൯. ഭദ്ദാകുണ്ഡലകേസാഥേരീഗാഥാ

൧൦൭. ‘‘ലൂനകേസീ പങ്കധരീ, ഏകസാടീ പുരേ ചരിം;

അവജ്ജേ വജ്ജമതിനീ, വജ്ജേ ചാവജ്ജദസ്സിനീ.

൧൦൮. ‘‘ദിവാവിഹാരാ നിക്ഖമ്മ, ഗിജ്ഝകൂടമ്ഹി പബ്ബതേ;

അദ്ദസം വിരജം ബുദ്ധം, ഭിക്ഖുസങ്ഘപുരക്ഖതം.

൧൦൯. ‘‘നിഹച്ച ജാണും വന്ദിത്വാ, സമ്മുഖാ അഞ്ജലിം അകം;

‘ഏഹി ഭദ്ദേ’തി മം അവച, സാ മേ ആസൂപസമ്പദാ.

൧൧൦. ‘‘ചിണ്ണാ അങ്ഗാ ച മഗധാ, വജ്ജീ കാസീ ച കോസലാ;

അനണാ പണ്ണാസവസ്സാനി, രട്ഠപിണ്ഡം അഭുഞ്ജഹം.

൧൧൧. ‘‘പുഞ്ഞം വത പസവി ബഹും, സപ്പഞ്ഞോ വതായം ഉപാസകോ;

യോ ഭദ്ദായ ചീവരം അദാസി, വിപ്പമുത്തായ സബ്ബഗന്ഥേഹീ’’തി.

… ഭദ്ദാ കുണ്ഡലകേസാ ഥേരീ….