൪. കുലൂപകസുത്തം

൧൪൭. സാവത്ഥിയം വിഹരതി…പേ… ‘‘തം കിം മഞ്ഞഥ, ഭിക്ഖവേ, കഥംരൂപോ ഭിക്ഖു അരഹതി കുലൂപകോ ഹോതും, കഥംരൂപോ ഭിക്ഖു ന അരഹതി കുലൂപകോ ഹോതു’’ന്തി? ഭഗവംമൂലകാ നോ, ഭന്തേ, ധമ്മാ…പേ… ഭഗവാ ഏതദവോച –

‘‘യോ ഹി കോചി, ഭിക്ഖവേ, ഭിക്ഖു ഏവംചിത്തോ കുലാനി ഉപസങ്കമതി – ‘ദേന്തുയേവ മേ, മാ നാദംസു; ബഹുകഞ്ഞേവ മേ ദേന്തു, മാ ഥോകം; പണീതഞ്ഞേവ മേ ദേന്തു, മാ ലൂഖം; സീഘഞ്ഞേവ മേ ദേന്തു, മാ ദന്ധം; സക്കച്ചഞ്ഞേവ മേ ദേന്തു, മാ അസക്കച്ച’ന്തി. തസ്സ ചേ, ഭിക്ഖവേ, ഭിക്ഖുനോ ഏവംചിത്തസ്സ കുലാനി ഉപസങ്കമതോ ന ദേന്തി, തേന ഭിക്ഖു സന്ദീയതി; സോ തതോനിദാനം ദുക്ഖം ദോമനസ്സം പടിസംവേദയതി. ഥോകം ദേന്തി, നോ ബഹുകം…പേ… ലൂഖം ദേന്തി, നോ പണീതം… ദന്ധം ദേന്തി, നോ സീഘം, തേന ഭിക്ഖു സന്ദീയതി; സോ തതോനിദാനം ദുക്ഖം ദോമനസ്സം പടിസംവേദയതി. അസക്കച്ചം ദേന്തി, നോ സക്കച്ചം; തേന ഭിക്ഖു സന്ദീയതി; സോ തതോനിദാനം ദുക്ഖം ദോമനസ്സം പടിസംവേദയതി. ഏവരൂപോ ഖോ, ഭിക്ഖവേ, ഭിക്ഖു ന അരഹതി കൂലൂപകോ ഹോതും.

‘‘യോ ച ഖോ, ഭിക്ഖവേ, ഭിക്ഖു ഏവംചിത്തോ കുലാനി ഉപസങ്കമതി – ‘തം കുതേത്ഥ ലബ്ഭാ പരകുലേസു – ദേന്തുയേവ മേ, മാ നാദംസു; ബഹുകഞ്ഞേവ മേ ദേന്തു, മാ ഥോകം; പണീതഞ്ഞേവ മേ ദേന്തു, മാ ലൂഖം; ദീഘഞ്ഞേവ മേ ദേന്തു, മാ ദന്ധം; സക്കച്ചഞ്ഞേവ മേ ദേന്തു, മാ അസക്കച്ച’ന്തി. തസ്സ ചേ, ഭിക്ഖവേ, ഭിക്ഖുനോ ഏവംചിത്തസ്സ കുലാനി ഉപസങ്കമതോ ന ദേന്തി; തേന ഭിക്ഖു ന സന്ദീയതി; സോ ന തതോനിദാനം ദുക്ഖം ദോമനസ്സം പടിസംവേദയതി. ഥോകം ദേന്തി, നോ ബഹുകം; തേന ഭിക്ഖു ന സന്ദീയതി; സോ ന തതോനിദാനം ദുക്ഖം ദോമനസ്സം പടിസംവേദയതി. ലൂഖം ദേന്തി, നോ പണീതം; തേന ഭിക്ഖു ന സന്ദീയതി; സോ ന തതോനിദാനം ദുക്ഖം ദോമനസ്സം പടിസംവേദയതി. ദന്ധം ദേന്തി, നോ സീഘം; തേന ഭിക്ഖു ന സന്ദീയതി; സോ ന തതോനിദാനം ദുക്ഖം ദോമനസ്സം പടിസംവേദയതി. അസക്കച്ചം ദേന്തി, നോ സക്കച്ചം; തേന ഭിക്ഖു ന സന്ദീയതി; സോ ന തതോനിദാനം ദുക്ഖം ദോമനസ്സം പടിസംവേദയതി. ഏവരൂപോ ഖോ, ഭിക്ഖവേ, ഭിക്ഖു അരഹതി കുലൂപകോ ഹോതും.

‘‘കസ്സപോ, ഭിക്ഖവേ, ഏവംചിത്തോ കുലാനി ഉപസങ്കമതി – ‘തം കുതേത്ഥ ലബ്ഭാ പരകുലേസു – ദേന്തുയേവ മേ, മാ നാദംസു; ബഹുകഞ്ഞേവ മേ ദേന്തു, മാ ഥോകം; പണീതഞ്ഞേവ മേ ദേന്തു, മാ ലൂഖം; സീഘഞ്ഞേവ മേ ദേന്തു, മാ ദന്ധം; സക്കച്ചഞ്ഞേവ മേ ദേന്തു, മാ അസക്കച്ച’ന്തി. തസ്സ ചേ, ഭിക്ഖവേ, കസ്സപസ്സ ഏവംചിത്തസ്സ കുലാനി ഉപസങ്കമതോ ന ദേന്തി; തേന കസ്സപോ ന സന്ദീയതി; സോ ന തതോനിദാനം ദുക്ഖം ദോമനസ്സം പടിസംവേദയതി. ഥോകം ദേന്തി, നോ ബഹുകം; തേന കസ്സപോ ന സന്ദീയതി; സോ ന തതോനിദാനം ദുക്ഖം ദോമനസ്സം പടിസംവേദയതി. ലൂഖം ദേന്തി, നോ പണീതം; തേന കസ്സപോ ന സന്ദീയതി; സോ ന തതോനിദാനം ദുക്ഖം ദോമനസ്സം പടിസംവേദയതി. ദന്ധം ദേന്തി, നോ സീഘം; തേന കസ്സപോ ന സന്ദീയതി; സോ ന തതോനിദാനം ദുക്ഖം ദോമനസ്സം പടിസംവേദയതി. അസക്കച്ചം ദേന്തി, നോ സക്കച്ചം; തേന കസ്സപോ ന സന്ദീയതി; സോ ന തതോനിദാനം ദുക്ഖം ദോമനസ്സം പടിസംവേദയതി. കസ്സപേന വാ ഹി വോ, ഭിക്ഖവേ, ഓവദിസ്സാമി യോ വാ പനസ്സ കസ്സപസദിസോ. ഓവദിതേഹി ച പന വോ തഥത്തായ പടിപജ്ജിതബ്ബ’’ന്തി. ചതുത്ഥം.