൬. മഹാപജാപതിഗോതമീഥേരീഗാഥാ

൧൫൭. ‘‘ബുദ്ധ വീര നമോ ത്യത്ഥു, സബ്ബസത്താനമുത്തമ;

യോ മം ദുക്ഖാ പമോചേസി, അഞ്ഞഞ്ച ബഹുകം ജനം.

൧൫൮. ‘‘സബ്ബദുക്ഖം പരിഞ്ഞാതം, ഹേതുതണ്ഹാ വിസോസിതാ;

ഭാവിതോ അട്ഠങ്ഗികോ [അരിയട്ഠങ്ഗികോ (സീ. ക.), ഭാവിതട്ഠങ്ഗികോ (സ്യാ.)] മഗ്ഗോ, നിരോധോ ഫുസിതോ മയാ.

൧൫൯. ‘‘മാതാ പുത്തോ പിതാ ഭാതാ, അയ്യകാ ച പുരേ അഹും;

യഥാഭുച്ചമജാനന്തീ, സംസരിംഹം അനിബ്ബിസം.

൧൬൦. ‘‘ദിട്ഠോ ഹി മേ സോ ഭഗവാ, അന്തിമോയം സമുസ്സയോ;

വിക്ഖീണോ ജാതിസംസാരോ, നത്ഥി ദാനി പുനബ്ഭവോ.

൧൬൧. ‘‘ആരദ്ധവീരിയേ പഹിതത്തേ, നിച്ചം ദള്ഹപരക്കമേ;

സമഗ്ഗേ സാവകേ പസ്സേ, ഏസാ ബുദ്ധാന വന്ദനാ.

൧൬൨. ‘‘ബഹൂനം [ബഹുന്നം (സീ. സ്യാ.)] വത അത്ഥായ, മായാ ജനയി ഗോതമം;

ബ്യാധിമരണതുന്നാനം, ദുക്ഖക്ഖന്ധം ബ്യപാനുദീ’’തി.

… മഹാപജാപതിഗോതമീ ഥേരീ….