൫. സുഭാകമ്മാരധീതുഥേരീഗാഥാ

൩൩൯. ‘‘ദഹരാഹം സുദ്ധവസനാ, യം പുരേ ധമ്മമസ്സുണിം;

തസ്സാ മേ അപ്പമത്തായ, സച്ചാഭിസമയോ അഹു.

൩൪൦. ‘‘തതോഹം സബ്ബകാമേസു, ഭുസം അരതിമജ്ഝഗം;

സക്കായസ്മിം ഭയം ദിസ്വാ, നേക്ഖമ്മമേവ [നേക്ഖമ്മഞ്ഞേവ (സീ.), നേക്ഖമ്മസ്സേവ (സ്യാ.)] പീഹയേ.

൩൪൧. ‘‘ഹിത്വാനഹം ഞാതിഗണം, ദാസകമ്മകരാനി ച;

ഗാമഖേത്താനി ഫീതാനി, രമണീയേ പമോദിതേ.

൩൪൨. ‘‘പഹായഹം പബ്ബജിതാ, സാപതേയ്യമനപ്പകം;

ഏവം സദ്ധായ നിക്ഖമ്മ, സദ്ധമ്മേ സുപ്പവേദിതേ.

൩൪൩. ‘‘നേതം [ന മേതം (സീ. സ്യാ.)] അസ്സ പതിരൂപം, ആകിഞ്ചഞ്ഞഞ്ഹി പത്ഥയേ;

യോ [യാ (സ്യാ.)] ജാതരൂപം രജതം, ഛഡ്ഡേത്വാ [ഥപേത്വാ (ക.)] പുനരാഗമേ [പുനരാഗഹേ (ക.)].

൩൪൪. ‘‘രജതം ജാതരൂപം വാ, ന ബോധായ ന സന്തിയാ;

നേതം സമണസാരുപ്പം, ന ഏതം അരിയദ്ധനം.

൩൪൫. ‘‘ലോഭനം മദനഞ്ചേതം, മോഹനം രജവഡ്ഢനം;

സാസങ്കം ബഹുആയാസം, നത്ഥി ചേത്ഥ ധുവം ഠിതി.

൩൪൬. ‘‘ഏത്ഥ രത്താ പമത്താ ച, സങ്കിലിട്ഠമനാ നരാ;

അഞ്ഞമഞ്ഞേന ബ്യാരുദ്ധാ, പുഥു കുബ്ബന്തി മേധഗം.

൩൪൭. ‘‘വധോ ബന്ധോ പരിക്ലേസോ, ജാനി സോകപരിദ്ദവോ;

കാമേസു അധിപന്നാനം, ദിസ്സതേ ബ്യസനം ബഹും.

൩൪൮. ‘‘തം മം ഞാതീ അമിത്താവ, കിം വോ കാമേസു യുഞ്ജഥ;

ജാനാഥ മം പബ്ബജിതം, കാമേസു ഭയദസ്സിനിം.

൩൪൯. ‘‘ന ഹിരഞ്ഞസുവണ്ണേന, പരിക്ഖീയന്തി ആസവാ;

അമിത്താ വധകാ കാമാ, സപത്താ സല്ലബന്ധനാ.

൩൫൦. ‘‘തം മം ഞാതീ അമിത്താവ, കിം വോ കാമേസു യുഞ്ജഥ;

ജാനാഥ മം പബ്ബജിതം, മുണ്ഡം സങ്ഘാടിപാരുതം.

൩൫൧. ‘‘ഉത്തിട്ഠപിണ്ഡോ ഉഞ്ഛോ ച, പംസുകൂലഞ്ച ചീവരം;

ഏതം ഖോ മമ സാരുപ്പം, അനഗാരൂപനിസ്സയോ.

൩൫൨. ‘‘വന്താ മഹേസീഹി കാമാ, യേ ദിബ്ബാ യേ ച മാനുസാ;

ഖേമട്ഠാനേ വിമുത്താ തേ, പത്താ തേ അചലം സുഖം.

൩൫൩. ‘‘മാഹം കാമേഹി സങ്ഗച്ഛിം, യേസു താണം ന വിജ്ജതി;

അമിത്താ വധകാ കാമാ, അഗ്ഗിക്ഖന്ധൂപമാ ദുഖാ.

൩൫൪. ‘‘പരിപന്ഥോ ഏസ ഭയോ, സവിഘാതോ സകണ്ടകോ;

ഗേധോ സുവിസമോ ചേസോ [ലേപോ (സീ.)], മഹന്തോ മോഹനാമുഖോ.

൩൫൫. ‘‘ഉപസഗ്ഗോ ഭീമരൂപോ, കാമാ സപ്പസിരൂപമാ;

യേ ബാലാ അഭിനന്ദന്തി, അന്ധഭൂതാ പുഥുജ്ജനാ.

൩൫൬. ‘‘കാമപങ്കേന സത്താ ഹി, ബഹൂ ലോകേ അവിദ്ദസൂ;

പരിയന്തം ന ജാനന്തി, ജാതിയാ മരണസ്സ ച.

൩൫൭. ‘‘ദുഗ്ഗതിഗമനം മഗ്ഗം, മനുസ്സാ കാമഹേതുകം;

ബഹും വേ പടിപജ്ജന്തി, അത്തനോ രോഗമാവഹം.

൩൫൮. ‘‘ഏവം അമിത്തജനനാ, താപനാ സംകിലേസികാ;

ലോകാമിസാ ബന്ധനീയാ, കാമാ മരണബന്ധനാ [ചരണബന്ധനാ (സീ.)].

൩൫൯. ‘‘ഉമ്മാദനാ ഉല്ലപനാ, കാമാ ചിത്തപ്പമദ്ദിനോ;

സത്താനം സങ്കിലേസായ, ഖിപ്പം [ഖിപം (സീ.)] മാരേന ഓഡ്ഡിതം.

൩൬൦. ‘‘അനന്താദീനവാ കാമാ, ബഹുദുക്ഖാ മഹാവിസാ;

അപ്പസ്സാദാ രണകരാ, സുക്കപക്ഖവിസോസനാ [വിസോസകാ (സീ.)].

൩൬൧. ‘‘സാഹം ഏതാദിസം കത്വാ, ബ്യസനം കാമഹേതുകം;

ന തം പച്ചാഗമിസ്സാമി, നിബ്ബാനാഭിരതാ സദാ.

൩൬൨. ‘‘രണം കരിത്വാ [തരിത്വാ (സീ.)] കാമാനം, സീതിഭാവാഭികങ്ഖിനീ;

അപ്പമത്താ വിഹസ്സാമി, സബ്ബസംയോജനക്ഖയേ.

൩൬൩. ‘‘അസോകം വിരജം ഖേമം, അരിയട്ഠങ്ഗികം ഉജും;

തം മഗ്ഗം അനുഗച്ഛാമി, യേന തിണ്ണാ മഹേസിനോ’’.

൩൬൪. ഇമം പസ്സഥ ധമ്മട്ഠം, സുഭം കമ്മാരധീതരം;

അനേജം ഉപസമ്പജ്ജ, രുക്ഖമൂലമ്ഹി ഝായതി.

൩൬൫. അജ്ജട്ഠമീ പബ്ബജിതാ, സദ്ധാ സദ്ധമ്മസോഭനാ;

വിനീതുപ്പലവണ്ണായ, തേവിജ്ജാ മച്ചുഹായിനീ.

൩൬൬. സായം ഭുജിസ്സാ അനണാ, ഭിക്ഖുനീ ഭാവിതിന്ദ്രിയാ;

സബ്ബയോഗവിസംയുത്താ, കതകിച്ചാ അനാസവാ.

൩൬൭. തം സക്കോ ദേവസങ്ഘേന, ഉപസങ്കമ്മ ഇദ്ധിയാ;

നമസ്സതി ഭൂതപതി, സുഭം കമ്മാരധീതരന്തി.

… സുഭാ കമ്മാരധീതാ ഥേരീ….

വീസതിനിപാതോ നിട്ഠിതോ.