ഖായതി, യദിദം – ബോധായ. കതമേ ച, ഭിക്ഖവേ, ബോധിപക്ഖിയാ ധമ്മാ? സദ്ധിന്ദ്രിയം, ഭിക്ഖവേ, ബോധിപക്ഖിയോ ധമ്മോ, തം ബോധായ സംവത്തതി. വീരിയിന്ദ്രിയം…പേ… സതിന്ദ്രിയം…പേ… സമാധിന്ദ്രിയം…പേ… പഞ്ഞിന്ദ്രിയം ബോധിപക്ഖിയോ ധമ്മോ, തം ബോധായ സംവത്തതി. സേയ്യഥാപി, ഭിക്ഖവേ, യേ കേചി ജമ്ബുദീപകാ രുക്ഖാ, ജമ്ബൂ തേസം അഗ്ഗമക്ഖായതി; ഏവമേവ ഖോ, ഭിക്ഖവേ, യേ കേചി ബോധിപക്ഖിയാ ധമ്മാ, പഞ്ഞിന്ദ്രിയം തേസം അഗ്ഗമക്ഖായതി, യദിദം – ബോധായാ’’തി. സത്തമം.

൮. ദുതിയരുക്ഖസുത്തം

൫൩൮. ‘‘സേയ്യഥാപി, ഭിക്ഖവേ, യേ കേചി ദേവാനം താവതിംസാനം രുക്ഖാ, പാരിഛത്തകോ തേസം അഗ്ഗമക്ഖായതി; ഏവമേവ ഖോ, ഭിക്ഖവേ, യേ കേചി ബോധിപക്ഖിയാ ധമ്മാ, പഞ്ഞിന്ദ്രിയം തേസം അഗ്ഗമക്ഖായതി, യദിദം – ബോധായ. കതമേ ച, ഭിക്ഖവേ, ബോധിപക്ഖിയാ ധമ്മാ? സദ്ധിന്ദ്രിയം, ഭിക്ഖവേ, ബോധിപക്ഖിയോ ധമ്മോ, തം ബോധായ സംവത്തതി. വീരിയിന്ദ്രിയം…പേ… സതിന്ദ്രിയം…പേ… സമാധിന്ദ്രിയം…പേ… പഞ്ഞിന്ദ്രിയം ബോധിപക്ഖിയോ ധമ്മോ, തം ബോധായ സംവത്തതി. സേയ്യഥാപി, ഭിക്ഖവേ, യേ കേചി ദേവാനം താവതിംസാനം രുക്ഖാ, പാരിഛത്തകോ തേസം അഗ്ഗമക്ഖായതി; ഏവമേവ ഖോ, ഭിക്ഖവേ, യേ കേചി ബോധിപക്ഖിയാ ധമ്മാ, പഞ്ഞിന്ദ്രിയം തേസം അഗ്ഗമക്ഖായതി, യദിദം – ബോധായാ’’തി. അട്ഠമം.

൯. തതിയരുക്ഖസുത്തം

൫൩൯. ‘‘സേയ്യഥാപി, ഭിക്ഖവേ, യേ കേചി അസുരാനം രുക്ഖാ, ചിത്തപാടലി തേസം അഗ്ഗമക്ഖായതി; ഏവമേവ ഖോ, ഭിക്ഖവേ, യേ കേചി ബോധിപക്ഖിയാ ധമ്മാ, പഞ്ഞിന്ദ്രിയം തേസം അഗ്ഗമക്ഖായതി, യദിദം – ബോധായ. കതമേ ച, ഭിക്ഖവേ, ബോധിപക്ഖിയാ ധമ്മാ? സദ്ധിന്ദ്രിയം, ഭിക്ഖവേ, ബോധിപക്ഖിയോ ധമ്മോ, തം ബോധായ സംവത്തതി…പേ… പഞ്ഞിന്ദ്രിയം ബോധിപക്ഖിയോ ധമ്മോ, തം ബോധായ സംവത്തതി. സേയ്യഥാപി ഭിക്ഖവേ, യേ കേചി അസുരാനം രുക്ഖാ, ചിത്തപാടലി തേസം അഗ്ഗമക്ഖായതി; ഏവമേവ ഖോ, ഭിക്ഖവേ, യേ കേചി ബോധിപക്ഖിയാ ധമ്മാ, പഞ്ഞിന്ദ്രിയം തേസം അഗ്ഗമക്ഖായതി, യദിദം – ബോധായാ’’തി. നവമം.

൧൦. ചതുത്ഥരുക്ഖസുത്തം

൫൪൦. ‘‘സേയ്യഥാപി, ഭിക്ഖവേ, യേ കേചി സുപണ്ണാനം രുക്ഖാ, കൂടസിമ്ബലീ [കോടസിമ്ബലി (സ്യാ. കം.)] തേസം അഗ്ഗമക്ഖായതി; ഏവമേവ ഖോ, ഭിക്ഖവേ, യേ കേചി ബോധിപക്ഖിയാ ധമ്മാ, പഞ്ഞിന്ദ്രിയം തേസം അഗ്ഗമക്ഖായതി, യദിദം – ബോധായ. കതമേ ച, ഭിക്ഖവേ, ബോധിപക്ഖിയാ ധമ്മാ? സദ്ധിന്ദ്രിയം, ഭിക്ഖവേ, ബോധിപക്ഖിയോ ധമ്മോ, തം ബോധായ സംവത്തതി…പേ… പഞ്ഞിന്ദ്രിയം ബോധിപക്ഖിയോ ധമ്മോ, തം ബോധായ സംവത്തതി. സേയ്യഥാപി, ഭിക്ഖവേ, യേ കേചി സുപണ്ണാനം രുക്ഖാ, കൂടസിമ്ബലീ തേസം അഗ്ഗമക്ഖായതി; ഏവമേവ ഖോ, ഭിക്ഖവേ, യേ കേചി ബോധിപക്ഖിയാ ധമ്മാ, പഞ്ഞിന്ദ്രിയം തേസം അഗ്ഗമക്ഖായതി, യദിദം – ബോധായാ’’തി. ദസമം.

ബോധിപക്ഖിയവഗ്ഗോ സത്തമോ.

തസ്സുദ്ദാനം –

സംയോജനാ അനുസയാ, പരിഞ്ഞാ ആസവക്ഖയാ;

ദ്വേ ഫലാ ചതുരോ രുക്ഖാ, വഗ്ഗോ തേന പവുച്ചതീതി.