൧൧. തിംസമത്താഥേരീഗാഥാ

൧൧൭. ‘‘‘മുസലാനി ഗഹേത്വാന, ധഞ്ഞം കോട്ടേന്തി മാണവാ [മാനവാ (സീ.)];

പുത്തദാരാനി പോസേന്താ, ധനം വിന്ദന്തി മാണവാ.

൧൧൮. ‘‘‘കരോഥ ബുദ്ധസാസനം, യം കത്വാ നാനുതപ്പതി;

ഖിപ്പം പാദാനി ധോവിത്വാ, ഏകമന്തേ നിസീദഥ;

ചേതോസമഥമനുയുത്താ, കരോഥ ബുദ്ധസാസനം’.

൧൧൯. ‘‘തസ്സാ താ [തം (സീ.)] വചനം സുത്വാ, പടാചാരായ സാസനം;

പാദേ പക്ഖാലയിത്വാന, ഏകമന്തം ഉപാവിസും;

ചേതോസമഥമനുയുത്താ, അകംസു ബുദ്ധസാസനം.

൧൨൦. ‘‘രത്തിയാ പുരിമേ യാമേ, പുബ്ബജാതിമനുസ്സരും;

രത്തിയാ മജ്ഝിമേ യാമേ, ദിബ്ബചക്ഖും വിസോധയും;

രത്തിയാ പച്ഛിമേ യാമേ, തമോഖന്ധം പദാലയും.

൧൨൧. ‘‘ഉട്ഠായ പാദേ വന്ദിംസു, ‘കതാ തേ അനുസാസനീ;

ഇന്ദംവ ദേവാ തിദസാ, സങ്ഗാമേ അപരാജിതം;

പുരക്ഖത്വാ വിഹസ്സാമ [വിഹരാമ (സീ.), വിഹരിസ്സാമ (സ്യാ.)], തേവിജ്ജാമ്ഹ അനാസവാ’’’തി.

ഇത്ഥം സുദം തിംസമത്താ ഥേരീ ഭിക്ഖുനിയോ പടാചാരായ സന്തികേ അഞ്ഞം ബ്യാകരിംസൂതി.