൫. സരഭങ്ഗത്ഥേരഗാഥാ

൪൮൭. ‘‘സരേ ഹത്ഥേഹി ഭഞ്ജിത്വാ, കത്വാന കുടിമച്ഛിസം;

തേന മേ സരഭങ്ഗോതി, നാമം സമ്മുതിയാ അഹു.

൪൮൮. ‘‘ന മയ്ഹം കപ്പതേ അജ്ജ, സരേ ഹത്ഥേഹി ഭഞ്ജിതും;

സിക്ഖാപദാ നോ പഞ്ഞത്താ, ഗോതമേന യസസ്സിനാ.

൪൮൯. ‘‘സകലം സമത്തം രോഗം, സരഭങ്ഗോ നാദ്ദസം പുബ്ബേ;

സോയം രോഗോ ദിട്ഠോ, വചനകരേനാതിദേവസ്സ.

൪൯൦. ‘‘യേനേവ മഗ്ഗേന ഗതോ വിപസ്സീ, യേനേവ മഗ്ഗേന സിഖീ ച വേസ്സഭൂ;

കകുസന്ധകോണാഗമനോ ച കസ്സപോ, തേനഞ്ജസേന അഗമാസി ഗോതമോ.

൪൯൧. ‘‘വീതതണ്ഹാ അനാദാനാ, സത്ത ബുദ്ധാ ഖയോഗധാ;

യേഹായം ദേസിതോ ധമ്മോ, ധമ്മഭൂതേഹി താദിഭി.

൪൯൨. ‘‘ചത്താരി അരിയസച്ചാനി, അനുകമ്പായ പാണിനം;

ദുക്ഖം സമുദയോ മഗ്ഗോ, നിരോധോ ദുക്ഖസങ്ഖയോ.

൪൯൩. ‘‘യസ്മിം നിവത്തതേ [യസ്മിം ന നിബ്ബത്തതേ (ക.)] ദുക്ഖം, സംസാരസ്മിം അനന്തകം;

ഭേദാ ഇമസ്സ കായസ്സ, ജീവിതസ്സ ച സങ്ഖയാ;

അഞ്ഞോ പുനബ്ഭവോ നത്ഥി, സുവിമുത്തോമ്ഹി സബ്ബധീ’’തി.

… സരഭങ്ഗോ ഥേരോ….

സത്തകനിപാതോ നിട്ഠിതോ.