൨. ഉപാദാനസുത്തം

൫൨. സാവത്ഥിയം വിഹരതി…പേ… ‘‘ഉപാദാനിയേസു, ഭിക്ഖവേ, ധമ്മേസു അസ്സാദാനുപസ്സിനോ വിഹരതോ തണ്ഹാ പവഡ്ഢതി. തണ്ഹാപച്ചയാ ഉപാദാനം; ഉപാദാനപച്ചയാ ഭവോ; ഭവപച്ചയാ ജാതി; ജാതിപച്ചയാ ജരാമരണം സോകപരിദേവദുക്ഖദോമനസ്സുപായാസാ സമ്ഭവന്തി. ഏവമേതസ്സ കേവലസ്സ ദുക്ഖക്ഖന്ധസ്സ സമുദയോ ഹോതി’’.

‘‘സേയ്യഥാപി, ഭിക്ഖവേ, ദസന്നം വാ കട്ഠവാഹാനം വീസായ വാ കട്ഠവാഹാനം തിംസായ വാ കട്ഠവാഹാനം ചത്താരീസായ വാ കട്ഠവാഹാനം മഹാഅഗ്ഗിക്ഖന്ധോ ജലേയ്യ. തത്ര പുരിസോ കാലേന കാലം സുക്ഖാനി ചേവ തിണാനി പക്ഖിപേയ്യ, സുക്ഖാനി ച ഗോമയാനി പക്ഖിപേയ്യ, സുക്ഖാനി ച കട്ഠാനി പക്ഖിപേയ്യ. ഏവഞ്ഹി സോ, ഭിക്ഖവേ, മഹാഅഗ്ഗിക്ഖന്ധോ തദാഹാരോ തദുപാദാനോ ചിരം ദീഘമദ്ധാനം ജലേയ്യ. ഏവമേവ ഖോ, ഭിക്ഖവേ, ഉപാദാനിയേസു ധമ്മേസു അസ്സാദാനുപസ്സിനോ വിഹരതോ തണ്ഹാ പവഡ്ഢതി. തണ്ഹാപച്ചയാ ഉപാദാനം…പേ… ഏവമേതസ്സ കേവലസ്സ ദുക്ഖക്ഖന്ധസ്സ സമുദയോ ഹോതി.

‘‘ഉപാദാനിയേസു, ഭിക്ഖവേ, ധമ്മേസു ആദീനവാനുപസ്സിനോ വിഹരതോ തണ്ഹാ നിരുജ്ഝതി. തണ്ഹാനിരോധാ ഉപാദാനനിരോധോ; ഉപാദാനനിരോധാ ഭവനിരോധോ; ഭവനിരോധാ ജാതിനിരോധോ; ജാതിനിരോധാ ജരാമരണം സോകപരിദേവദുക്ഖദോമനസ്സുപായാസാ നിരുജ്ഝന്തി. ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതി.

‘‘സേയ്യഥാപി, ഭിക്ഖവേ, ദസന്നം വാ കട്ഠവാഹാനം വീസായ വാ തിംസായ വാ ചത്താരീസായ വാ കട്ഠവാഹാനം മഹാഅഗ്ഗിക്ഖന്ധോ ജലേയ്യ; തത്ര പുരിസോ ന കാലേന കാലം സുക്ഖാനി ചേവ തിണാനി പക്ഖിപേയ്യ, ന സുക്ഖാനി ച ഗോമയാനി പക്ഖിപേയ്യ, ന സുക്ഖാനി ച കട്ഠാനി പക്ഖിപേയ്യ. ഏവഞ്ഹി സോ, ഭിക്ഖവേ, മഹാഅഗ്ഗിക്ഖന്ധോ പുരിമസ്സ ച ഉപാദാനസ്സ പരിയാദാനാ അഞ്ഞസ്സ ച അനുപഹാരാ [അനുപാഹാരാ (പീ.)] അനാഹാരോ നിബ്ബായേയ്യ. ഏവമേവ ഖോ, ഭിക്ഖവേ, ഉപാദാനിയേസു ധമ്മേസു ആദീനവാനുപസ്സിനോ വിഹരതോ തണ്ഹാ നിരുജ്ഝതി, തണ്ഹാനിരോധാ ഉപാദാനനിരോധോ…പേ… ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതീ’’തി. ദുതിയം.