൩. തികനിപാതോ

൧. അപരാസാമാഥേരീഗാഥാ

൩൯. ‘‘പണ്ണവീസതിവസ്സാനി, യതോ പബ്ബജിതായ മേ;

നാഭിജാനാമി ചിത്തസ്സ, സമം ലദ്ധം കുദാചനം.

൪൦. ‘‘അലദ്ധാ ചേതസോ സന്തിം, ചിത്തേ അവസവത്തിനീ;

തതോ സംവേഗമാപാദിം, സരിത്വാ ജിനസാസനം.

൪൧. ‘‘ബഹൂഹി ദുക്ഖധമ്മേഹി, അപ്പമാദരതായ മേ;

തണ്ഹക്ഖയോ അനുപ്പത്തോ, കതം ബുദ്ധസ്സ സാസനം;

അജ്ജ മേ സത്തമീ രത്തി, യതോ തണ്ഹാ വിസോസിതാ’’തി.

… അപരാ സാമാ ഥേരീ….

൨. ഉത്തമാഥേരീഗാഥാ

൪൨. ‘‘ചതുക്ഖത്തും പഞ്ചക്ഖത്തും, വിഹാരാ ഉപനിക്ഖമിം;

അലദ്ധാ ചേതസോ സന്തിം, ചിത്തേ അവസവത്തിനീ.

൪൩. ‘‘സാ ഭിക്ഖുനിം ഉപഗച്ഛിം, യാ മേ സദ്ധായികാ അഹു;

സാ മേ ധമ്മമദേസേസി, ഖന്ധായതനധാതുയോ.

൪൪. ‘‘തസ്സാ ധമ്മം സുണിത്വാന, യഥാ മം അനുസാസി സാ;

സത്താഹം ഏകപല്ലങ്കേന, നിസീദിം പീതിസുഖസമപ്പിതാ [നിസീദിം സുഖസമപ്പിതാ (സീ.)];

അട്ഠമിയാ പാദേ പസാരേസിം, തമോഖന്ധം പദാലിയാ’’തി.

… ഉത്തമാ ഥേരീ….

൩. അപരാഉത്തമാഥേരീഗാഥാ

൪൫. ‘‘യേ ഇമേ സത്ത ബോജ്ഝങ്ഗാ, മഗ്ഗാ നിബ്ബാനപത്തിയാ;

ഭാവിതാ തേ മയാ സബ്ബേ, യഥാ ബുദ്ധേന ദേസിതാ.

൪൬. ‘‘സുഞ്ഞതസ്സാനിമിത്തസ്സ, ലാഭിനീഹം യദിച്ഛകം;

ഓരസാ ധീതാ ബുദ്ധസ്സ, നിബ്ബാനാഭിരതാ സദാ.

൪൭. ‘‘സബ്ബേ കാമാ സമുച്ഛിന്നാ, യേ ദിബ്ബാ യേ ച മാനുസാ;

വിക്ഖീണോ ജാതിസംസാരോ, നത്ഥി ദാനി പുനബ്ഭവോ’’തി.

… അപരാ ഉത്തമാ ഥേരീ….

൪. ദന്തികാഥേരീഗാഥാ

൪൮. ‘‘ദിവാവിഹാരാ നിക്ഖമ്മ, ഗിജ്ഝകൂടമ്ഹി പബ്ബതേ;

നാഗം ഓഗാഹമുത്തിണ്ണം, നദീതീരമ്ഹി അദ്ദസം.

൪൯. ‘‘പുരിസോ അങ്കുസമാദായ, ‘ദേഹി പാദ’ന്തി യാചതി;

നാഗോ പസാരയീ പാദം, പുരിസോ നാഗമാരുഹി.

൫൦. ‘‘ദിസ്വാ അദന്തം ദമിതം, മനുസ്സാനം വസം ഗതം;

തതോ ചിത്തം സമാധേസിം, ഖലു തായ വനം ഗതാ’’തി.

… ദന്തികാ ഥേരീ….

൫. ഉബ്ബിരിഥേരീഗാഥാ

൫൧. ‘‘അമ്മ ജീവാതി വനമ്ഹി കന്ദസി, അത്താനം അധിഗച്ഛ ഉബ്ബിരി;

ചുല്ലാസീതിസഹസ്സാനി [ചൂളാസീതിസഹസ്സാനി (സീ.)], സബ്ബാ ജീവസനാമികാ;

ഏതമ്ഹാളാഹനേ ദഡ്ഢാ, താസം കമനുസോചസി.

൫൨. ‘‘അബ്ബഹീ [അബ്ബുതീ (സ്യാ.), അബ്ബുള്ഹം (ക.)] വത മേ സല്ലം, ദുദ്ദസം ഹദയസ്സിതം [ഹദയനിസ്സിതം (സീ. സ്യാ.)];

യം മേ സോകപരേതായ, ധീതുസോകം ബ്യപാനുദി.

൫൩. ‘‘സാജ്ജ അബ്ബൂള്ഹസല്ലാഹം, നിച്ഛാതാ പരിനിബ്ബുതാ;

ബുദ്ധം ധമ്മഞ്ച സങ്ഘഞ്ച, ഉപേമി സരണം മുനി’’ന്തി.

… ഉബ്ബിരീ ഥേരീ….

൬. സുക്കാഥേരീഗാഥാ

൫൪. ‘‘കിംമേ കതാ രാജഗഹേ മനുസ്സാ, മധും പീതാവ [മധുപീതാവ (സീ.)] അച്ഛരേ;

യേ സുക്കം ന ഉപാസന്തി, ദേസേന്തിം ബുദ്ധസാസനം.

൫൫. ‘‘തഞ്ച അപ്പടിവാനീയം, അസേചനകമോജവം;

പിവന്തി മഞ്ഞേ സപ്പഞ്ഞാ, വലാഹകമിവദ്ധഗൂ.

൫൬. ‘‘സുക്കാ സുക്കേഹി ധമ്മേഹി, വീതരാഗാ സമാഹിതാ;

ധാരേതി അന്തിമം ദേഹം, ജേത്വാ മാരം സവാഹന’’ന്തി.

… സുക്കാ ഥേരീ….

൭. സേലാഥേരീഗാഥാ

൫൭. ‘‘നത്ഥി നിസ്സരണം ലോകേ, കിം വിവേകേന കാഹസി;

ഭുഞ്ജാഹി കാമരതിയോ, മാഹു പച്ഛാനുതാപിനീ’’.

൫൮. ‘‘സത്തിസൂലൂപമാ കാമാ, ഖന്ധാസം അധികുട്ടനാ;

യം ത്വം ‘കാമരതിം’ ബ്രൂസി, ‘അരതീ’ ദാനി സാ മമ.

൫൯. ‘‘സബ്ബത്ഥ വിഹതാ നന്ദീ [നന്ദി (സീ. സ്യാ.)], തമോഖന്ധോ പദാലിതോ;

ഏവം ജാനാഹി പാപിമ, നിഹതോ ത്വമസി അന്തകാ’’തി.

… സേലാ ഥേരീ….

൮. സോമാഥേരീഗാഥാ

൬൦. ‘‘യം തം ഇസീഹി പത്തബ്ബം, ഠാനം ദുരഭിസമ്ഭവം;

ന തം ദ്വങ്ഗുലപഞ്ഞായ, സക്കാ പപ്പോതുമിത്ഥിയാ’’.

൬൧. ‘‘ഇത്ഥിഭാവോ നോ കിം കയിരാ, ചിത്തമ്ഹി സുസമാഹിതേ;

ഞാണമ്ഹി വത്തമാനമ്ഹി, സമ്മാ ധമ്മം വിപസ്സതോ.

൬൨. ‘‘സബ്ബത്ഥ വിഹതാ നന്ദീ, തമോഖന്ധോ പദാലിതോ;

ഏവം ജാനാഹി പാപിമ, നിഹതോ ത്വമസി അന്തകാ’’തി.

… സോമാ ഥേരീ….

തികനിപാതോ നിട്ഠിതോ.