൯. അനുരുദ്ധത്ഥേരഗാഥാ

൮൯൨. ‘‘പഹായ മാതാപിതരോ, ഭഗിനീ ഞാതിഭാതരോ;

പഞ്ച കാമഗുണേ ഹിത്വാ, അനുരുദ്ധോവ ഝായതു.

൮൯൩. ‘‘സമേതോ നച്ചഗീതേഹി, സമ്മതാളപ്പബോധനോ;

ന തേന സുദ്ധിമജ്ഝഗം [സുദ്ധമജ്ഝഗാ (സീ. ക.), സുദ്ധിമജ്ഝഗമാ (സ്യാ.)], മാരസ്സ വിസയേ രതോ.

൮൯൪. ‘‘ഏതഞ്ച സമതിക്കമ്മ, രതോ ബുദ്ധസ്സ സാസനേ;

സബ്ബോഘം സമതിക്കമ്മ, അനുരുദ്ധോവ ഝായതി.

൮൯൫. ‘‘രൂപാ സദ്ദാ രസാ ഗന്ധാ, ഫോട്ഠബ്ബാ ച മനോരമാ;

ഏതേ ച സമതിക്കമ്മ, അനുരുദ്ധോവ ഝായതി.

൮൯൬. ‘‘പിണ്ഡപാതപടിക്കന്തോ, ഏകോ അദുതിയോ മുനി;

ഏസതി പംസുകൂലാനി, അനുരുദ്ധോ അനാസവോ.

൮൯൭. ‘‘വിചിനീ അഗ്ഗഹീ ധോവി, രജയീ ധാരയീ മുനി;

പംസുകൂലാനി മതിമാ, അനുരുദ്ധോ അനാസവോ.

൮൯൮. ‘‘മഹിച്ഛോ ച അസന്തുട്ഠോ, സംസട്ഠോ യോ ച ഉദ്ധതോ;

തസ്സ ധമ്മാ ഇമേ ഹോന്തി, പാപകാ സംകിലേസികാ.

൮൯൯. ‘‘സതോ ച ഹോതി അപ്പിച്ഛോ, സന്തുട്ഠോ അവിഘാതവാ;

പവിവേകരതോ വിത്തോ, നിച്ചമാരദ്ധവീരിയോ.

൯൦൦. ‘‘തസ്സ ധമ്മാ ഇമേ ഹോന്തി, കുസലാ ബോധിപക്ഖികാ;

അനാസവോ ച സോ ഹോതി, ഇതി വുത്തം മഹേസിനാ.

൯൦൧. ‘‘മമ സങ്കപ്പമഞ്ഞായ, സത്ഥാ ലോകേ അനുത്തരോ;

മനോമയേന കായേന, ഇദ്ധിയാ ഉപസങ്കമി.

൯൦൨. ‘‘യദാ മേ അഹു സങ്കപ്പോ, തതോ ഉത്തരി ദേസയി;

നിപ്പപഞ്ചരതോ ബുദ്ധോ, നിപ്പപഞ്ചമദേസയി.

൯൦൩. ‘‘തസ്സാഹം ധമ്മമഞ്ഞായ, വിഹാസിം സാസനേ രതോ;

തിസ്സോ വിജ്ജാ അനുപ്പത്താ, കതം ബുദ്ധസ്സ സാസനം.

൯൦൪. ‘‘പഞ്ചപഞ്ഞാസവസ്സാനി, യതോ നേസജ്ജികോ അഹം;

പഞ്ചവീസതിവസ്സാനി, യതോ മിദ്ധം സമൂഹതം.

൯൦൫. [ദീ. നി. ൨.൨൨൨] ‘‘നാഹു അസ്സാസപസ്സാസാ, ഠിതചിത്തസ്സ താദിനോ;

അനേജോ സന്തിമാരബ്ഭ, ചക്ഖുമാ പരിനിബ്ബുതോ.

൯൦൬. [ദീ. നി. ൨.൨൨൨] ‘‘അസല്ലീനേന ചിത്തേന, വേദനം അജ്ഝവാസയി;

പജ്ജോതസ്സേവ നിബ്ബാനം, വിമോക്ഖോ ചേതസോ അഹു.

൯൦൭. ‘‘ഏതേ പച്ഛിമകാ ദാനി, മുനിനോ ഫസ്സപഞ്ചമാ;

നാഞ്ഞേ ധമ്മാ ഭവിസ്സന്തി, സമ്ബുദ്ധേ പരിനിബ്ബുതേ.

൯൦൮. ‘‘നത്ഥി ദാനി പുനാവാസോ, ദേവകായസ്മി ജാലിനി;

വിക്ഖീണോ ജാതിസംസാരോ, നത്ഥി ദാനി പുനബ്ഭവോ.

൯൦൯. ‘‘യസ്സ മുഹുത്തേന സഹസ്സധാ, ലോകോ സംവിദിതോ സബ്രഹ്മകപ്പോ;

വസീ ഇദ്ധിഗുണേ ചുതൂപപാതേ, കാലേ പസ്സതി ദേവതാ സ ഭിക്ഖു [സഭിക്ഖുനോ (സീ. ക.)].

൯൧൦. ‘‘അന്നഭാരോ [അന്നഹാരോ (സീ.)] പുരേ ആസിം, ദലിദ്ദോ ഘാസഹാരകോ;

സമണം പടിപാദേസിം, ഉപരിട്ഠം യസസ്സിനം.

൯൧൧. ‘‘സോമ്ഹി സക്യകുലേ ജാതോ, അനുരുദ്ധോതി മം വിദൂ;

ഉപേതോ നച്ചഗീതേഹി, സമ്മതാളപ്പബോധനോ.

൯൧൨. ‘‘അഥദ്ദസാസിം സമ്ബുദ്ധം, സത്ഥാരം അകുതോഭയം;

തസ്മിം ചിത്തം പസാദേത്വാ, പബ്ബജിം അനഗാരിയം.

൯൧൩. ‘‘പുബ്ബേനിവാസം ജാനാമി, യത്ഥ മേ വുസിതം പുരേ;

താവതിംസേസു ദേവേസു, അട്ഠാസിം സക്കജാതിയാ [സതജാതിയാ (സീ.)].

൯൧൪. ‘‘സത്തക്ഖത്തും മനുസ്സിന്ദോ, അഹം രജ്ജമകാരയിം;

ചാതുരന്തോ വിജിതാവീ, ജമ്ബുസണ്ഡസ്സ ഇസ്സരോ;

അദണ്ഡേന അസത്ഥേന, ധമ്മേന അനുസാസയിം.

൯൧൫. ‘‘ഇതോ സത്ത തതോ സത്ത, സംസാരാനി ചതുദ്ദസ;

നിവാസമഭിജാനിസ്സം, ദേവലോകേ ഠിതാ തദാ.

൯൧൬. ‘‘പഞ്ചങ്ഗികേ സമാധിമ്ഹി, സന്തേ ഏകോദിഭാവിതേ;

പടിപ്പസ്സദ്ധിലദ്ധമ്ഹി, ദിബ്ബചക്ഖു വിസുജ്ഝി മേ.

൯൧൭. ‘‘ചുതൂപപാതം ജാനാമി, സത്താനം ആഗതിം ഗതിം;

ഇത്ഥഭാവഞ്ഞഥാഭാവം, ഝാനേ പഞ്ചങ്ഗികേ ഠിതോ.

൯൧൮. ‘‘പരിചിണ്ണോ മയാ സത്ഥാ…പേ… ഭവനേത്തി സമൂഹതാ.

൯൧൯. ‘‘വജ്ജീനം വേളുവഗാമേ, അഹം ജീവിതസങ്ഖയാ;

ഹേട്ഠതോ വേളുഗുമ്ബസ്മിം, നിബ്ബായിസ്സം അനാസവോ’’തി.

… അനുരുദ്ധോ ഥേരോ….