൨. ദുതിയലകുണ്ഡകഭദ്ദിയസുത്തം

൬൨. ഏവം മേ സുതം – ഏകം സമയം ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ആയസ്മാ സാരിപുത്തോ ആയസ്മന്തം ലകുണ്ഡകഭദ്ദിയം സേഖം [സേക്ഖോതി (സ്യാ.), സേഖോതി (പീ.)] മഞ്ഞമാനോ ഭിയ്യോസോമത്തായ അനേകപരിയായേന ധമ്മിയാ കഥായ സന്ദസ്സേതി സമാദപേതി സമുത്തേജേതി സമ്പഹംസേതി.

അദ്ദസാ ഖോ ഭഗവാ ആയസ്മന്തം സാരിപുത്തം ആയസ്മന്തം ലകുണ്ഡകഭദ്ദിയം സേഖം മഞ്ഞമാനം ഭിയ്യോസോമത്തായ അനേകപരിയായേന ധമ്മിയാ കഥായ സന്ദസ്സേന്തം സമാദപേന്തം സമുത്തേജേന്തം സമ്പഹംസേന്തം.

അഥ ഖോ ഭഗവാ ഏതമത്ഥം വിദിത്വാ തായം വേലായം ഇമം ഉദാനം ഉദാനേസി –

‘‘അച്ഛേച്ഛി [അച്ഛേജ്ജി (ക. സീ.), അച്ഛിജ്ജി (ക. സീ. സ്യാ.), അഛിജ്ജി (ക.)] വട്ടം ബ്യഗാ നിരാസം, വിസുക്ഖാ സരിതാ ന സന്ദതി;

ഛിന്നം വട്ടം ന വത്തതി, ഏസേവന്തോ ദുക്ഖസ്സാ’’തി. ദുതിയം;