൮. രജനീയസണ്ഠിതസുത്തം

൭൦. സാവത്ഥിനിദാനം. അഥ ഖോ അഞ്ഞതരോ ഭിക്ഖു…പേ… ഏകമന്തം നിസിന്നോ ഖോ സോ ഭിക്ഖു ഭഗവന്തം ഏതദവോച – ‘‘സാധു മേ, ഭന്തേ, ഭഗവാ സംഖിത്തേന ധമ്മം ദേസേതു, യമഹം ഭഗവതോ ധമ്മം സുത്വാ…പേ… വിഹരേയ്യ’’ന്തി. ‘‘യം ഖോ, ഭിക്ഖു, രജനീയസണ്ഠിതം; തത്ര തേ ഛന്ദോ പഹാതബ്ബോ’’തി. ‘‘അഞ്ഞാതം, ഭഗവാ; അഞ്ഞാതം, സുഗതാ’’തി.

‘‘യഥാ കഥം പന ത്വം, ഭിക്ഖു, മയാ സംഖിത്തേന ഭാസിതസ്സ വിത്ഥാരേന അത്ഥം ആജാനാസീ’’തി? ‘‘രൂപം ഖോ, ഭന്തേ, രജനീയസണ്ഠിതം; തത്ര മേ ഛന്ദോ പഹാതബ്ബോ. വേദനാ… സഞ്ഞാ… സങ്ഖാരാ… വിഞ്ഞാണം രജനീയസണ്ഠിതം; തത്ര മേ ഛന്ദോ പഹാതബ്ബോ. ഇമസ്സ ഖ്വാഹം, ഭന്തേ, ഭഗവതാ സംഖിത്തേന ഭാസിതസ്സ ഏവം വിത്ഥാരേന അത്ഥം ആജാനാമീ’’തി.

‘‘സാധു സാധു ഭിക്ഖു! സാധു ഖോ ത്വം, ഭിക്ഖു, മയാ സംഖിത്തേന ഭാസിതസ്സ വിത്ഥാരേന അത്ഥം ആജാനാസി. രൂപം ഖോ, ഭിക്ഖു, രജനീയസണ്ഠിതം; തത്ര തേ ഛന്ദോ പഹാതബ്ബോ. വേദനാ… സഞ്ഞാ… സങ്ഖാരാ… വിഞ്ഞാണം രജനീയസണ്ഠിതം; തത്ര തേ ഛന്ദോ പഹാതബ്ബോ. ഇമസ്സ ഖോ, ഭിക്ഖു, മയാ സംഖിത്തേന ഭാസിതസ്സ ഏവം വിത്ഥാരേന അത്ഥോ ദട്ഠബ്ബോ’’തി…പേ… അഞ്ഞതരോ ച പന സോ ഭിക്ഖു അരഹതം അഹോസീതി. അട്ഠമം.