൧൫. സോളസകനിപാതോ

൧. അഞ്ഞാസികോണ്ഡഞ്ഞത്ഥേരഗാഥാ

൬൭൩. ‘‘ഏസ ഭിയ്യോ പസീദാമി, സുത്വാ ധമ്മം മഹാരസം;

വിരാഗോ ദേസിതോ ധമ്മോ, അനുപാദായ സബ്ബസോ.

൬൭൪. ‘‘ബഹൂനി ലോകേ ചിത്രാനി, അസ്മിം പഥവിമണ്ഡലേ;

മഥേന്തി മഞ്ഞേ സങ്കപ്പം, സുഭം രാഗൂപസംഹിതം.

൬൭൫. ‘‘രജമുഹതഞ്ച വാതേന, യഥാ മേഘോപസമ്മയേ;

ഏവം സമ്മന്തി സങ്കപ്പാ, യദാ പഞ്ഞായ പസ്സതി.

൬൭൬. [ധ. പ. ൨൭൭ ധമ്മപദേ] ‘‘സബ്ബേ സങ്ഖാരാ അനിച്ചാതി, യദാ പഞ്ഞായ പസ്സതി;

അഥ നിബ്ബിന്ദതി ദുക്ഖേ, ഏസ മഗ്ഗോ വിസുദ്ധിയാ.

൬൭൭. [ധ. പ. ൨൭൮ ധമ്മപദേ] ‘‘സബ്ബേ സങ്ഖാരാ ദുക്ഖാതി, യദാ പഞ്ഞായ പസ്സതി

അഥ നിബ്ബിന്ദതി ദുക്ഖേ, ഏസ മഗ്ഗോ വിസുദ്ധിയാ.

൬൭൮. [ധ. പ. ൨൭൯ ധമ്മപദേ] ‘‘സബ്ബേ ധമ്മാ അനത്താതി, യദാ പഞ്ഞായ പസ്സതി;

അഥ നിബ്ബിന്ദതി ദുക്ഖേ, ഏസ മഗ്ഗോ വിസുദ്ധിയാ.

൬൭൯. ‘‘ബുദ്ധാനുബുദ്ധോ യോ ഥേരോ, കോണ്ഡഞ്ഞോ തിബ്ബനിക്കമോ;

പഹീനജാതിമരണോ, ബ്രഹ്മചരിയസ്സ കേവലീ.

൬൮൦. ‘‘ഓഘപാസോ ദള്ഹഖിലോ [ദള്ഹോ ഖിലോ (സ്യാ. ക.)], പബ്ബതോ ദുപ്പദാലയോ;

ഛേത്വാ ഖിലഞ്ച പാസഞ്ച, സേലം ഭേത്വാന [ഛേത്വാന (ക.)] ദുബ്ഭിദം;

തിണ്ണോ പാരങ്ഗതോ ഝായീ, മുത്തോ സോ മാരബന്ധനാ.

൬൮൧. ‘‘ഉദ്ധതോ ചപലോ ഭിക്ഖു, മിത്തേ ആഗമ്മ പാപകേ;

സംസീദതി മഹോഘസ്മിം, ഊമിയാ പടികുജ്ജിതോ.

൬൮൨. ‘‘അനുദ്ധതോ അചപലോ, നിപകോ സംവുതിന്ദ്രിയോ;

കല്യാണമിത്തോ മേധാവീ, ദുക്ഖസ്സന്തകരോ സിയാ.

൬൮൩. ‘‘കാലപബ്ബങ്ഗസങ്കാസോ, കിസോ ധമനിസന്ഥതോ;

മത്തഞ്ഞൂ അന്നപാനസ്മിം, അദീനമനസോ നരോ.

൬൮൪. ‘‘ഫുട്ഠോ ഡംസേഹി മകസേഹി, അരഞ്ഞസ്മിം ബ്രഹാവനേ;

നാഗോ സങ്ഗാമസീസേവ, സതോ തത്രാധിവാസയേ.

൬൮൫. ‘‘നാഭിനന്ദാമി മരണം…പേ… നിബ്ബിസം ഭതകോ യഥാ.

൬൮൬. ‘‘നാഭിനന്ദാമി മരണം…പേ… സമ്പജാനോ പതിസ്സതോ.

൬൮൭. ‘‘പരിചിണ്ണോ മയാ സത്ഥാ…പേ… ഭവനേത്തി സമൂഹതാ.

൬൮൮. ‘‘യസ്സ ചത്ഥായ പബ്ബജിതോ, അഗാരസ്മാനഗാരിയം;

സോ മേ അത്ഥോ അനുപ്പത്തോ, കിം മേ സദ്ധിവിഹാരിനാ’’തി.

… അഞ്ഞാസികോണ്ഡഞ്ഞോ [അഞ്ഞാകോണ്ഡഞ്ഞോ (സീ. സ്യാ.)] ഥേരോ….

൨. ഉദായിത്ഥേരഗാഥാ

൬൮൯. [അ. നി. ൬.൪൩] ‘‘മനുസ്സഭൂതം സമ്ബുദ്ധം, അത്തദന്തം സമാഹിതം;

ഇരിയമാനം ബ്രഹ്മപഥേ, ചിത്തസ്സൂപസമേ രതം.

൬൯൦. ‘‘യം മനുസ്സാ നമസ്സന്തി, സബ്ബധമ്മാന പാരഗും;

ദേവാപി തം നമസ്സന്തി, ഇതി മേ അരഹതോ സുതം.

൬൯൧. ‘‘സബ്ബസംയോജനാതീതം, വനാ നിബ്ബനമാഗതം;

കാമേഹി നേക്ഖമ്മരതം [നിക്ഖമ്മരതം (ക.)], മുത്തം സേലാവ കഞ്ചനം.

൬൯൨. ‘‘സ വേ അച്ചരുചി നാഗോ, ഹിമവാവഞ്ഞേ സിലുച്ചയേ;

സബ്ബേസം നാഗനാമാനം, സച്ചനാമോ അനുത്തരോ.

൬൯൩. ‘‘നാഗം വോ കിത്തയിസ്സാമി, ന ഹി ആഗും കരോതി സോ;

സോരച്ചം അവിഹിംസാ ച, പാദാ നാഗസ്സ തേ ദുവേ.

൬൯൪. ‘‘സതി ച സമ്പജഞ്ഞഞ്ച, ചരണാ നാഗസ്സ തേപരേ;

സദ്ധാഹത്ഥോ മഹാനാഗോ, ഉപേക്ഖാസേതദന്തവാ.

൬൯൫. ‘‘സതി ഗീവാ സിരോ പഞ്ഞാ, വീമംസാ ധമ്മചിന്തനാ;

ധമ്മകുച്ഛിസമാവാസോ, വിവേകോ തസ്സ വാലധി.

൬൯൬. ‘‘സോ ഝായീ അസ്സാസരതോ, അജ്ഝത്തം സുസമാഹിതോ;

ഗച്ഛം സമാഹിതോ നാഗോ, ഠിതോ നാഗോ സമാഹിതോ.

൬൯൭. ‘‘സയം സമാഹിതോ നാഗോ, നിസിന്നോപി സമാഹിതോ;

സബ്ബത്ഥ സംവുതോ നാഗോ, ഏസാ നാഗസ്സ സമ്പദാ.

൬൯൮. ‘‘ഭുഞ്ജതി അനവജ്ജാനി, സാവജ്ജാനി ന ഭുഞ്ജതി;

ഘാസമച്ഛാദനം ലദ്ധാ, സന്നിധിം പരിവജ്ജയം.

൬൯൯. ‘‘സംയോജനം അണും ഥൂലം, സബ്ബം ഛേത്വാന ബന്ധനം;

യേന യേനേവ ഗച്ഛതി, അനപക്ഖോവ ഗച്ഛതി.

൭൦൦. ‘‘യഥാപി ഉദകേ ജാതം, പുണ്ഡരീകം പവഡ്ഢതി;

നോപലിപ്പതി തോയേന, സുചിഗന്ധം മനോരമം.

൭൦൧. ‘‘തഥേവ ച ലോകേ ജാതോ, ബുദ്ധോ ലോകേ വിഹരതി;

നോപലിപ്പതി ലോകേന, തോയേന പദുമം യഥാ.

൭൦൨. ‘‘മഹാഗിനി പജ്ജലിതോ, അനാഹാരോപസമ്മതി;

അങ്ഗാരേസു ച സന്തേസു, നിബ്ബുതോതി പവുച്ചതി.

൭൦൩. ‘‘അത്ഥസ്സായം വിഞ്ഞാപനീ, ഉപമാ വിഞ്ഞൂഹി ദേസിതാ;

വിഞ്ഞിസ്സന്തി മഹാനാഗാ, നാഗം നാഗേന ദേസിതം.

൭൦൪. ‘‘വീതരാഗോ വീതദോസോ, വീതമോഹോ അനാസവോ;

സരീരം വിജഹം നാഗോ, പരിനിബ്ബിസ്സത്യനാസവോ’’തി.

… ഉദായീ ഥേരോ….

സോളസകനിപാതോ നിട്ഠിതോ.