൬. ചാലാസുത്തം

൧൬൭. സാവത്ഥിനിദാനം. അഥ ഖോ ചാലാ ഭിക്ഖുനീ പുബ്ബണ്ഹസമയം നിവാസേത്വാ…പേ… അഞ്ഞതരസ്മിം രുക്ഖമൂലേ ദിവാവിഹാരം നിസീദി. അഥ ഖോ മാരോ പാപിമാ യേന ചാലാ ഭിക്ഖുനീ തേനുപസങ്കമി; ഉപസങ്കമിത്വാ ചാലം ഭിക്ഖുനിം ഏതദവോച – ‘‘കിം നു ത്വം, ഭിക്ഖുനി, ന രോചേസീ’’തി? ‘‘ജാതിം ഖ്വാഹം, ആവുസോ, ന രോചേമീ’’തി.

‘‘കിം നു ജാതിം ന രോചേസി, ജാതോ കാമാനി ഭുഞ്ജതി;

കോ നു തം ഇദമാദപയി, ജാതിം മാ രോച [മാ രോചേസി (സീ. പീ.)] ഭിക്ഖുനീ’’തി.

‘‘ജാതസ്സ മരണം ഹോതി, ജാതോ ദുക്ഖാനി ഫുസ്സതി [പസ്സതി (സീ. പീ.)];

ബന്ധം വധം പരിക്ലേസം, തസ്മാ ജാതിം ന രോചയേ.

‘‘ബുദ്ധോ ധമ്മമദേസേസി, ജാതിയാ സമതിക്കമം;

സബ്ബദുക്ഖപ്പഹാനായ, സോ മം സച്ചേ നിവേസയി.

‘‘യേ ച രൂപൂപഗാ സത്താ, യേ ച അരൂപട്ഠായിനോ;

നിരോധം അപ്പജാനന്താ, ആഗന്താരോ പുനബ്ഭവ’’ന്തി.

അഥ ഖോ മാരോ പാപിമാ ‘‘ജാനാതി മം ചാലാ ഭിക്ഖുനീ’’തി ദുക്ഖീ ദുമ്മനോ തത്ഥേവന്തരധായീതി.