൧. യോഗക്ഖേമിസുത്തം

൧൦൪. സാവത്ഥിനിദാനം. ‘‘യോഗക്ഖേമിപരിയായം വോ, ഭിക്ഖവേ, ധമ്മപരിയായം ദേസേസ്സാമി. തം സുണാഥ. കതമോ ച, ഭിക്ഖവേ, യോഗക്ഖേമിപരിയായോ ധമ്മപരിയായോ? സന്തി, ഭിക്ഖവേ, ചക്ഖുവിഞ്ഞേയ്യാ രൂപാ ഇട്ഠാ കന്താ മനാപാ പിയരൂപാ കാമൂപസംഹിതാ രജനീയാ. തേ തഥാഗതസ്സ പഹീനാ ഉച്ഛിന്നമൂലാ താലാവത്ഥുകതാ അനഭാവങ്കതാ ആയതിം അനുപ്പാദധമ്മാ. തേസഞ്ച പഹാനായ അക്ഖാസി യോഗം, തസ്മാ തഥാഗതോ ‘യോഗക്ഖേമീ’തി വുച്ചതി…പേ… സന്തി, ഭിക്ഖവേ, മനോവിഞ്ഞേയ്യാ ധമ്മാ ഇട്ഠാ കന്താ മനാപാ പിയരൂപാ കാമൂപസംഹിതാ രജനീയാ. തേ തഥാഗതസ്സ പഹീനാ ഉച്ഛിന്നമൂലാ താലാവത്ഥുകതാ അനഭാവങ്കതാ ആയതിം അനുപ്പാദധമ്മാ. തേസഞ്ച പഹാനായ അക്ഖാസി യോഗം, തസ്മാ തഥാഗതോ ‘യോഗക്ഖേമീ’തി വുച്ചതി. അയം ഖോ, ഭിക്ഖവേ, യോഗക്ഖേമിപരിയായോ ധമ്മപരിയായോ’’തി. പഠമം.