൯. പഠമഹത്ഥപാദോപമസുത്തം

൨൩൬. ‘‘ഹത്ഥേസു, ഭിക്ഖവേ, സതി ആദാനനിക്ഖേപനം പഞ്ഞായതി; പാദേസു സതി അഭിക്കമപടിക്കമോ പഞ്ഞായതി; പബ്ബേസു സതി സമിഞ്ജനപസാരണം പഞ്ഞായതി; കുച്ഛിസ്മിം സതി ജിഘച്ഛാ പിപാസാ പഞ്ഞായതി. ഏവമേവ ഖോ, ഭിക്ഖവേ, ചക്ഖുസ്മിം സതി ചക്ഖുസമ്ഫസ്സപച്ചയാ ഉപ്പജ്ജതി അജ്ഝത്തം സുഖം ദുക്ഖം…പേ… ജിവ്ഹായ സതി ജിവ്ഹാസമ്ഫസ്സപച്ചയാ ഉപ്പജ്ജതി അജ്ഝത്തം സുഖം ദുക്ഖം…പേ… മനസ്മിം സതി മനോസമ്ഫസ്സപച്ചയാ ഉപ്പജ്ജതി അജ്ഝത്തം സുഖം ദുക്ഖം…പേ….

‘‘ഹത്ഥേസു, ഭിക്ഖവേ, അസതി ആദാനനിക്ഖേപനം ന പഞ്ഞായതി; പാദേസു അസതി അഭിക്കമപടിക്കമോ ന പഞ്ഞായതി; പബ്ബേസു അസതി സമിഞ്ജനപസാരണം ന പഞ്ഞായതി; കുച്ഛിസ്മിം അസതി ജിഘച്ഛാ പിപാസാ ന പഞ്ഞായതി. ഏവമേവ ഖോ, ഭിക്ഖവേ, ചക്ഖുസ്മിം അസതി ചക്ഖുസമ്ഫസ്സപച്ചയാ നുപ്പജ്ജതി അജ്ഝത്തം സുഖം ദുക്ഖം…പേ… ജിവ്ഹായ അസതി ജിവ്ഹാസമ്ഫസ്സപച്ചയാ നുപ്പജ്ജതി…പേ… മനസ്മിം അസതി മനോസമ്ഫസ്സപച്ചയാ നുപ്പജ്ജതി അജ്ഝത്തം സുഖം ദുക്ഖ’’ന്തി. നവമം.