൬. ഛക്കനിപാതോ

൧. പഞ്ചസതമത്താഥേരീഗാഥാ

൧൨൭. ‘‘യസ്സ മഗ്ഗം ന ജാനാസി, ആഗതസ്സ ഗതസ്സ വാ;

തം കുതോ ചാഗതം സത്തം [സന്തം (സീ.), പുത്തം (സ്യാ.)], ‘മമ പുത്തോ’തി രോദസി.

൧൨൮. ‘‘മഗ്ഗഞ്ച ഖോസ്സ [ഖോ’ഥ (സ്യാ. ക.)] ജാനാസി, ആഗതസ്സ ഗതസ്സ വാ;

ന നം സമനുസോചേസി, ഏവംധമ്മാ ഹി പാണിനോ.

൧൨൯. ‘‘അയാചിതോ തതാഗച്ഛി, നാനുഞ്ഞാതോ [അനനുഞ്ഞാതോ (സീ. സ്യാ.)] ഇതോ ഗതോ;

കുതോചി നൂന ആഗന്ത്വാ, വസിത്വാ കതിപാഹകം;

ഇതോപി അഞ്ഞേന ഗതോ, തതോപഞ്ഞേന ഗച്ഛതി.

൧൩൦. ‘‘പേതോ മനുസ്സരൂപേന, സംസരന്തോ ഗമിസ്സതി;

യഥാഗതോ തഥാ ഗതോ, കാ തത്ഥ പരിദേവനാ’’.

൧൩൧. ‘‘അബ്ബഹീ [അബ്ബുയ്ഹം (സ്യാ.)] വത മേ സല്ലം, ദുദ്ദസം ഹദയസ്സിതം;

യാ മേ സോകപരേതായ, പുത്തസോകം ബ്യപാനുദി.

൧൩൨. ‘‘സാജ്ജ അബ്ബൂള്ഹസല്ലാഹം, നിച്ഛാതാ പരിനിബ്ബുതാ;

ബുദ്ധം ധമ്മഞ്ച സങ്ഘഞ്ച, ഉപേമി സരണം മുനിം’’.

ഇത്ഥം സുദം പഞ്ചസതമത്താ ഥേരീ ഭിക്ഖുനിയോ…പേ….

൨. വാസേട്ഠീഥേരീഗാഥാ

൧൩൩. ‘‘പുത്തസോകേനഹം അട്ടാ, ഖിത്തചിത്താ വിസഞ്ഞിനീ;

നഗ്ഗാ പകിണ്ണകേസീ ച, തേന തേന വിചാരിഹം.

൧൩൪. ‘‘വീഥി [വസിം (സീ.)] സങ്കാരകൂടേസു, സുസാനേ രഥിയാസു ച;

അചരിം തീണി വസ്സാനി, ഖുപ്പിപാസാസമപ്പിതാ.

൧൩൫. ‘‘അഥദ്ദസാസിം സുഗതം, നഗരം മിഥിലം പതി [ഗതം (ക.)];

അദന്താനം ദമേതാരം, സമ്ബുദ്ധമകുതോഭയം.

൧൩൬. ‘‘സചിത്തം പടിലദ്ധാന, വന്ദിത്വാന ഉപാവിസിം;

സോ മേ ധമ്മമദേസേസി, അനുകമ്പായ ഗോതമോ.

൧൩൭. ‘‘തസ്സ ധമ്മം സുണിത്വാന, പബ്ബജിം അനഗാരിയം;

യുഞ്ജന്തീ സത്ഥുവചനേ, സച്ഛാകാസിം പദം സിവം.

൧൩൮. ‘‘സബ്ബേ സോകാ സമുച്ഛിന്നാ, പഹീനാ ഏതദന്തികാ;

പരിഞ്ഞാതാ ഹി മേ വത്ഥൂ, യതോ സോകാന സമ്ഭവോ’’തി.

… വാസേട്ഠീ ഥേരീ….

൩. ഖേമാഥേരീഗാഥാ

൧൩൯. ‘‘ദഹരാ ത്വം രൂപവതീ, അഹമ്പി ദഹരോ യുവാ;

പഞ്ചങ്ഗികേന തുരിയേന [തൂരേന (ക.)], ഏഹി ഖേമേ രമാമസേ’’.

൧൪൦. ‘‘ഇമിനാ പൂതികായേന, ആതുരേന പഭങ്ഗുനാ;

അട്ടിയാമി ഹരായാമി, കാമതണ്ഹാ സമൂഹതാ.

൧൪൧. ‘‘സത്തിസൂലൂപമാ കാമാ, ഖന്ധാസം അധികുട്ടനാ;

യം ‘ത്വം കാമരതിം’ ബ്രൂസി, ‘അരതീ’ ദാനി സാ മമ.

൧൪൨. ‘‘സബ്ബത്ഥ വിഹതാ നന്ദീ, തമോഖന്ധോ പദാലിതോ;

ഏവം ജാനാഹി പാപിമ, നിഹതോ ത്വമസി അന്തക.

൧൪൩. ‘‘നക്ഖത്താനി നമസ്സന്താ, അഗ്ഗിം പരിചരം വനേ;

യഥാഭുച്ചമജാനന്താ, ബാലാ സുദ്ധിമമഞ്ഞഥ.

൧൪൪. ‘‘അഹഞ്ച ഖോ നമസ്സന്തീ, സമ്ബുദ്ധം പുരിസുത്തമം;

പമുത്താ [പരിമുത്താ (സീ. സ്യാ.)] സബ്ബദുക്ഖേഹി, സത്ഥുസാസനകാരികാ’’തി.

… ഖേമാ ഥേരീ….

൪. സുജാതാഥേരീഗാഥാ

൧൪൫. ‘‘അലങ്കതാ സുവസനാ, മാലിനീ ചന്ദനോക്ഖിതാ;

സബ്ബാഭരണസഞ്ഛന്നാ, ദാസീഗണപുരക്ഖതാ.

൧൪൬. ‘‘അന്നം പാനഞ്ച ആദായ, ഖജ്ജം ഭോജ്ജം അനപ്പകം;

ഗേഹതോ നിക്ഖമിത്വാന, ഉയ്യാനമഭിഹാരയിം.

൧൪൭. ‘‘തത്ഥ രമിത്വാ കീളിത്വാ, ആഗച്ഛന്തീ സകം ഘരം;

വിഹാരം ദട്ഠും പാവിസിം, സാകേതേ അഞ്ജനം വനം.

൧൪൮. ‘‘ദിസ്വാന ലോകപജ്ജോതം, വന്ദിത്വാന ഉപാവിസിം;

സോ മേ ധമ്മമദേസേസി, അനുകമ്പായ ചക്ഖുമാ.

൧൪൯. ‘‘സുത്വാ ച ഖോ മഹേസിസ്സ, സച്ചം സമ്പടിവിജ്ഝഹം;

തത്ഥേവ വിരജം ധമ്മം, ഫുസയിം അമതം പദം.

൧൫൦. ‘‘തതോ വിഞ്ഞാതസദ്ധമ്മാ, പബ്ബജിം അനഗാരിയം;

തിസ്സോ വിജ്ജാ അനുപ്പത്താ, അമോഘം ബുദ്ധസാസന’’ന്തി.

… സുജാതാ ഥേരീ….

൫. അനോപമാഥേരീഗാഥാ

൧൫൧. ‘‘ഉച്ചേ കുലേ അഹം ജാതാ, ബഹുവിത്തേ മഹദ്ധനേ;

വണ്ണരൂപേന സമ്പന്നാ, ധീതാ മജ്ഝസ്സ [മേഘസ്സ (സീ.), മേഘിസ്സ (സ്യാ.)] അത്രജാ.

൧൫൨. ‘‘പത്ഥിതാ രാജപുത്തേഹി, സേട്ഠിപുത്തേഹി ഗിജ്ഝിതാ [സേട്ഠിപുത്തേഹി ഭിജ്ഝിതാ (സീ.)];

പിതു മേ പേസയീ ദൂതം, ദേഥ മയ്ഹം അനോപമം.

൧൫൩. ‘‘യത്തകം തുലിതാ ഏസാ, തുയ്ഹം ധീതാ അനോപമാ;

തതോ അട്ഠഗുണം ദസ്സം, ഹിരഞ്ഞം രതനാനി ച.

൧൫൪. ‘‘സാഹം ദിസ്വാന സമ്ബുദ്ധം, ലോകജേട്ഠം അനുത്തരം;

തസ്സ പാദാനി വന്ദിത്വാ, ഏകമന്തം ഉപാവിസിം.

൧൫൫. ‘‘സോ മേ ധമ്മമദേസേസി, അനുകമ്പായ ഗോതമോ;

നിസിന്നാ ആസനേ തസ്മിം, ഫുസയിം തതിയം ഫലം.

൧൫൬. ‘‘തതോ കേസാനി ഛേത്വാന, പബ്ബജിം അനഗാരിയം;

അജ്ജ മേ സത്തമീ രത്തി, യതോ തണ്ഹാ വിസോസിതാ’’തി.

… അനോപമാ ഥേരീ….

൬. മഹാപജാപതിഗോതമീഥേരീഗാഥാ

൧൫൭. ‘‘ബുദ്ധ വീര നമോ ത്യത്ഥു, സബ്ബസത്താനമുത്തമ;

യോ മം ദുക്ഖാ പമോചേസി, അഞ്ഞഞ്ച ബഹുകം ജനം.

൧൫൮. ‘‘സബ്ബദുക്ഖം പരിഞ്ഞാതം, ഹേതുതണ്ഹാ വിസോസിതാ;

ഭാവിതോ അട്ഠങ്ഗികോ [അരിയട്ഠങ്ഗികോ (സീ. ക.), ഭാവിതട്ഠങ്ഗികോ (സ്യാ.)] മഗ്ഗോ, നിരോധോ ഫുസിതോ മയാ.

൧൫൯. ‘‘മാതാ പുത്തോ പിതാ ഭാതാ, അയ്യകാ ച പുരേ അഹും;

യഥാഭുച്ചമജാനന്തീ, സംസരിംഹം അനിബ്ബിസം.

൧൬൦. ‘‘ദിട്ഠോ ഹി മേ സോ ഭഗവാ, അന്തിമോയം സമുസ്സയോ;

വിക്ഖീണോ ജാതിസംസാരോ, നത്ഥി ദാനി പുനബ്ഭവോ.

൧൬൧. ‘‘ആരദ്ധവീരിയേ പഹിതത്തേ, നിച്ചം ദള്ഹപരക്കമേ;

സമഗ്ഗേ സാവകേ പസ്സേ, ഏസാ ബുദ്ധാന വന്ദനാ.

൧൬൨. ‘‘ബഹൂനം [ബഹുന്നം (സീ. സ്യാ.)] വത അത്ഥായ, മായാ ജനയി ഗോതമം;

ബ്യാധിമരണതുന്നാനം, ദുക്ഖക്ഖന്ധം ബ്യപാനുദീ’’തി.

… മഹാപജാപതിഗോതമീ ഥേരീ….

൭. ഗുത്താഥേരീഗാഥാ

൧൬൩. ‘‘ഗുത്തേ യദത്ഥം പബ്ബജ്ജാ, ഹിത്വാ പുത്തം വസും പിയം;

തമേവ അനുബ്രൂഹേഹി, മാ ചിത്തസ്സ വസം ഗമി.

൧൬൪. ‘‘ചിത്തേന വഞ്ചിതാ സത്താ, മാരസ്സ വിസയേ രതാ;

അനേകജാതിസംസാരം, സന്ധാവന്തി അവിദ്ദസൂ.

൧൬൫. ‘‘കാമച്ഛന്ദഞ്ച ബ്യാപാദം, സക്കായദിട്ഠിമേവ ച;

സീലബ്ബതപരാമാസം, വിചികിച്ഛഞ്ച പഞ്ചമം.

൧൬൬. ‘‘സംയോജനാനി ഏതാനി, പജഹിത്വാന ഭിക്ഖുനീ;

ഓരമ്ഭാഗമനീയാനി, നയിദം പുനരേഹിസി.

൧൬൭. ‘‘രാഗം മാനം അവിജ്ജഞ്ച, ഉദ്ധച്ചഞ്ച വിവജ്ജിയ;

സംയോജനാനി ഛേത്വാന, ദുക്ഖസ്സന്തം കരിസ്സസി.

൧൬൮. ‘‘ഖേപേത്വാ ജാതിസംസാരം, പരിഞ്ഞായ പുനബ്ഭവം;

ദിട്ഠേവ ധമ്മേ നിച്ഛാതാ, ഉപസന്താ ചരിസ്സതീ’’തി.

… ഗുത്താ ഥേരീ….

൮. വിജയാഥേരീഗാഥാ

൧൬൯. ‘‘ചതുക്ഖത്തും പഞ്ചക്ഖത്തും, വിഹാരാ ഉപനിക്ഖമിം;

അലദ്ധാ ചേതസോ സന്തിം, ചിത്തേ അവസവത്തിനീ.

൧൭൦. ‘‘ഭിക്ഖുനിം ഉപസങ്കമ്മ, സക്കച്ചം പരിപുച്ഛഹം;

സാ മേ ധമ്മമദേസേസി, ധാതുആയതനാനി ച.

൧൭൧. ‘‘ചത്താരി അരിയസച്ചാനി, ഇന്ദ്രിയാനി ബലാനി ച;

ബോജ്ഝങ്ഗട്ഠങ്ഗികം മഗ്ഗം, ഉത്തമത്ഥസ്സ പത്തിയാ.

൧൭൨. ‘‘തസ്സാഹം വചനം സുത്വാ, കരോന്തീ അനുസാസനിം;

രത്തിയാ പുരിമേ യാമേ, പുബ്ബജാതിമനുസ്സരിം.

൧൭൩. ‘‘രത്തിയാ മജ്ഝിമേ യാമേ, ദിബ്ബചക്ഖും വിസോധയിം;

രത്തിയാ പച്ഛിമേ യാമേ, തമോഖന്ധം പദാലയിം.

൧൭൪. ‘‘പീതിസുഖേന ച കായം, ഫരിത്വാ വിഹരിം തദാ;

സത്തമിയാ പാദേ പസാരേസിം, തമോഖന്ധം പദാലിയാ’’തി.

… വിജയാ ഥേരീ….

ഛക്കനിപാതോ നിട്ഠിതോ.