൧൦. ദസമവഗ്ഗോ

൧. പരിപുണ്ണകത്ഥേരഗാഥാ

൯൧. ‘‘ന തഥാ മതം സതരസം, സുധന്നം യം മയജ്ജ പരിഭുത്തം;

അപരിമിതദസ്സിനാ ഗോതമേന, ബുദ്ധേന ദേസിതോ ധമ്മോ’’തി.

… പരിപുണ്ണകോ ഥേരോ….

൨. വിജയത്ഥേരഗാഥാ

൯൨. ‘‘യസ്സാസവാ പരിക്ഖീണാ, ആഹാരേ ച അനിസ്സിതോ;

സുഞ്ഞതാ അനിമിത്തോ ച, വിമോക്ഖോ യസ്സ ഗോചരോ;

ആകാസേവ സകുന്താനം, പദം തസ്സ ദുരന്നയ’’ന്തി.

… വിജയോ ഥേരോ….

൩. ഏരകത്ഥേരഗാഥാ

൯൩. ‘‘ദുക്ഖാ കാമാ ഏരക, ന സുഖാ കാമാ ഏരക;

യോ കാമേ കാമയതി, ദുക്ഖം സോ കാമയതി ഏരക;

യോ കാമേ ന കാമയതി, ദുക്ഖം സോ ന കാമയതി ഏരകാ’’തി.

… ഏരകോ ഥേരോ….

൪. മേത്തജിത്ഥേരഗാഥാ

൯൪. ‘‘നമോ ഹി തസ്സ ഭഗവതോ, സക്യപുത്തസ്സ സിരീമതോ;

തേനായം അഗ്ഗപ്പത്തേന, അഗ്ഗധമ്മോ [അഗ്ഗോ ധമ്മോ (സീ.)] സുദേസിതോ’’തി.

… മേത്തജി ഥേരോ….

൫. ചക്ഖുപാലത്ഥേരഗാഥാ

൯൫. ‘‘അന്ധോഹം ഹതനേത്തോസ്മി, കന്താരദ്ധാനപക്ഖന്ദോ [പക്ഖന്നോ (സീ.), പക്കന്തോ (സ്യാ. സീ. അട്ഠ.)];

സയമാനോപി ഗച്ഛിസ്സം, ന സഹായേന പാപേനാ’’തി.

… ചക്ഖുപാലോ ഥേരോ….

൬. ഖണ്ഡസുമനത്ഥേരഗാഥാ

൯൬. ‘‘ഏകപുപ്ഫം ചജിത്വാന, അസീതി [അസീതിം (സീ.)] വസ്സകോടിയോ;

സഗ്ഗേസു പരിചാരേത്വാ, സേസകേനമ്ഹി നിബ്ബുതോ’’തി.

… ഖണ്ഡസുമനോ ഥേരോ….

൭. തിസ്സത്ഥേരഗാഥാ

൯൭. ‘‘ഹിത്വാ സതപലം കംസം, സോവണ്ണം സതരാജികം;

അഗ്ഗഹിം മത്തികാപത്തം, ഇദം ദുതിയാഭിസേചന’’ന്തി.

… തിസ്സോ ഥേരോ….

൮. അഭയത്ഥേരഗാഥാ

൯൮. ‘‘രൂപം ദിസ്വാ സതി മുട്ഠാ, പിയം നിമിത്തം മനസികരോതോ;

സാരത്തചിത്തോ വേദേതി, തഞ്ച അജ്ഝോസ തിട്ഠതി;

തസ്സ വഡ്ഢന്തി ആസവാ, ഭവമൂലോപഗാമിനോ’’തി [ഭവമൂലാ ഭവഗാമിനോതി (സീ. ക.)].

… അഭയോ ഥേരോ….

൯. ഉത്തിയത്ഥേരഗാഥാ

൯൯. ‘‘സദ്ദം സുത്വാ സതി മുട്ഠാ, പിയം നിമിത്തം മനസികരോതോ;

സാരത്തചിത്തോ വേദേതി, തഞ്ച അജ്ഝോസ തിട്ഠതി;

തസ്സ വഡ്ഢന്തി ആസവാ, സംസാരം ഉപഗാമിനോ’’തി.

… ഉത്തിയോ ഥേരോ….

൧൦. (ദുതിയ)-ദേവസഭത്ഥേരഗാഥാ

൧൦൦. ‘‘സമ്മപ്പധാനസമ്പന്നോ, സതിപട്ഠാനഗോചരോ;

വിമുത്തികുസുമസഞ്ഛന്നോ, പരിനിബ്ബിസ്സത്യനാസവോ’’തി.

… ദേവസഭോ ഥേരോ….

വഗ്ഗോ ദസമോ നിട്ഠിതോ.

തസ്സുദ്ദാനം –

പരിപുണ്ണകോ ച വിജയോ, ഏരകോ മേത്തജീ മുനി;

ചക്ഖുപാലോ ഖണ്ഡസുമനോ, തിസ്സോ ച അഭയോ തഥാ;

ഉത്തിയോ ച മഹാപഞ്ഞോ, ഥേരോ ദേവസഭോപി ചാതി.