൯. നവമവഗ്ഗോ

൮൧. ‘‘യം മയാ പകതം പാപം, പുബ്ബേ അഞ്ഞാസു ജാതിസു;

ഇധേവ തം വേദനീയം, വത്ഥു അഞ്ഞം ന വിജ്ജതീ’’തി.

… സമിതിഗുത്തോ ഥേരോ….

൮൨. ‘‘യേന യേന സുഭിക്ഖാനി, സിവാനി അഭയാനി ച;

തേന പുത്തക ഗച്ഛസ്സു, മാ സോകാപഹതോ ഭവാ’’തി.

… കസ്സപോ ഥേരോ….

൮൩. ‘‘സീഹപ്പമത്തോ വിഹര, രത്തിന്ദിവമതന്ദിതോ;

ഭാവേഹി കുസലം ധമ്മം, ജഹ സീഘം സമുസ്സയ’’ന്തി.

… സീഹോ ഥേരോ….

൮൪. ‘‘സബ്ബരത്തിം സുപിത്വാന, ദിവാ സങ്ഗണികേ രതോ;

കുദാസ്സു നാമ ദുമ്മേധോ, ദുക്ഖസ്സന്തം കരിസ്സതീ’’തി.

… നീതോ ഥേരോ….

൮൫. ‘‘ചിത്തനിമിത്തസ്സ കോവിദോ, പവിവേകരസം വിജാനിയ;

ഝായം നിപകോ പതിസ്സതോ, അധിഗച്ഛേയ്യ സുഖം നിരാമിസ’’ന്തി.

… സുനാഗോ ഥേരോ….

൮൬. ‘‘ഇതോ ബഹിദ്ധാ പുഥു അഞ്ഞവാദിനം, മഗ്ഗോ ന നിബ്ബാനഗമോ യഥാ അയം;

ഇതിസ്സു സങ്ഘം ഭഗവാനുസാസതി, സത്ഥാ സയം പാണിതലേവ ദസ്സയ’’ന്തി.

… നാഗിതോ ഥേരോ….

൮൭. ‘‘ഖന്ധാ ദിട്ഠാ യഥാഭൂതം, ഭവാ സബ്ബേ പദാലിതാ;

വിക്ഖീണോ ജാതിസംസാരോ, നത്ഥി ദാനി പുനബ്ഭവോ’’തി.

… പവിട്ഠോ ഥേരോ….

൮൮. ‘‘അസക്ഖിം വത അത്താനം, ഉദ്ധാതും ഉദകാ ഥലം;

വുയ്ഹമാനോ മഹോഘേവ, സച്ചാനി പടിവിജ്ഝഹ’’ന്തി.

… അജ്ജുനോ ഥേരോ….

൮൯. ‘‘ഉത്തിണ്ണാ പങ്കപലിപാ, പാതാലാ പരിവജ്ജിതാ;

മുത്തോ ഓഘാ ച ഗന്ഥാ ച, സബ്ബേ മാനാ വിസംഹതാ’’തി.

… ദേവസഭോ ഥേരോ….

൯൦. ‘‘പഞ്ചക്ഖന്ധാ പരിഞ്ഞാതാ, തിട്ഠന്തി ഛിന്നമൂലകാ;

വിക്ഖീണോ ജാതിസംസാരോ, നത്ഥി ദാനി പുനബ്ഭവോ’’തി.

… സാമിദത്തോ ഥേരോ….

വഗ്ഗോ നവമോ നിട്ഠിതോ.

തസ്സുദ്ദാനം –

ഥേരോ സമിതിഗുത്തോ ച, കസ്സപോ സീഹസവ്ഹയോ;

നീതോ സുനാഗോ നാഗിതോ, പവിട്ഠോ അജ്ജുനോ ഇസി;

ദേവസഭോ ച യോ ഥേരോ, സാമിദത്തോ മഹബ്ബലോതി.