൪. ചതുക്കനിപാതോ

൧. ഭദ്ദാകാപിലാനീഥേരീഗാഥാ

൬൩. ‘‘പുത്തോ ബുദ്ധസ്സ ദായാദോ, കസ്സപോ സുസമാഹിതോ;

പുബ്ബേനിവാസം യോവേദി, സഗ്ഗാപായഞ്ച പസ്സതി.

൬൪. ‘‘അഥോ ജാതിക്ഖയം പത്തോ, അഭിഞ്ഞാവോസിതോ മുനി;

ഏതാഹി തീഹി വിജ്ജാഹി, തേവിജ്ജോ ഹോതി ബ്രാഹ്മണോ.

൬൫. ‘‘തഥേവ ഭദ്ദാ കാപിലാനീ, തേവിജ്ജാ മച്ചുഹായിനീ;

ധാരേതി അന്തിമം ദേഹം, ജേത്വാ മാരം സവാഹനം.

൬൬. ‘‘ദിസ്വാ ആദീനവം ലോകേ, ഉഭോ പബ്ബജിതാ മയം;

ത്യമ്ഹ ഖീണാസവാ ദന്താ, സീതിഭൂതമ്ഹ നിബ്ബുതാ’’തി.

… ഭദ്ദാ കാപിലാനീ ഥേരീ….

ചതുക്കനിപാതോ നിട്ഠിതോ.