൪. അച്ചയസുത്തം

൨൭൦. സാവത്ഥിയം…പേ… ആരാമേ. തേന ഖോ പന സമയേന ദ്വേ ഭിക്ഖൂ സമ്പയോജേസും. തത്രേകോ ഭിക്ഖു അച്ചസരാ. അഥ ഖോ സോ ഭിക്ഖു തസ്സ ഭിക്ഖുനോ സന്തികേ അച്ചയം അച്ചയതോ ദേസേതി; സോ ഭിക്ഖു നപ്പടിഗ്ഗണ്ഹാതി. അഥ ഖോ സമ്ബഹുലാ ഭിക്ഖൂ യേന ഭഗവാ തേനുപസങ്കമിംസു; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദിംസു. ഏകമന്തം നിസിന്നാ ഖോ തേ ഭിക്ഖൂ ഭഗവന്തം ഏതദവോചും – ‘‘ഇധ, ഭന്തേ, ദ്വേ ഭിക്ഖൂ സമ്പയോജേസും, തത്രേകോ ഭിക്ഖു അച്ചസരാ. അഥ ഖോ സോ, ഭന്തേ, ഭിക്ഖു തസ്സ ഭിക്ഖുനോ സന്തികേ അച്ചയം അച്ചയതോ ദേസേതി, സോ ഭിക്ഖു നപ്പടിഗ്ഗണ്ഹാതീ’’തി.

‘‘ദ്വേമേ, ഭിക്ഖവേ, ബാലാ. യോ ച അച്ചയം അച്ചയതോ ന പസ്സതി, യോ ച അച്ചയം ദേസേന്തസ്സ യഥാധമ്മം നപ്പടിഗ്ഗണ്ഹാ’’തി – ഇമേ ഖോ, ഭിക്ഖവേ, ദ്വേ ബാലാ. ‘‘ദ്വേമേ, ഭിക്ഖവേ, പണ്ഡിതാ. യോ ച അച്ചയം അച്ചയതോ പസ്സതി, യോ ച അച്ചയം ദേസേന്തസ്സ യഥാധമ്മം പടിഗ്ഗണ്ഹാ’’തി – ഇമേ ഖോ, ഭിക്ഖവേ, ദ്വേ പണ്ഡിതാ.

‘‘ഭൂതപുബ്ബം, ഭിക്ഖവേ, സക്കോ ദേവാനമിന്ദോ സുധമ്മായം സഭായം ദേവേ താവതിംസേ അനുനയമാനോ തായം വേലായം ഇമം ഗാഥം അഭാസി –

‘‘കോധോ വോ വസമായാതു, മാ ച മിത്തേഹി വോ ജരാ;

അഗരഹിയം മാ ഗരഹിത്ഥ, മാ ച ഭാസിത്ഥ പേസുണം;

അഥ പാപജനം കോധോ, പബ്ബതോവാഭിമദ്ദതീ’’തി.