൪. കൂടാഗാരസുത്തം

൧൧൧൪. ‘‘യോ ഹി, ഭിക്ഖവേ [യോ ച ഖോ ഭിക്ഖവേ (സ്യാ. ക.)], ഏവം വദേയ്യ – ‘അഹം ദുക്ഖം അരിയസച്ചം യഥാഭൂതം അനഭിസമേച്ച…പേ… ദുക്ഖനിരോധഗാമിനിം പടിപദം അരിയസച്ചം യഥാഭൂതം അനഭിസമേച്ച സമ്മാ ദുക്ഖസ്സന്തം കരിസ്സാമീ’തി – നേതം ഠാനം വിജ്ജതി.

‘‘സേയ്യഥാപി, ഭിക്ഖവേ, യോ ഏവം വദേയ്യ – ‘അഹം കൂടാഗാരസ്സ ഹേട്ഠിമം ഘരം അകരിത്വാ ഉപരിമം ഘരം ആരോപേസ്സാമീ’തി – നേതം ഠാനം വിജ്ജതി; ഏവമേവ ഖോ, ഭിക്ഖവേ, യോ ഏവം വദേയ്യ – ‘അഹം ദുക്ഖം അരിയസച്ചം യഥാഭൂതം അനഭിസമേച്ച…പേ… ദുക്ഖനിരോധഗാമിനിം പടിപദം അരിയസച്ചം യഥാഭൂതം അനഭിസമേച്ച സമ്മാ ദുക്ഖസ്സന്തം കരിസ്സാമീ’തി – നേതം ഠാനം വിജ്ജതി.

‘‘യോ ച ഖോ, ഭിക്ഖവേ, ഏവം വദേയ്യ – ‘അഹം ദുക്ഖം അരിയസച്ചം യഥാഭൂതം അഭിസമേച്ച…പേ… ദുക്ഖനിരോധഗാമിനിം പടിപദം അരിയസച്ചം യഥാഭൂതം അഭിസമേച്ച സമ്മാ ദുക്ഖസ്സന്തം കരിസ്സാമീ’തി – ഠാനമേതം വിജ്ജതി.

‘‘സേയ്യഥാപി, ഭിക്ഖവേ, യോ ഏവം വദേയ്യ – ‘അഹം കൂടാഗാരസ്സ ഹേട്ഠിമം ഘരം കരിത്വാ ഉപരിമം ഘരം ആരോപേസ്സാമീ’തി – ഠാനമേതം വിജ്ജതി; ഏവമേവ ഖോ, ഭിക്ഖവേ, യോ ഏവം വദേയ്യ – ‘അഹം ദുക്ഖം അരിയസച്ചം യഥാഭൂതം അഭിസമേച്ച…പേ… ദുക്ഖനിരോധഗാമിനിം പടിപദം അരിയസച്ചം യഥാഭൂതം അഭിസമേച്ച സമ്മാ ദുക്ഖസ്സന്തം കരിസ്സാമീ’തി – ഠാനമേതം വിജ്ജതി.

‘‘തസ്മാതിഹ, ഭിക്ഖവേ, ‘ഇദം ദുക്ഖ’ന്തി യോഗോ കരണീയോ…പേ… ‘അയം ദുക്ഖനിരോധഗാമിനീ പടിപദാ’തി യോഗോ കരണീയോ’’തി. ചതുത്ഥം.