൮. നാമരൂപസുത്തം

൫൮. സാവത്ഥിയം വിഹരതി…പേ… ‘‘സംയോജനിയേസു, ഭിക്ഖവേ, ധമ്മേസു അസ്സാദാനുപസ്സിനോ വിഹരതോ നാമരൂപസ്സ അവക്കന്തി ഹോതി. നാമരൂപപച്ചയാ സളായതനം…പേ… ഏവമേതസ്സ കേവലസ്സ ദുക്ഖക്ഖന്ധസ്സ സമുദയോ ഹോതി’’.

‘‘സേയ്യഥാപി, ഭിക്ഖവേ, മഹാരുക്ഖോ. തസ്സ യാനി ചേവ മൂലാനി അധോഗമാനി, യാനി ച തിരിയങ്ഗമാനി, സബ്ബാനി താനി ഉദ്ധം ഓജം അഭിഹരന്തി. ഏവഞ്ഹി സോ, ഭിക്ഖവേ, മഹാരുക്ഖോ തദാഹാരോ തദുപാദാനോ ചിരം ദീഘമദ്ധാനം തിട്ഠേയ്യ. ഏവമേവ ഖോ, ഭിക്ഖവേ, സംയോജനിയേസു ധമ്മേസു അസ്സാദാനുപസ്സിനോ വിഹരതോ നാമരൂപസ്സ അവക്കന്തി ഹോതി…പേ….

‘‘സംയോജനിയേസു, ഭിക്ഖവേ, ധമ്മേസു ആദീനവാനുപസ്സിനോ വിഹരതോ നാമരൂപസ്സ അവക്കന്തി ന ഹോതി. നാമരൂപനിരോധാ സളായതനനിരോധോ…പേ… ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതി.

‘‘സേയ്യഥാപി, ഭിക്ഖവേ, മഹാരുക്ഖോ. അഥ പുരിസോ ആഗച്ഛേയ്യ കുദ്ദാലപിടകം ആദായ…പേ… ആയതിം അനുപ്പാദധമ്മോ. ഏവമേവ ഖോ, ഭിക്ഖവേ, സംയോജനിയേസു ധമ്മേസു ആദീനവാനുപസ്സിനോ വിഹരതോ നാമരൂപസ്സ അവക്കന്തി ന ഹോതി. നാമരൂപനിരോധാ സളായതനനിരോധോ…പേ… ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതീ’’തി. അട്ഠമം.