൧൦. നിരോധസുത്തം

൨൫൭. ‘‘നിരോധസഞ്ഞാ, ഭിക്ഖവേ, ഭാവിതാ ബഹുലീകതാ മഹപ്ഫലാ ഹോതി മഹാനിസംസാ. കഥം ഭാവിതാ ച, ഭിക്ഖവേ, നിരോധസഞ്ഞാ കഥം ബഹുലീകതാ മഹപ്ഫലാ ഹോതി മഹാനിസംസാ? ഇധ, ഭിക്ഖവേ, ഭിക്ഖു നിരോധസഞ്ഞാസഹഗതം സതിസമ്ബോജ്ഝങ്ഗം ഭാവേതി…പേ… നിരോധസഞ്ഞാസഹഗതം ഉപേക്ഖാസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഭാവിതാ ഖോ, ഭിക്ഖവേ, നിരോധസഞ്ഞാ ഏവം ബഹുലീകതാ മഹപ്ഫലാ ഹോതി മഹാനിസംസാതി.

‘‘നിരോധസഞ്ഞായ, ഭിക്ഖവേ, ഭാവിതായ ബഹുലീകതായ ദ്വിന്നം ഫലാനം അഞ്ഞതരം ഫലം പാടികങ്ഖം – ദിട്ഠേവ ധമ്മേ അഞ്ഞാ, സതി വാ ഉപാദിസേസേ അനാഗാമിതാ. കഥം ഭാവിതായ, ഭിക്ഖവേ, നിരോധസഞ്ഞായ കഥം ബഹുലീകതായ ദ്വിന്നം ഫലാനം അഞ്ഞതരം ഫലം പാടികങ്ഖം – ദിട്ഠേവ ധമ്മേ അഞ്ഞാ, സതി വാ ഉപാദിസേസേ അനാഗാമിതാ? ഇധ, ഭിക്ഖവേ, ഭിക്ഖു നിരോധസഞ്ഞാസഹഗതം സതിസമ്ബോജ്ഝങ്ഗം ഭാവേതി…പേ… നിരോധസഞ്ഞാസഹഗതം ഉപേക്ഖാസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഭാവിതായ ഖോ, ഭിക്ഖവേ, നിരോധസഞ്ഞായ ഏവം ബഹുലീകതായ ദ്വിന്നം ഫലാനം അഞ്ഞതരം ഫലം പാടികങ്ഖം – ദിട്ഠേവ ധമ്മേ അഞ്ഞാ, സതി വാ ഉപാദിസേസേ അനാഗാമിതാ’’തി.

‘‘നിരോധസഞ്ഞാ, ഭിക്ഖവേ, ഭാവിതാ ബഹുലീകതാ മഹതോ അത്ഥായ സംവത്തതി, മഹതോ യോഗക്ഖേമായ സംവത്തതി, മഹതോ സംവേഗായ സംവത്തതി, മഹതോ ഫാസുവിഹാരായ സംവത്തതി. കഥം ഭാവിതാ ച, ഭിക്ഖവേ, നിരോധസഞ്ഞാ കഥം ബഹുലീകതാ മഹതോ അത്ഥായ സംവത്തതി, മഹതോ യോഗക്ഖേമായ സംവത്തതി, മഹതോ സംവേഗായ സംവത്തതി, മഹതോ ഫാസുവിഹാരായ സംവത്തതി? ഇധ, ഭിക്ഖവേ, ഭിക്ഖു നിരോധസഞ്ഞാസഹഗതം സതിസമ്ബോജ്ഝങ്ഗം ഭാവേതി…പേ… നിരോധസഞ്ഞാസഹഗതം ഉപേക്ഖാസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഭാവിതാ ഖോ, ഭിക്ഖവേ, നിരോധസഞ്ഞാ ഏവം ബഹുലീകതാ മഹതോ അത്ഥായ സംവത്തതി, മഹതോ യോഗക്ഖേമായ സംവത്തതി, മഹതോ സംവേഗായ സംവത്തതി, മഹതോ ഫാസുവിഹാരായ സംവത്തതീ’’തി. ദസമം.

നിരോധവഗ്ഗോ അട്ഠമോ.

തസ്സുദ്ദാനം –

അസുഭമരണആഹാരേ, പടികൂലഅനഭിരതേന [പടികൂലേന ച സബ്ബലോകേ (സ്യാ.)];

അനിച്ചദുക്ഖഅനത്തപഹാനം, വിരാഗനിരോധേന തേ ദസാതി.