൫. പബ്ബതസുത്തം

൧൨൮. സാവത്ഥിയം വിഹരതി…പേ… ആരാമേ. അഥ ഖോ അഞ്ഞതരോ ഭിക്ഖു യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ സോ ഭിക്ഖു ഭഗവന്തം ഏതദവോച – ‘‘കീവദീഘോ നു ഖോ, ഭന്തേ, കപ്പോ’’തി? ‘‘ദീഘോ ഖോ, ഭിക്ഖു, കപ്പോ. സോ ന സുകരോ സങ്ഖാതും ഏത്തകാനി വസ്സാനി ഇതി വാ, ഏത്തകാനി വസ്സസതാനി ഇതി വാ, ഏത്തകാനി വസ്സസഹസ്സാനി ഇതി വാ, ഏത്തകാനി വസ്സസതസഹസ്സാനി ഇതി വാ’’തി.

‘‘സക്കാ പന, ഭന്തേ, ഉപമം കാതു’’ന്തി? ‘‘സക്കാ, ഭിക്ഖൂ’’തി ഭഗവാ അവോച. ‘‘സേയ്യഥാപി, ഭിക്ഖു, മഹാസേലോ പബ്ബതോ യോജനം ആയാമേന യോജനം വിത്ഥാരേന യോജനം ഉബ്ബേധേന അച്ഛിന്നോ അസുസിരോ ഏകഗ്ഘനോ. തമേനം പുരിസോ വസ്സസതസ്സ വസ്സസതസ്സ അച്ചയേന കാസികേന വത്ഥേന സകിം സകിം പരിമജ്ജേയ്യ. ഖിപ്പതരം ഖോ സോ, ഭിക്ഖു, മഹാസേലോ പബ്ബതോ ഇമിനാ ഉപക്കമേന പരിക്ഖയം പരിയാദാനം ഗച്ഛേയ്യ, ന ത്വേവ കപ്പോ. ഏവം ദീഘോ, ഭിക്ഖു, കപ്പോ. ഏവം ദീഘാനം ഖോ, ഭിക്ഖു, കപ്പാനം നേകോ കപ്പോ സംസിതോ, നേകം കപ്പസതം സംസിതം, നേകം കപ്പസഹസ്സം സംസിതം, നേകം കപ്പസതസഹസ്സം സംസിതം. തം കിസ്സ ഹേതു? അനമതഗ്ഗോയം, ഭിക്ഖു, സംസാരോ. പുബ്ബാ കോടി…പേ… യാവഞ്ചിദം, ഭിക്ഖു, അലമേവ സബ്ബസങ്ഖാരേസു നിബ്ബിന്ദിതും, അലം വിരജ്ജിതും, അലം വിമുച്ചിതു’’ന്തി. പഞ്ചമം.