൨. മഞ്ഞമാനസുത്തം

൬൪. സാവത്ഥിനിദാനം. അഥ ഖോ അഞ്ഞതരോ ഭിക്ഖു…പേ… ഏകമന്തം നിസിന്നോ ഖോ സോ ഭിക്ഖു ഭഗവന്തം ഏതദവോച – ‘‘സാധു മേ, ഭന്തേ, ഭഗവാ സംഖിത്തേന ധമ്മം ദേസേതു…പേ… ആതാപീ പഹിതത്തോ വിഹരേയ്യ’’ന്തി. ‘‘മഞ്ഞമാനോ ഖോ, ഭിക്ഖു, ബദ്ധോ മാരസ്സ; അമഞ്ഞമാനോ മുത്തോ പാപിമതോ’’തി. ‘‘അഞ്ഞാതം ഭഗവാ, അഞ്ഞാതം സുഗതാ’’തി.

‘‘യഥാ കഥം പന ത്വം, ഭിക്ഖു, മയാ സംഖിത്തേന ഭാസിതസ്സ വിത്ഥാരേന അത്ഥം ആജാനാസീ’’തി? ‘‘രൂപം ഖോ, ഭന്തേ, മഞ്ഞമാനോ ബദ്ധോ മാരസ്സ; അമഞ്ഞമാനോ മുത്തോ പാപിമതോ. വേദനം… സഞ്ഞം… സങ്ഖാരേ… വിഞ്ഞാണം മഞ്ഞമാനോ ബദ്ധോ മാരസ്സ; അമഞ്ഞമാനോ മുത്തോ പാപിമതോ. ഇമസ്സ ഖ്വാഹം, ഭന്തേ, ഭഗവതാ സംഖിത്തേന ഭാസിതസ്സ ഏവം വിത്ഥാരേന അത്ഥം ആജാനാമീ’’തി.

‘‘സാധു സാധു, ഭിക്ഖു! സാധു ഖോ ത്വം, ഭിക്ഖു, മയാ സംഖിത്തേന ഭാസിതസ്സ വിത്ഥാരേന അത്ഥം ആജാനാസി. രൂപം ഖോ, ഭിക്ഖു, മഞ്ഞമാനോ ബദ്ധോ മാരസ്സ; അമഞ്ഞമാനോ മുത്തോ പാപിമതോ. വേദനം… സഞ്ഞം… സങ്ഖാരേ… വിഞ്ഞാണം മഞ്ഞമാനോ ബദ്ധോ മാരസ്സ; അമഞ്ഞമാനോ മുത്തോ പാപിമതോ. ഇമസ്സ ഖോ, ഭിക്ഖു, മയാ സംഖിത്തേന ഭാസിതസ്സ ഏവം വിത്ഥാരേന അത്ഥോ ദട്ഠബ്ബോ’’തി…പേ… അഞ്ഞതരോ ച പന സോ ഭിക്ഖു അരഹതം അഹോസീതി. ദുതിയം.