൮. മല്ലികാവിമാനവത്ഥു

൬൫൮. ‘‘പീതവത്ഥേ പീതധജേ, പീതാലങ്കാരഭൂസിതേ;

പീതന്തരാഹി വഗ്ഗൂഹി, അപിളന്ധാവ സോഭസി.

൬൫൯. ‘‘കാ കമ്ബുകായൂരധരേ [കകമ്ബുകായുരധരേ (സ്യാ.)], കഞ്ചനാവേളഭൂസിതേ;

ഹേമജാലകസഞ്ഛന്നേ [പച്ഛന്നേ (സീ.)], നാനാരതനമാലിനീ.

൬൬൦. ‘‘സോവണ്ണമയാ ലോഹിതങ്ഗമയാ [ലോഹിതങ്കമയാ (സീ. സ്യാ.)] ച, മുത്താമയാ വേളുരിയമയാ ച;

മസാരഗല്ലാ സഹലോഹിതങ്ഗാ [സഹലോഹിതങ്കാ (സീ.), സഹലോഹിതകാ (സ്യാ.)], പാരേവതക്ഖീഹി മണീഹി ചിത്തതാ.

൬൬൧. ‘‘കോചി കോചി ഏത്ഥ മയൂരസുസ്സരോ, ഹംസസ്സ രഞ്ഞോ കരവീകസുസ്സരോ;

തേസം സരോ സുയ്യതി വഗ്ഗുരൂപോ, പഞ്ചങ്ഗികം തൂരിയമിവപ്പവാദിതം.

൬൬൨. ‘‘രഥോ ച തേ സുഭോ വഗ്ഗു [വഗ്ഗൂ (സ്യാ.)], നാനാരതനചിത്തിതോ [നാനാരതനചിത്തങ്ഗോ (സ്യാ.)];

നാനാവണ്ണാഹി ധാതൂഹി, സുവിഭത്തോവ സോഭതി.

൬൬൩. ‘‘തസ്മിം രഥേ കഞ്ചനബിമ്ബവണ്ണേ, യാ ത്വം [യത്ഥ (ക. സീ. സ്യാ. ക.)] ഠിതാ ഭാസസി മം പദേസം;

ദേവതേ പുച്ഛിതാചിക്ഖ, കിസ്സ കമ്മസ്സിദം ഫല’’ന്തി.

൬൬൪. ‘‘സോവണ്ണജാലം മണിസോണ്ണചിത്തിതം [വിചിത്തം (ക.), ചിത്തം (സീ. സ്യാ.)], മുത്താചിതം ഹേമജാലേന ഛന്നം [സഞ്ഛന്നം (ക.)];

പരിനിബ്ബുതേ ഗോതമേ അപ്പമേയ്യേ, പസന്നചിത്താ അഹമാഭിരോപയിം.

൬൬൫. ‘‘താഹം കമ്മം കരിത്വാന, കുസലം ബുദ്ധവണ്ണിതം;

അപേതസോകാ സുഖിതാ, സമ്പമോദാമനാമയാ’’തി.

മല്ലികാവിമാനം അട്ഠമം.