൬. അഞ്ഞതരബ്രാഹ്മണസുത്തം

൪൬. സാവത്ഥിയം വിഹരതി. അഥ ഖോ അഞ്ഞതരോ ബ്രാഹ്മണോ യേന ഭഗവാ തേനുപസങ്കമി; ഉപസങ്കമിത്വാ ഭഗവതാ സദ്ധിം സമ്മോദി. സമ്മോദനീയം കഥം സാരണീയം വീതിസാരേത്വാ ഏകമന്തം നിസീദി. ഏകമന്തം നിസിന്നോ ഖോ സോ ബ്രാഹ്മണോ ഭഗവന്തം ഏതദവോച –

‘‘കിം നു ഖോ, ഭോ ഗോതമ, സോ കരോതി സോ പടിസംവേദയതീ’’തി? ‘‘‘സോ കരോതി സോ പടിസംവേദയതീ’തി ഖോ, ബ്രാഹ്മണ, അയമേകോ അന്തോ’’.

‘‘കിം പന, ഭോ ഗോതമ, അഞ്ഞോ കരോതി, അഞ്ഞോ പടിസംവേദയതീ’’തി? ‘‘‘അഞ്ഞോ കരോതി, അഞ്ഞോ പടിസംവേദയതീ’തി ഖോ, ബ്രാഹ്മണ, അയം ദുതിയോ അന്തോ. ഏതേ തേ, ബ്രാഹ്മണ, ഉഭോ അന്തേ അനുപഗമ്മ മജ്ഝേന തഥാഗതോ ധമ്മം ദേസേതി – ‘അവിജ്ജാപച്ചയാ സങ്ഖാരാ; സങ്ഖാരപച്ചയാ വിഞ്ഞാണം…പേ… ഏവമേതസ്സ കേവലസ്സ ദുക്ഖക്ഖന്ധസ്സ സമുദയോ ഹോതി. അവിജ്ജായ ത്വേവ അസേസവിരാഗനിരോധാ സങ്ഖാരനിരോധോ; സങ്ഖാരനിരോധാ വിഞ്ഞാണനിരോധോ …പേ… ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതീ’’’തി.

ഏവം വുത്തേ, സോ ബ്രാഹ്മണോ ഭഗവന്തം ഏതദവോച – ‘‘അഭിക്കന്തം, ഭോ ഗോതമ, അഭിക്കന്തം, ഭോ ഗോതമ,…പേ… ഉപാസകം മം ഭവം ഗോതമോ ധാരേതു അജ്ജതഗ്ഗേ പാണുപേതം സരണം ഗത’’ന്തി. ഛട്ഠം.