൧൩. ഓഘവഗ്ഗോ

൧-൮. ഓഘാദിസുത്തം

൩൦൨. ‘‘ചത്താരോമേ ഭിക്ഖവേ, ഓഘാ. കതമേ ചത്താരോ? കാമോഘോ, ഭവോഘോ, ദിട്ഠോഘോ, അവിജ്ജോഘോതി വിത്ഥാരേതബ്ബം.

൧൦. ഉദ്ധമ്ഭാഗിയസുത്തം

൩൧൧. സാവത്ഥിനിദാനം. ‘‘പഞ്ചിമാനി, ഭിക്ഖവേ, ഉദ്ധമ്ഭാഗിയാനി സംയോജനാനി. കതമാനി പഞ്ച? രൂപരാഗോ, അരൂപരാഗോ, മാനോ, ഉദ്ധച്ചം, അവിജ്ജാ – ഇമാനി ഖോ, ഭിക്ഖവേ, പഞ്ചുദ്ധമ്ഭാഗിയാനി സംയോജനാനി. ഇമേസം ഖോ, ഭിക്ഖവേ, പഞ്ചന്നം ഉദ്ധമ്ഭാഗിയാനം സംയോജനാനം അഭിഞ്ഞായ പരിഞ്ഞായ പരിക്ഖയായ പഹാനായ സത്ത ബോജ്ഝങ്ഗാ ഭാവേതബ്ബാ. കതമേ സത്ത? ഇധ, ഭിക്ഖവേ, ഭിക്ഖു സതിസമ്ബോജ്ഝങ്ഗം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം…പേ… ഉപേക്ഖാസമ്ബോജ്ഝങ്ഗം ഭാവേതി രാഗവിനയപരിയോസാനം ദോസവിനയപരിയോസാനം മോഹവിനയപരിയോസാനം… അമതോഗധം അമതപരായനം അമതപരിയോസാനം… നിബ്ബാനനിന്നം നിബ്ബാനപോണം നിബ്ബാനപബ്ഭാരം. ഇമേസം ഖോ, ഭിക്ഖവേ, ഭിക്ഖു പഞ്ചന്നം ഉദ്ധമ്ഭാഗിയാനം സംയോജനാനം അഭിഞ്ഞായ പരിഞ്ഞായ പരിക്ഖയായ പഹാനായ ഇമേ സത്ത ബോജ്ഝങ്ഗാ ഭാവേതബ്ബാ’’തി. ദസമം.

ഓഘവഗ്ഗോ തേരസമോ.

തസ്സുദ്ദാനം –

ഓഘോ യോഗോ ഉപാദാനം, ഗന്ഥാ അനുസയേന ച;

കാമഗുണാ നീവരണാ, ഖന്ധാ ഓരുദ്ധമ്ഭാഗിയാനീതി.