൨. ദുബ്ബണ്ണിയസുത്തം

൨൬൮. സാവത്ഥിയം ജേതവനേ. തത്ര ഖോ…പേ… ഏതദവോച – ‘‘ഭൂതപുബ്ബം, ഭിക്ഖവേ, അഞ്ഞതരോ യക്ഖോ ദുബ്ബണ്ണോ ഓകോടിമകോ സക്കസ്സ ദേവാനമിന്ദസ്സ ആസനേ നിസിന്നോ അഹോസി. തത്ര സുദം, ഭിക്ഖവേ, ദേവാ താവതിംസാ ഉജ്ഝായന്തി ഖിയ്യന്തി വിപാചേന്തി – ‘അച്ഛരിയം വത ഭോ, അബ്ഭുതം വത, ഭോ! അയം യക്ഖോ ദുബ്ബണ്ണോ ഓകോടിമകോ സക്കസ്സ ദേവാനമിന്ദസ്സ ആസനേ നിസിന്നോ’’’തി! യഥാ യഥാ ഖോ, ഭിക്ഖവേ, ദേവാ താവതിംസാ ഉജ്ഝായന്തി ഖിയ്യന്തി വിപാചേന്തി, തഥാ തഥാ സോ യക്ഖോ അഭിരൂപതരോ ചേവ ഹോതി ദസ്സനീയതരോ ച പാസാദികതരോ ച.

‘‘അഥ ഖോ, ഭിക്ഖവേ, ദേവാ താവതിംസാ യേന സക്കോ ദേവാനമിന്ദോ തേനുപസങ്കമിംസു; ഉപസങ്കമിത്വാ സക്കം ദേവാനമിന്ദം ഏതദവോചും – ‘ഇധ തേ, മാരിസ, അഞ്ഞതരോ യക്ഖോ ദുബ്ബണ്ണോ ഓകോടിമകോ സക്കസ്സ ദേവാനമിന്ദസ്സ ആസനേ നിസിന്നോ. തത്ര സുദം, മാരിസ, ദേവാ താവതിംസാ ഉജ്ഝായന്തി ഖിയ്യന്തി വിപാചേന്തി – അച്ഛരിയം വത, ഭോ, അബ്ഭുതം വത, ഭോ! അയം യക്ഖോ ദുബ്ബണ്ണോ ഓകോടിമകോ സക്കസ്സ ദേവാനമിന്ദസ്സ ആസനേ നിസിന്നോതി. യഥാ യഥാ ഖോ, മാരിസ, ദേവാ ഉജ്ഝായന്തി ഖിയ്യന്തി വിപാചേന്തി, തഥാ തഥാ സോ യക്ഖോ അഭിരൂപതരോ ചേവ ഹോതി ദസ്സനീയതരോ ച പാസാദികതരോ ചാതി. സോ ഹി നൂന, മാരിസ, കോധഭക്ഖോ യക്ഖോ ഭവിസ്സതീ’’’തി.

‘‘അഥ ഖോ, ഭിക്ഖവേ, സക്കോ ദേവാനമിന്ദോ യേന സോ കോധഭക്ഖോ യക്ഖോ തേനുപസങ്കമി; ഉപസങ്കമിത്വാ ഏകംസം ഉത്തരാസങ്ഗം കരിത്വാ ദക്ഖിണജാണുമണ്ഡലം പഥവിയം നിഹന്ത്വാ യേന സോ കോധഭക്ഖോ യക്ഖോ തേനഞ്ജലിം പണാമേത്വാ തിക്ഖത്തും നാമം സാവേതി – ‘സക്കോഹം മാരിസ, ദേവാനമിന്ദോ, സക്കോഹം, മാരിസ, ദേവാനമിന്ദോ’തി. യഥാ യഥാ ഖോ, ഭിക്ഖവേ, സക്കോ ദേവാനമിന്ദോ നാമം സാവേസി, തഥാ തഥാ സോ യക്ഖോ ദുബ്ബണ്ണതരോ ചേവ അഹോസി ഓകോടിമകതരോ ച. ദുബ്ബണ്ണതരോ ചേവ ഹുത്വാ ഓകോടിമകതരോ ച തത്ഥേവന്തരധായീ’’തി. അഥ ഖോ, ഭിക്ഖവേ, സക്കോ ദേവാനമിന്ദോ സകേ ആസനേ നിസീദിത്വാ ദേവേ താവതിംസേ അനുനയമാനോ തായം വേലായം ഇമാ ഗാഥായോ അഭാസി –

‘‘ന സൂപഹതചിത്തോമ്ഹി, നാവത്തേന സുവാനയോ;

ന വോ ചിരാഹം കുജ്ഝാമി, കോധോ മയി നാവതിട്ഠതി.

‘‘കുദ്ധാഹം ന ഫരുസം ബ്രൂമി, ന ച ധമ്മാനി കിത്തയേ;

സന്നിഗ്ഗണ്ഹാമി അത്താനം, സമ്പസ്സം അത്ഥമത്തനോ’’തി.