൯. വിസാലക്ഖിവിമാനവത്ഥു

൬൬൬. ‘‘കാ നാമ ത്വം വിസാലക്ഖി [വിസാലക്ഖീ (സ്യാ.)], രമ്മേ ചിത്തലതാവനേ;

സമന്താ അനുപരിയാസി, നാരീഗണപുരക്ഖതാ [പുരക്ഖിതാ (സ്യാ. ക.)].

൬൬൭. ‘‘യദാ ദേവാ താവതിംസാ, പവിസന്തി ഇമം വനം;

സയോഗ്ഗാ സരഥാ സബ്ബേ, ചിത്രാ ഹോന്തി ഇധാഗതാ.

൬൬൮. ‘‘തുയ്ഹഞ്ച ഇധ പത്തായ, ഉയ്യാനേ വിചരന്തിയാ;

കായേ ന ദിസ്സതീ ചിത്തം, കേന രൂപം തവേദിസം;

ദേവതേ പുച്ഛിതാചിക്ഖ, കിസ്സ കമ്മസ്സിദം ഫല’’ന്തി.

൬൬൯. ‘‘യേന കമ്മേന ദേവിന്ദ, രൂപം മയ്ഹം ഗതീ ച മേ;

ഇദ്ധി ച ആനുഭാവോ ച, തം സുണോഹി പുരിന്ദദ.

൬൭൦. ‘‘അഹം രാജഗഹേ രമ്മേ, സുനന്ദാ നാമുപാസികാ;

സദ്ധാ സീലേന സമ്പന്നാ, സംവിഭാഗരതാ സദാ.

൬൭൧. ‘‘അച്ഛാദനഞ്ച ഭത്തഞ്ച, സേനാസനം പദീപിയം;

അദാസിം ഉജുഭൂതേസു, വിപ്പസന്നേന ചേതസാ.

൬൭൨. ‘‘ചാതുദ്ദസിം [ചതുദ്ദസിം (പീ. ക.)] പഞ്ചദസിം, യാ ച പക്ഖസ്സ അട്ഠമീ;

പാടിഹാരിയപക്ഖഞ്ച, അട്ഠങ്ഗസുസമാഗതം.

൬൭൩. ‘‘ഉപോസഥം ഉപവസിസ്സം, സദാ സീലേസു സംവുതാ;

സഞ്ഞമാ സംവിഭാഗാ ച, വിമാനം ആവസാമഹം.

൬൭൪. ‘‘പാണാതിപാതാ വിരതാ, മുസാവാദാ ച സഞ്ഞതാ;

ഥേയ്യാ ച അതിചാരാ ച, മജ്ജപാനാ ച ആരകാ.

൬൭൫. ‘‘പഞ്ചസിക്ഖാപദേ രതാ, അരിയസച്ചാന കോവിദാ;

ഉപാസികാ ചക്ഖുമതോ, ഗോതമസ്സ യസസ്സിനോ.

൬൭൬. ‘‘തസ്സാ മേ ഞാതികുലാ ദാസീ [ഞാതികുലം ആസീ (സ്യാ. ക.)], സദാ മാലാഭിഹാരതി;

താഹം ഭഗവതോ ഥൂപേ, സബ്ബമേവാഭിരോപയിം.

൬൭൭. ‘‘ഉപോസഥേ ചഹം ഗന്ത്വാ, മാലാഗന്ധവിലേപനം;

ഥൂപസ്മിം അഭിരോപേസിം, പസന്നാ സേഹി പാണിഭി.

൬൭൮. ‘‘തേന കമ്മേന ദേവിന്ദ, രൂപം മയ്ഹം ഗതീ ച മേ;

ഇദ്ധീ ച ആനുഭാവോ ച, യം മാലം അഭിരോപയിം.

൬൭൯. ‘‘യഞ്ച സീലവതീ ആസിം, ന തം താവ വിപച്ചതി;

ആസാ ച പന മേ ദേവിന്ദ, സകദാഗാമിനീ സിയ’’ന്തി.

വിസാലക്ഖിവിമാനം നവമം.