൧. അട്ഠികമഹപ്ഫലസുത്തം

൨൩൮. സാവത്ഥിനിദാനം. ‘‘അട്ഠികസഞ്ഞാ, ഭിക്ഖവേ, ഭാവിതാ ബഹുലീകതാ മഹപ്ഫലാ ഹോതി മഹാനിസംസാ. കഥം ഭാവിതാ ച, ഭിക്ഖവേ, അട്ഠികസഞ്ഞാ കഥം ബഹുലീകതാ മഹപ്ഫലാ ഹോതി മഹാനിസംസാ? ഇധ, ഭിക്ഖവേ, ഭിക്ഖു അട്ഠികസഞ്ഞാസഹഗതം സതിസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം…പേ… അട്ഠികസഞ്ഞാസഹഗതം ഉപേക്ഖാസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഭാവിതാ ഖോ, ഭിക്ഖവേ, അട്ഠികസഞ്ഞാ ഏവം ബഹുലീകതാ മഹപ്ഫലാ ഹോതി മഹാനിസംസാ’’തി.

അഞ്ഞതരഫലസുത്തം

‘‘അട്ഠികസഞ്ഞായ, ഭിക്ഖവേ, ഭാവിതായ ബഹുലീകതായ ദ്വിന്നം ഫലാനം അഞ്ഞതരം ഫലം പാടികങ്ഖം – ദിട്ഠേവ ധമ്മേ അഞ്ഞാ, സതി വാ ഉപാദിസേസേ അനാഗാമിതാ. കഥം ഭാവിതായ ച ഖോ, ഭിക്ഖവേ, അട്ഠികസഞ്ഞായ കഥം ബഹുലീകതായ ദ്വിന്നം ഫലാനം അഞ്ഞതരം ഫലം പാടികങ്ഖം – ദിട്ഠേവ ധമ്മേ അഞ്ഞാ, സതി വാ ഉപാദിസേസേ അനാഗാമിതാ? ഇധ, ഭിക്ഖവേ, ഭിക്ഖു അട്ഠികസഞ്ഞാസഹഗതം സതിസമ്ബോജ്ഝങ്ഗം ഭാവേതി…പേ… അട്ഠികസഞ്ഞാസഹഗതം ഉപേക്ഖാസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഭാവിതായ ഖോ, ഭിക്ഖവേ, അട്ഠികസഞ്ഞായ ഏവം ബഹുലീകതായ ദ്വിന്നം ഫലാനം അഞ്ഞതരം ഫലം പാടികങ്ഖം – ദിട്ഠേവ ധമ്മേ അഞ്ഞാ, സതി വാ ഉപാദിസേസേ അനാഗാമിതാ’’തി.

മഹത്ഥസുത്തം

‘‘അട്ഠികസഞ്ഞാ, ഭിക്ഖവേ, ഭാവിതാ ബഹുലീകതാ മഹതോ അത്ഥായ സംവത്തതി. കഥം ഭാവിതാ ച, ഭിക്ഖവേ, അട്ഠികസഞ്ഞാ കഥം ബഹുലീകതാ മഹതോ അത്ഥായ സംവത്തതി? ഇധ, ഭിക്ഖവേ, ഭിക്ഖു അട്ഠികസഞ്ഞാസഹഗതം സതിസമ്ബോജ്ഝങ്ഗം ഭാവേതി…പേ… അട്ഠികസഞ്ഞാസഹഗതം ഉപേക്ഖാസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഭാവിതാ ഖോ, ഭിക്ഖവേ, അട്ഠികസഞ്ഞാ ഏവം ബഹുലീകതാ മഹതോ അത്ഥായ സംവത്തതീ’’തി.

യോഗക്ഖേമസുത്തം

‘‘അട്ഠികസഞ്ഞാ, ഭിക്ഖവേ, ഭാവിതാ ബഹുലീകതാ മഹതോ യോഗക്ഖേമായ സംവത്തതി. കഥം ഭാവിതാ ച, ഭിക്ഖവേ, അട്ഠികസഞ്ഞാ കഥം ബഹുലീകതാ മഹതോ യോഗക്ഖേമായ സംവത്തതി? ഇധ, ഭിക്ഖവേ, ഭിക്ഖു അട്ഠികസഞ്ഞാസഹഗതം സതിസമ്ബോജ്ഝങ്ഗം ഭാവേതി…പേ… അട്ഠികസഞ്ഞാസഹഗതം ഉപേക്ഖാസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഭാവിതാ ഖോ, ഭിക്ഖവേ, അട്ഠികസഞ്ഞാ ഏവം ബഹുലീകതാ മഹതോ യോഗക്ഖേമായ സംവത്തതീ’’തി.

സംവേഗസുത്തം

‘‘അട്ഠികസഞ്ഞാ, ഭിക്ഖവേ, ഭാവിതാ ബഹുലീകതാ മഹതോ സംവേഗായ സംവത്തതി. കഥം ഭാവിതാ ച, ഭിക്ഖവേ, അട്ഠികസഞ്ഞാ കഥം ബഹുലീകതാ മഹതോ സംവേഗായ സംവത്തതി? ഇധ, ഭിക്ഖവേ, ഭിക്ഖു അട്ഠികസഞ്ഞാസഹഗതം സതിസമ്ബോജ്ഝങ്ഗം ഭാവേതി…പേ… അട്ഠികസഞ്ഞാസഹഗതം ഉപേക്ഖാസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഭാവിതാ ഖോ, ഭിക്ഖവേ, അട്ഠികസഞ്ഞാ ഏവം ബഹുലീകതാ മഹതോ സംവേഗായ സംവത്തതീ’’തി.

ഫാസുവിഹാരസുത്തം

‘‘അട്ഠികസഞ്ഞാ, ഭിക്ഖവേ, ഭാവിതാ ബഹുലീകതാ മഹതോ ഫാസുവിഹാരായ സംവത്തതി. കഥം ഭാവിതാ ച, ഭിക്ഖവേ, അട്ഠികസഞ്ഞാ കഥം ബഹുലീകതാ മഹതോ ഫാസുവിഹാരായ സംവത്തതി? ഇധ, ഭിക്ഖവേ, ഭിക്ഖു അട്ഠികസഞ്ഞാസഹഗതം സതിസമ്ബോജ്ഝങ്ഗം ഭാവേതി…പേ… അട്ഠികസഞ്ഞാസഹഗതം ഉപേക്ഖാസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഭാവിതാ ഖോ, ഭിക്ഖവേ, അട്ഠികസഞ്ഞാ ഏവം ബഹുലീകതാ മഹതോ ഫാസുവിഹാരായ സംവത്തതീ’’തി. പഠമം.