൫. നഖസിഖാസുത്തം

൯൭. സാവത്ഥിനിദാനം. ഏകമന്തം നിസിന്നോ ഖോ സോ ഭിക്ഖു ഭഗവന്തം ഏതദവോച – ‘‘അത്ഥി നു ഖോ, ഭന്തേ, കിഞ്ചി രൂപം യം രൂപം നിച്ചം ധുവം സസ്സതം അവിപരിണാമധമ്മം സസ്സതിസമം തഥേവ ഠസ്സതി? അത്ഥി നു ഖോ, ഭന്തേ, കാചി വേദനാ യാ വേദനാ നിച്ചാ ധുവാ സസ്സതാ അവിപരിണാമധമ്മാ സസ്സതിസമം തഥേവ ഠസ്സതി? അത്ഥി നു ഖോ, ഭന്തേ, കാചി സഞ്ഞാ…പേ… കേചി സങ്ഖാരാ, യേ സങ്ഖാരാ നിച്ചാ ധുവാ സസ്സതാ അവിപരിണാമധമ്മാ സസ്സതിസമം തഥേവ ഠസ്സന്തി? അത്ഥി നു ഖോ, ഭന്തേ, കിഞ്ചി വിഞ്ഞാണം, യം വിഞ്ഞാണം നിച്ചം ധുവം സസ്സതം അവിപരിണാമധമ്മം സസ്സതിസമം തഥേവ ഠസ്സതീ’’തി? ‘‘നത്ഥി ഖോ, ഭിക്ഖു, കിഞ്ചി രൂപം, യം രൂപം നിച്ചം ധുവം സസ്സതം അവിപരിണാമധമ്മം സസ്സതിസമം തഥേവ ഠസ്സതി. നത്ഥി ഖോ, ഭിക്ഖു, കാചി വേദനാ… കാചി സഞ്ഞാ… കേചി സങ്ഖാരാ…പേ… കിഞ്ചി വിഞ്ഞാണം, യം വിഞ്ഞാണം നിച്ചം ധുവം സസ്സതം അവിപരിണാമധമ്മം സസ്സതിസമം തഥേവ ഠസ്സതീ’’തി.

അഥ ഖോ ഭഗവാ പരിത്തം നഖസിഖായം പംസും ആരോപേത്വാ തം ഭിക്ഖും ഏതദവോച – ‘‘ഏത്തകമ്പി ഖോ, ഭിക്ഖു, രൂപം നത്ഥി നിച്ചം ധുവം സസ്സതം അവിപരിണാമധമ്മം സസ്സതിസമം തഥേവ ഠസ്സതി. ഏത്തകം ചേപി, ഭിക്ഖു, രൂപം അഭവിസ്സ നിച്ചം ധുവം സസ്സതം അവിപരിണാമധമ്മം, നയിദം ബ്രഹ്മചരിയവാസോ പഞ്ഞായേഥ സമ്മാ ദുക്ഖക്ഖയായ. യസ്മാ ച ഖോ, ഭിക്ഖു, ഏത്തകമ്പി രൂപം നത്ഥി നിച്ചം ധുവം സസ്സതം അവിപരിണാമധമ്മം, തസ്മാ ബ്രഹ്മചരിയവാസോ പഞ്ഞായതി സമ്മാ ദുക്ഖക്ഖയായ’’.

‘‘ഏത്തകാപി ഖോ, ഭിക്ഖു, വേദനാ നത്ഥി നിച്ചാ ധുവാ സസ്സതാ അവിപരിണാമധമ്മാ സസ്സതിസമം തഥേവ ഠസ്സതി. ഏത്തകാ ചേപി, ഭിക്ഖു, വേദനാ അഭവിസ്സ നിച്ചാ ധുവാ സസ്സതാ അവിപരിണാമധമ്മാ, ന യിദം ബ്രഹ്മചരിയവാസോ പഞ്ഞായേഥ സമ്മാ ദുക്ഖക്ഖയായ. യസ്മാ ച ഖോ, ഭിക്ഖു, ഏത്തകാപി വേദനാ നത്ഥി നിച്ചാ ധുവാ സസ്സതാ അവിപരിണാമധമ്മാ, തസ്മാ ബ്രഹ്മചരിയവാസോ പഞ്ഞായതി സമ്മാ ദുക്ഖക്ഖയായ.

‘‘ഏത്തകാപി ഖോ, ഭിക്ഖു, സഞ്ഞാ നത്ഥി…പേ… ഏത്തകാപി ഖോ, ഭിക്ഖു, സങ്ഖാരാ നത്ഥി നിച്ചാ ധുവാ സസ്സതാ അവിപരിണാമധമ്മാ സസ്സതിസമം തഥേവ ഠസ്സന്തി. ഏത്തകാ ചേപി, ഭിക്ഖു, സങ്ഖാരാ അഭവിസ്സംസു നിച്ചാ ധുവാ സസ്സതാ അവിപരിണാമധമ്മാ, ന യിദം ബ്രഹ്മചരിയവാസോ പഞ്ഞായേഥ സമ്മാ ദുക്ഖക്ഖയായ. യസ്മാ ച ഖോ, ഭിക്ഖു, ഏത്തകാപി സങ്ഖാരാ നത്ഥി നിച്ചാ ധുവാ സസ്സതാ അവിപരിണാമധമ്മാ, തസ്മാ ബ്രഹ്മചരിയവാസോ പഞ്ഞായതി സമ്മാ ദുക്ഖക്ഖയായ.

‘‘ഏത്തകമ്പി ഖോ, ഭിക്ഖു, വിഞ്ഞാണം നത്ഥി നിച്ചം ധുവം സസ്സതം അവിപരിണാമധമ്മം സസ്സതിസമം തഥേവ ഠസ്സതി. ഏത്തകമ്പി ഖോ, ഭിക്ഖു, വിഞ്ഞാണം അഭവിസ്സ നിച്ചം ധുവം സസ്സതം അവിപരിണാമധമ്മം, ന യിദം ബ്രഹ്മചരിയവാസോ പഞ്ഞായേഥ സമ്മാ ദുക്ഖക്ഖയായ. യസ്മാ ച ഖോ, ഭിക്ഖു, ഏത്തകമ്പി വിഞ്ഞാണം നത്ഥി നിച്ചം ധുവം സസ്സതം അവിപരിണാമധമ്മം, തസ്മാ ബ്രഹ്മചരിയവാസോ പഞ്ഞായതി സമ്മാ ദുക്ഖക്ഖയായ.

‘‘തം കിം മഞ്ഞസി, ഭിക്ഖു, രൂപം നിച്ചം വാ അനിച്ചം വാ’’തി? ‘‘അനിച്ചം, ഭന്തേ’’. ‘‘വേദനാ… സഞ്ഞാ… സങ്ഖാരാ… വിഞ്ഞാണം നിച്ചം വാ അനിച്ചം വാ’’തി? ‘‘അനിച്ചം ഭന്തേ’’…പേ… ‘‘തസ്മാതിഹ…പേ… ഏവം പസ്സം…പേ… നാപരം ഇത്ഥത്തായാതി പജാനാതീ’’തി. പഞ്ചമം.