൧. സോണകോളിവിസത്ഥേരഗാഥാ

൬൩൨. ‘‘യാഹു രട്ഠേ സമുക്കട്ഠോ, രഞ്ഞോ അങ്ഗസ്സ പദ്ധഗൂ [പത്ഥഗൂ (സ്യാ.), പട്ഠഗൂ (ക.)];

സ്വാജ്ജ ധമ്മേസു ഉക്കട്ഠോ, സോണോ ദുക്ഖസ്സ പാരഗൂ.

൬൩൩. ‘‘പഞ്ച ഛിന്ദേ പഞ്ച ജഹേ, പഞ്ച ചുത്തരി ഭാവയേ;

പഞ്ചസങ്ഗാതിഗോ ഭിക്ഖു, ഓഘതിണ്ണോതി വുച്ചതി.

൬൩൪. ‘‘ഉന്നളസ്സ പമത്തസ്സ, ബാഹിരാസസ്സ [ബാഹിരാസയസ്സ (ക.)] ഭിക്ഖുനോ;

സീലം സമാധി പഞ്ഞാ ച, പാരിപൂരിം ന ഗച്ഛതി.

൬൩൫. ‘‘യഞ്ഹി കിച്ചം അപവിദ്ധം [തദപവിദ്ധം (സീ. സ്യാ.)], അകിച്ചം പന കരീയതി;

ഉന്നളാനം പമത്താനം, തേസം വഡ്ഢന്തി ആസവാ.

൬൩൬. ‘‘യേസഞ്ച സുസമാരദ്ധാ, നിച്ചം കായഗതാ സതി;

അകിച്ചം തേ ന സേവന്തി, കിച്ചേ സാതച്ചകാരിനോ;

സതാനം സമ്പജാനാനം, അത്ഥം ഗച്ഛന്തി ആസവാ.

൬൩൭. ‘‘ഉജുമഗ്ഗമ്ഹി അക്ഖാതേ, ഗച്ഛഥ മാ നിവത്തഥ;

അത്തനാ ചോദയത്താനം, നിബ്ബാനമഭിഹാരയേ.

൬൩൮. ‘‘അച്ചാരദ്ധമ്ഹി വീരിയമ്ഹി, സത്ഥാ ലോകേ അനുത്തരോ;

വീണോപമം കരിത്വാ മേ, ധമ്മം ദേസേസി ചക്ഖുമാ;

തസ്സാഹം വചനം സുത്വാ, വിഹാസിം സാസനേ രതോ.

൬൩൯. ‘‘സമഥം പടിപാദേസിം, ഉത്തമത്ഥസ്സ പത്തിയാ;

തിസ്സോ വിജ്ജാ അനുപ്പത്താ, കതം ബുദ്ധസ്സ സാസനം.

൬൪൦. ‘‘നേക്ഖമ്മേ [നിക്ഖമേ (ക.), നേക്ഖമ്മം (മഹാവ. ൨൪൪; അ. നി. ൬.൫൫)] അധിമുത്തസ്സ, പവിവേകഞ്ച ചേതസോ;

അബ്യാപജ്ഝാധിമുത്തസ്സ [അബ്യാപജ്ഝാധിമ്ഹത്തസ്സ (ക.)], ഉപാദാനക്ഖയസ്സ ച.

൬൪൧. ‘‘തണ്ഹക്ഖയാധിമുത്തസ്സ, അസമ്മോഹഞ്ച ചേതസോ;

ദിസ്വാ ആയതനുപ്പാദം, സമ്മാ ചിത്തം വിമുച്ചതി.

൬൪൨. ‘‘തസ്സ സമ്മാ വിമുത്തസ്സ, സന്തചിത്തസ്സ ഭിക്ഖുനോ;

കതസ്സ പടിചയോ നത്ഥി, കരണീയം ന വിജ്ജതി.

൬൪൩. ‘‘സേലോ യഥാ ഏകഘനോ [ഏകഘനോ (ക.)], വാതേന ന സമീരതി;

ഏവം രൂപാ രസാ സദ്ദാ, ഗന്ധാ ഫസ്സാ ച കേവലാ.

൬൪൪. ‘‘ഇട്ഠാ ധമ്മാ അനിട്ഠാ ച, നപ്പവേധേന്തി താദിനോ;

ഠിതം ചിത്തം വിസഞ്ഞുത്തം, വയഞ്ചസ്സാനുപസ്സതീ’’തി.

… സോണോ കോളിവിസോ ഥേരോ….

തേരസനിപാതോ നിട്ഠിതോ.