൫. നന്ദുത്തരാഥേരീഗാഥാ

൮൭. ‘‘അഗ്ഗിം ചന്ദഞ്ച സൂരിയഞ്ച, ദേവതാ ച നമസ്സിഹം;

നദീതിത്ഥാനി ഗന്ത്വാന, ഉദകം ഓരുഹാമിഹം.

൮൮. ‘‘ബഹൂവതസമാദാനാ, അഡ്ഢം സീസസ്സ ഓലിഖിം;

ഛമായ സേയ്യം കപ്പേമി, രത്തിം ഭത്തം ന ഭുഞ്ജഹം.

൮൯. ‘‘വിഭൂസാമണ്ഡനരതാ, ന്ഹാപനുച്ഛാദനേഹി ച;

ഉപകാസിം ഇമം കായം, കാമരാഗേന അട്ടിതാ.

൯൦. ‘‘തതോ സദ്ധം ലഭിത്വാന, പബ്ബജിം അനഗാരിയം;

ദിസ്വാ കായം യഥാഭൂതം, കാമരാഗോ സമൂഹതോ.

൯൧. ‘‘സബ്ബേ ഭവാ സമുച്ഛിന്നാ, ഇച്ഛാ ച പത്ഥനാപി ച;

സബ്ബയോഗവിസംയുത്താ, സന്തിം പാപുണി ചേതസോ’’തി.

… നന്ദുത്തരാ ഥേരീ….