൧. പുണ്ണാഥേരീഗാഥാ

൨൩൬. ‘‘ഉദഹാരീ അഹം സീതേ [ഉദകമാഹരിം സീതേ (സീ.)], സദാ ഉദകമോതരിം;

അയ്യാനം ദണ്ഡഭയഭീതാ, വാചാദോസഭയട്ടിതാ.

൨൩൭. ‘‘കസ്സ ബ്രാഹ്മണ ത്വം ഭീതോ, സദാ ഉദകമോതരി;

വേധമാനേഹി ഗത്തേഹി, സീതം വേദയസേ ഭുസം’’.

൨൩൮. ജാനന്തീ വത മം [ജാനന്തീ ച തുവം (ക.)] ഭോതി, പുണ്ണികേ പരിപുച്ഛസി;

കരോന്തം കുസലം കമ്മം, രുന്ധന്തം കതപാപകം.

൨൩൯. ‘‘യോ ച വുഡ്ഢോ ദഹരോ വാ, പാപകമ്മം പകുബ്ബതി;

ദകാഭിസേചനാ സോപി, പാപകമ്മാ പമുച്ചതി’’.

൨൪൦. ‘‘കോ നു തേ ഇദമക്ഖാസി, അജാനന്തസ്സ അജാനകോ;

ദകാഭിസേചനാ നാമ, പാപകമ്മാ പമുച്ചതി.

൨൪൧. ‘‘സഗ്ഗം നൂന ഗമിസ്സന്തി, സബ്ബേ മണ്ഡൂകകച്ഛപാ;

നാഗാ [നക്കാ (സീ.)] ച സുസുമാരാ ച, യേ ചഞ്ഞേ ഉദകേ ചരാ.

൨൪൨. ‘‘ഓരബ്ഭികാ സൂകരികാ, മച്ഛികാ മിഗബന്ധകാ;

ചോരാ ച വജ്ഝഘാതാ ച, യേ ചഞ്ഞേ പാപകമ്മിനോ;

ദകാഭിസേചനാ തേപി, പാപകമ്മാ പമുച്ചരേ.

൨൪൩. ‘‘സചേ ഇമാ നദിയോ തേ, പാപം പുബ്ബേ കതം വഹും;

പുഞ്ഞമ്പിമാ വഹേയ്യും തേ, തേന ത്വം പരിബാഹിരോ.

൨൪൪. ‘‘യസ്സ ബ്രാഹ്മണ ത്വം ഭീതോ, സദാ ഉദകമോതരി;

തമേവ ബ്രഹ്മേ മാ കാസി, മാ തേ സീതം ഛവിം ഹനേ’’.

൨൪൫. ‘‘കുമ്മഗ്ഗപടിപന്നം മം, അരിയമഗ്ഗം സമാനയി;

ദകാഭിസേചനാ ഭോതി, ഇമം സാടം ദദാമി തേ’’.

൨൪൬. ‘‘തുയ്ഹേവ സാടകോ ഹോതു, നാഹമിച്ഛാമി സാടകം;

സചേ ഭായസി ദുക്ഖസ്സ, സചേ തേ ദുക്ഖമപ്പിയം.

൨൪൭. ‘‘മാകാസി പാപകം കമ്മം, ആവി വാ യദി വാ രഹോ;

സചേ ച പാപകം കമ്മം, കരിസ്സസി കരോസി വാ.

൨൪൮. ‘‘ന തേ ദുക്ഖാ പമുത്യത്ഥി, ഉപേച്ചാപി [ഉപ്പച്ചാപി (അട്ഠ. പാഠന്തരം)] പലായതോ;

സചേ ഭായസി ദുക്ഖസ്സ, സചേ തേ ദുക്ഖമപ്പിയം.

൨൪൯. ‘‘ഉപേഹി സരണം ബുദ്ധം, ധമ്മം സങ്ഘഞ്ച താദിനം;

സമാദിയാഹി സീലാനി, തം തേ അത്ഥായ ഹേഹിതി’’.

൨൫൦. ‘‘ഉപേമി സരണം ബുദ്ധം, ധമ്മം സങ്ഘഞ്ച താദിനം;

സമാദിയാമി സീലാനി, തം മേ അത്ഥായ ഹേഹിതി.

൨൫൧. ‘‘ബ്രഹ്മബന്ധു പുരേ ആസിം, അജ്ജമ്ഹി സച്ചബ്രാഹ്മണോ;

തേവിജ്ജോ വേദസമ്പന്നോ, സോത്തിയോ ചമ്ഹി ന്ഹാതകോ’’തി.

… പുണ്ണാ ഥേരീ….

സോളസനിപാതോ നിട്ഠിതോ.